ৰাজ্যৰ ৰাজপথত পুনৰ মৃ*ত্যুৰ কিৰিলি। এক শিহৰণকাৰী ভয়ংকৰ দুৰ্ঘটনাৰ পিছতে এতিয়া ঘোঁৰামাৰা বাতাবাৰী গাঁৱৰ ঘৰে ঘৰে কান্দোনৰ ৰোল শুনিবলৈ পোৱা গৈছে। শোণিতপুৰৰ বালিপৰাৰ সমীপৱৰ্তী মিট চাপ্লাইত ১৫ নং ৰাষ্ট্ৰীয় ঘাইপথত সংঘটিত হোৱা এই ভয়ংকৰ পথ দুৰ্ঘটনাই সমগ্ৰ অঞ্চলটোতে শোকৰ ছাঁ পেলাইছে। নিশা প্ৰায় ১২ বজাত সংঘটিত হয় এই মৰ্মান্তিক দুৰ্ঘটনাটো।
জানিব পৰা মতে, নিশা ১২ মান বজাত ১৫ নং ৰাষ্ট্ৰীয় ঘাইপথৰ মিট চাপ্লাই অঞ্চলত এখন ট্ৰাক আৰু এখন ইক’ বাহনৰ মাজত মুখামুখি সংঘৰ্ষ হয়। সংঘৰ্ষৰ ফলত ইক’ বাহনখনত থকা পাঁচজন যুৱকৰ ঘটনাস্থলীতে মৃত্যু হোৱা বুলি জানিব পৰা গৈছে। দুৰ্ঘটনাত ইকো বাহনখন সম্পূৰ্ণৰূপে চূৰ্ণ-বিচূৰ্ণ হৈ পৰে।
প্ৰাপ্ত তথ্য অনুসৰি, AR 04A 2696 নম্বৰৰ ট্ৰাকখন আৰু AS 12AP 6300 নম্বৰৰ ইক’ বাহনখনৰ মাজত সংঘটিত হয় এই ভয়ংকৰ মুখামুখি সংঘৰ্ষ। সংঘৰ্ষ ইমানেই প্ৰচণ্ড আছিল যে ইক’ বাহনখন যথেষ্ট ক্ষতিগ্ৰস্ত হয় আৰু বাহনখনত থকা পাঁচজন যুৱকৰ থিতাতে মৃ*ত্যু ঘটে বুলি জানিব পৰা গৈছে।
এই দুৰ্ঘটনাত প্ৰাণ হেৰুওৱা যুৱককেইজন ঘোঁৰামাৰী বতাবাৰীৰ হৰ গোবিন্দ হাজুৱাৰী, নয়ন স্বৰ্গীয়াৰী, পাপু বৰা, প্ৰাঞ্জল বণিয়া আৰু সঞ্জয় মেচ বুলি জানিব পৰা গৈছে। একে নিশাতে পাঁচজনকৈ যুৱকৰ কৰুণ মৃত্যুৰ খবৰে অঞ্চলটোত গভীৰ শোকৰ সৃষ্টি কৰিছে। পৰিয়াল তথা আত্মীয়-স্বজনৰ মাজতো শোকৰ বন্যা নামি পৰিছে।
উল্লেখ্য যে ৰাজ্যৰ ব্যস্ত পথসমূহৰ ভিতৰত ১৫ নং ৰাষ্ট্ৰীয় ঘাইপথো অন্যতম। নিশাৰ ভাগত এই পথত যান-বাহনৰ চলাচল অব্যাহত থাকে। এনে পৰিস্থিতিত ট্ৰাক আৰু সৰু বাহনৰ মুখামুখি সংঘৰ্ষই পুনৰ পথ সুৰক্ষাক লৈ প্ৰশ্ন উত্থাপন কৰিছে। অৱশ্যে এই ভয়ংকৰ দুৰ্ঘটনাটো সঠিকভাৱে কিয় সংঘটিত হ’ল, সেই সন্দৰ্ভত এতিয়াও বিতং তথ্য পোহৰলৈ অহা নাই। দুৰ্ঘটনাৰ প্ৰকৃত কাৰণ তদন্তৰ পাছতহে স্পষ্ট হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
