মানৱেন্দ্ৰ কুমাৰ দাসঃ অহা ৮ জুনত অনুষ্ঠিত হ’ব কাৰ্বি আংলং স্বায়ত্ত শাসিত পৰিষদৰ নিৰ্বাচন৷ মুঠ ২৬ টা পৰিষদীয় সমষ্টিৰ বাবে অনুষ্ঠিত হ’বলগীয়া নিৰ্বাচনত ইতিমধ্যে শাসনাধিষ্ঠিত বিজেপিৰ নিৰ্বাচনী প্ৰচাৰ চমক লগা হৈছে৷ কিন্তু তাৰ বিপৰীতে ৰাজ্যৰ প্ৰধান বিৰোধী দল কংগ্ৰেছৰ নিৰ্বাচনী প্ৰচাৰ যথেষ্ট দুৰ্বল৷ অন্য অৰ্থত কংগ্ৰেছ দলে নিৰ্বাচনৰ পূৰ্বেই যেন পৰাজয় স্বীকাৰ কৰিছে৷ কিন্তু কিয়? কাৰ্বি আংলং স্বায়ত্ত শাসিত পৰিষদ গঠনত কংগ্ৰেছ দল আৰু চৰকাৰৰ অৱদান অনস্ৱীকাৰ্য৷ তৎসত্ত্বেও কংগ্ৰেছ দলৰ প্ৰতি আজি যেন কাৰ্বি জনতাৰো মোহভংগ হৈছে!
মূলতঃ কংগ্ৰেছ দলৰ আভ্যন্তৰীণ সংঘাত আৰু নেতৃত্বকেন্দ্ৰিক বিবাদৰ বাবে দেশৰ অন্যতম প্ৰাচীন দলটো আজি গণবিচ্ছিন্ন৷ সেইবাবে যোৱা বিধানসভা নিৰ্বাচনৰ পাছত অসমত প্ৰতিটো নিৰ্বাচনতে শোচনীয়ভাৱে কংগ্ৰেছ পৰাজিত হৈছে৷ অৱশ্যে এইক্ষেত্ৰত দলীয় নীতি আৰু ৰাজনৈতিক সমীকৰণো সমালোচনাৰ ঊৰ্ধ্বত নহয়৷ বিশেষকৈ অসম বিধানসভাৰ যোৱা সাধাৰণ নিৰ্বাচনত কংগ্ৰেছ দলে অসমত যি ৰাজনৈতিক উদ্দেশ্যেৰে aiudfৰ লগত মহাজোঁট গঠন কৰিছিল, সেই মহাজোঁটৰ সমীকৰণ ৰাজ্যবাসীৰ বাবে মুঠে গ্ৰহণযোগ্য নাছিল৷ কিয়নো উজনি অসমত মূলসুঁতিৰ অসমীয়া ভোটাৰে বদৰুদ্দিন আজমল নেতৃত্বাধীন aiudfৰ ৰাজনৈতিক স্থিতিক কোনোপধ্যেই সমৰ্থন দিয়া নাছিল৷ পৰিণতিত কংগ্ৰেছৰ দুৰ্গ হিচাপে পৰিচিত উজনি অসমৰ বহুকেইটা সমষ্টিত কংগ্ৰেছৰ ৰাজনৈতিক সূত্ৰ ব্যৰ্থ হৈছিল৷
লগতে পঢ়ক পুনৰ সমকামীৰ বিবাহ! বিবাহপাশত আৱদ্ধ হ’ল দুই আন্তঃৰাষ্ট্ৰীয় মহিলা ক্ৰিকেটাৰ
সাধাৰণ নিৰ্বাচনৰ পাছত ৰাজ্যত ৫ টাকৈ বিধানসভা সমষ্টিৰ উপ-নিৰ্বাচন অনুষ্ঠিত হয়৷ সেই নিৰ্বাচনতো কংগ্ৰেছ দলৰ পুনৰ পৰাজয় হয়৷ অৱশ্যে বাহ্যিক দৃষ্টিত শাসক পক্ষৰ প্ৰাৰ্থী উপ-নিৰ্বাচনত জয়ী হয় বুলি এক ৰাজনৈতিক ধাৰণাও নথকা নহয়৷ কিন্তু তাৰ পাছত অনুষ্ঠিত হোৱা পৌৰসভা আৰু গুৱাহাটী পৌৰ নিগমৰ নিৰ্বাচনত কংগ্ৰেছ দল যিধৰণে পৰাস্ত হ’ল তাৰ পাছত দলৰ গ্ৰহণযোগ্যতাৰ প্ৰশ্নও স্বাভাৱিকতে উত্থাপিত হৈছে৷ ধাৰাবাহিক পৰাজয়ৰ সম্পৰ্কত দলৰ ভিতৰচ’ৰাত ব্যাপক চিন্তা-চৰ্চা চলিব লাগিছে৷ নতুন ৰাজনৈতিক সমীকৰণ অথবা নেতৃত্ব সম্পৰ্কতো আলোচনা হৈছে৷ খোদ প্ৰদেশ কংগ্ৰেছৰ এক শীৰ্ষ সূত্ৰই প্ৰকাশ কৰিছে এই তথ্য৷
একে সময়তে কাৰ্বি আংলং স্বায়ত্ত শাসিত পৰিষদৰ নিৰ্বাচনক লৈও উদ্বিগ্ন কংগ্ৰেছ নেতৃত্ব হৈ আছে৷ শীৰ্ষ নেতৃত্বও বিচাৰে কাৰ্বি আংলং স্বায়ত্ত শাসিত পৰিষদৰ নিৰ্বাচনত যদি কংগ্ৰেছ দল পুনৰ পৰাজিত হয় তেন্তে সেই পৰাজয় শেষ পৰাজয় হওক৷ দলীয় নেতৃত্বই বিচৰা ধৰণে এই পৰাজয় প্ৰকৃততে শেষ পৰাজয় হ’বনে?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
