মৃত্যুক জিনি ১৩ কোটি জনতাৰ ওঁঠত হাঁহি বিৰিঙোৱা মেক্সিকোৰ নায়ক ৰাউল জিমেনেজ

আমেৰিকা, মেক্সিকো আৰু কানাডাত এতিয়া কেৱল ফুটবল আৰু ফুটবল। অলিম্পিকৰ পিছতে বিশ্বৰ সৰ্ববৃৎ ক্ৰীড়া মহোৎসৱৰ বাবে এই দেশ তিনিখনত বিশ্বৰ চুকে-কোনে থকা অজস্ৰ ফুটবল অনুৰাগীয়ে ভিৰ কৰিছে। ফুটবলৰ বিশ্বৰ আগশাৰীৰ যাদুকৰসকলৰ দুভৰিৰ যাদুত বিশ্বৰ কোটি কোটি অনুৰাগীৰ হৃদস্পন্দন বাঢ়িছে। দেশ ৩খনৰ ১৬ খনকৈ ষ্টেডিয়ামৰ সেউজ ঘাঁহনিত কৰা দুভৰিৰ যুঁজে প্ৰতিবাৰৰ দৰে এইবাৰো জন্ম দিব নতুন নতুন তাৰকাৰ। তেনে এজন নতুন তাৰকা ৰাউল জিমেনেজ। যি এইবাৰ বিশ্বকাপৰ উদ্বোধনী মেচখনতে মেক্সিকোৰ লৈ গল স্কৰ কৰি এতিয়া সমগ্ৰ বিশ্বতে চৰ্চিত হৈ পৰিছে। ৩৫ বছৰীয়া ষ্ট্ৰাইকাৰজনৰ খেলুৱৈ হিচাপে নিজৰ কেৰিয়াৰৰ বিয়লি বেলাত উপস্থিত হ’লেও নায়ক হিচাপে মেক্সিকানসকলৰ হৃদয়ত নতুনকৈ থিতাপি লৈছে। উদ্বোধনী মেচখনত দক্ষিণ আফ্ৰিকাৰ বিৰুদ্ধে ৬৭ মিনিটত গল স্ক’ৰ কৰাৰ লগে লগেই ৰাউল হৈ পৰে মেক্সিকানসকলৰ বাবে নয়নৰ মণি, কাৰণ ফুটবলৰ খেলপথাৰত ৰাউল জিমেনেজৰ আছে এক কৰুণ ইতিহাস।

উদ্বোধনী মেচখনত ৰাউলে কৰা গলটো কেৱল এটা গলেই নহয়, সেই গলটোৰ আঁৰত লুকাই আছিল মৃত্যুৰ সৈতে যুঁজা, অসীম কষ্ট, মানসিক দৃঢ়তা আৰু এক অবিশ্বাস্য প্ৰত্যাৱৰ্তনৰ কাহিনী। মাত্ৰ কেইবছৰমান আগতে ৰাউলে মৃত্যুক জিনিব পাৰিব নে নাই তাতো আছিল তীব্ৰ অনিশ্চয়তা।

