ভাৰতৰ ৪ বাৰৰ বিধায়ক ওলাল জাৰ্মানীৰ নাগৰিক, উচ্চ ন্যায়ালয়ে দিলে কঠোৰ শাস্তি
ভাৰতবৰ্ষত ২০ বছৰে ধৰি ৪ বাৰকৈ বিধায়ক হোৱা এগৰাকী নেতাৰ ক্ষেত্ৰত পোহৰলৈ আহিছে এক আচৰিত ঘটনা। ভাৰতৰ ৰাজনীতিত সক্ৰিয় হৈ থকা নেতাগৰাকী ওলাল জাৰ্মানৰ হে নাগৰিক। যাৰ ফলত এতিয়া শাস্তিৰ সন্মুখিন হৈছে বিধায়কগৰাকী।
তেলেংগানাত পোহৰলৈ আহিছে এই আচৰিত গোচৰ। তেলেংগানা উচ্চ ন্যায়ালয়ে কংগ্ৰেছ নেতা আদি শ্ৰীনিবাসৰ আবেদনৰ ওপৰত ৰায়দান কৰাৰ সময়তে বি আৰ এছৰ প্ৰাক্তন বিধায়ক ড০ ৰমেশ চেন্নামানেনীক জাৰ্মান নাগৰিক বুলি গণ্য কৰে। ৰমেশ চেন্নামানীৰ নাগৰিকত্ব সন্দৰ্ভত কংগ্ৰেছ নেতা শ্ৰীনিবাসে উচ্চ ন্যায়ালয়ৰ কাষ চাপিছিল।
৯ ডিচেম্বৰ সোমবাৰে এই ৰায় ঘোষণা কৰে আদালতে। আদালতে ৰায়দানত কয় যে বি আৰ এছৰ প্ৰাক্তন নেতা চেন্নামানেনী ৰমেশ এজন জাৰ্মান নাগৰিক আৰু তেওঁ ভেমুলাৱাডা বিধানসভাৰ আসনৰ পৰা নিৰ্বাচনত অৱতীৰ্ণ হ’বলৈ জাল নথি-পত্ৰ ব্যৱহাৰ কৰিছিল। তেওঁ নিজকে ভাৰতীয় নাগৰিক বুলি পৰিচয় দিছিল।
ন্যায়ালয়ে কংগ্ৰেছ নেতাৰ আবেদনৰ ওপৰত ৰায়দান দিওঁতে কয় যে ৰমেশে জাৰ্মান দূতাবাসৰ পৰা তেওঁ আৰু সেই দেশৰ নাগৰিক নহয় বুলি নিশ্চিত কৰা কোনো নথি দাখিল কৰাত ব্যৰ্থ হয়। যাৰ ফলত এতিয়া বি আৰ এছৰ প্ৰাক্তন বিধায়কগৰাকীৰ ওপৰত ৩০ লাখ টকা জৰিমনা বিহে ন্যায়ালয়ে। লগতে ভাৰতীয় নাগৰিকত্বও বাতিল কৰে।
জৰিমনাৰ ২৫ লাখ টকা শ্ৰীনিবাসক দিব লাগিব। যাৰ বিৰুদ্ধে ২০২৩ চনৰ নৱেম্বৰৰ নিৰ্বাচনত ৰমেশ পৰাস্ত হৈছিল। ছ’চিয়েল মিডিয়া প্লেটফৰ্ম এক্সত এক পোষ্টত শ্ৰীনিবাসে কয় যে প্ৰাক্তন বিধায়ক চেন্নামানেনী ৰমেশক জাৰ্মান নাগৰিকৰ ৰূপ লৈ ভুৱা নথি-পত্ৰৰে বিধায়ক নিৰ্বাচিত হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