২০২০ চনৰ ২৯ নৱেম্বৰ। ৰাউলৰ বাবে এই অভিশপ্ত দিনটোৱে ৰৈ আছিল লণ্ডনৰ ইমাৰিটছ ষ্টেডিয়ামত। ইংলিছ প্ৰীমিয়াৰ লীগৰ আৰ্ছেনাল আৰু ওলভাৰহেম্পটনৰ মাজত অনুষ্ঠিত মেচখনতেই হৈছিল সেই ভয়াৱহ দুৰ্ঘটনাটো। খেলখনৰ আৰম্ভণিৰ কিছুসময় পিছতেই ওলভাৰহেম্পটনৰ হৈ ষ্ট্ৰাইকিং পজিশ্যনত খেলা ৰাউল জিমেনেজে সতীৰ্থৰ পৰা পোৱা এটা হেডাৰ পাছক নিজৰ আয়ত্তলৈ আনিবলৈ কৰা চেষ্টাত ব্যাঘাত জন্মাবলৈ আৰ্ছেনালৰ ডিফেণ্ডাৰ ডেভিড লুইজেও চেষ্টা চলায়। ফলত দুয়োগৰাকী খেলুৱৈৰ মাজত প্ৰচণ্ড সংঘৰ্ষ হয়। এই দুৰ্ঘটনাত গুৰুতৰভাৱে আহত ৰাউল। এই দুৰ্ঘটনাটো ইমানেই ভয়ংকৰ আছিল যে ৰাউলে তৎক্ষণাত মাটিত বাগৰি পৰে আৰু লগে লগেই অচেতন হৈ পৰে। এই ঘটনাত খেলপথাৰত উপস্থিত দুয়োটা দলৰ খেলুৱৈ, কোচিং ষ্টাফ আৰু দৰ্শক মৰ্মাহত হৈ পৰে। ততাতৈয়াকৈ হাস্পতাললৈ নিয়া হয় ৰাউলক। অচেতন ৰাউলক অক্সিজেন প্ৰদান কৰি হাস্পতাললৈ নিয়া দৃশ্যটো ফুটবল ইতিহাসতে অন্যতম কৰুণ দৃশ্য হিচাপে অনুৰাগীৰ মাজত সদায়ে স্মৰণীয় হৈ ৰ’ব।  হাস্পতালত কৰা পৰীক্ষাৰ অন্তত ৰাউলৰ লাওখোলাৰ হাড় এডাল ভাঙি যোৱাটো নিশ্চিত হৈ পৰে চিকিৎসকসকলে। লাওখোলাৰ হাড় ভঙা মানেই জীৱন-মৃত্যুৰ যুঁজ। ৰাউলে মৃত্যুক জিনিব পাৰিব নে নাই তাৰ কোনো নিশ্চয়তা নাই। এই খবৰ বিয়পি পৰাৰ লগে লগে শোকস্তব্ধ হৈ পৰে সমগ্ৰ ফুটবল অনুৰাগী। কিন্তু হাৰি যোৱা নাছিল ৰাউল জিমেনেজ। লাওখোলাৰ জটিল অস্ত্ৰোপচাৰ আৰু চিকিৎসকসকলৰ আপ্ৰাণ চেষ্টাত এসময়ত ক্ৰমাৎ সুস্থ হৈ উঠিল ৰাউল। এক দীঘলীয়া সময় হাস্পতালৰ বিছনাতেই সময় অতিবাহিত কৰিবলগীয়া হৈছিল ফুটবলৰ খেলপথাৰত দপদপাই থকা ৰাউল। তেতিয়া কোনেও হয়টো কল্পনাও কৰা নাছিল যে এদিন পুনৰ পেছদাৰী ফুটবলৰ খেলপথাৰলৈ উভতি আহিব তেওঁ। চিকিৎসকৰ তত্বাৱধানত সুদীৰ্ঘ আঠমাহৰ মূৰত পুনৰ খেলপথাৰত ভৰি থৈছিল ৰাউলে। সকলোৱে ভাবিছিল জিমেনেজে পুনৰ আগৰ দৰে পেছাদাৰী ফুটবল খেলিব নোৱাৰিব, মূৰৰ এনে আঘাতৰ পাছত খেলুৱৈসকলৰ কেৰিয়াৰ সমাপ্ত হোৱাটো অস্বাভাৱিক নহয়, অস্বাভাৱিক তেনে খেলুৱৈ পুনৰ খেলপথাৰলৈ ঘূৰি অহাটোহে। কিন্তু হাৰি যোৱা নাছিল ৰাউল, প্ৰচণ্ড মানসিক শক্তি আৰু অধ্যৱসায়ৰ জৰিয়তে তেওঁ নিজকে পুনৰ সাজু কৰি তোলে। প্ৰথমে এক দীঘলীয়া অনুশীলন প্ৰক্ৰিয়াৰ মাজেৰে আগবাঢ়ি পেছাদাৰী ফুটবলত অংশগ্ৰহণ কৰি অনুৰাগীসকলক চমক দিবলৈ সক্ষম হ’ল ৰাউল জিমেনেজে।

২০২১ চনৰ ছেপ্টেম্বৰত ছাউথেম্পটনৰ বিৰুদ্ধে অনুষ্ঠিত এখন খেলত জিমেনেজে আঘাতৰ পাছত নিজৰ প্ৰথম গ’লটো কৰে। সেই গ’লটোৱে কেৱল তেওঁৰ দলক জয়ী কৰোৱাই নহয়, সমগ্ৰ ফুটবল বিশ্বক তেওঁৰ উপস্থিতিৰ খবৰটোও দিয়ে। এতিয়া ৰাউল শাৰীৰিকভাৱে সুস্থ হোৱাৰ লগতে পূৰ্বতকৈও অধিক মানসিকভাৱে শক্তিশালী হৈ খেলপথাৰত নামে। চলিত বিশ্বকাপৰ উদ্বোধনী মেচত দেশৰ হৈ কৰা গলটোৰ পিছতে পুনৰবাৰ ফুটবল বিশ্বত ৰাউলৰ নাম চৰ্চিত হৈ পৰিছে। ৰাউল জিমেনেজৰ কাহিনীয়ে প্ৰমাণ কৰে যে দৃঢ় সংকল্প, কঠোৰ পৰিশ্ৰম আৰু আত্মবিশ্বাস থাকিলে যিকোনো বিপদ অতিক্ৰম কৰিব পাৰি। মৃত্যুৰ দুৱাৰমুখৰ পৰা ঘূৰি আহি বিশ্বকাপৰ নায়ক হোৱাটো কেৱল ফুটবলৰ কাহিনী নহয়, ই সকলোৰে বাবে এক অনুপ্ৰেৰণাৰ উদাহৰণ।

এই প্ৰতিবেদন যুগুতাইছে মানসজ্যোতিয়ে