কেৱল ৰাজনীতিবিদৰ উপস্থিতিতেই শপতগ্ৰহণ অনুষ্ঠান অনুষ্ঠিত নহয়৷ এই অনুষ্ঠানত উপস্থিত থাকিব দেশৰ ৪জনকৈ আগশাৰীৰ উদ্যোগপতিও৷ মুকেশ আম্বানী, গৌতম আদানী, জিত আদানী, সজ্জন জিন্দাল উপস্থিত থাকিব ড০ হিমন্ত বিশ্ব শৰ্মাই মুখ্যমন্ত্ৰী হিচাপে শপতগ্ৰহণ কৰিবলগীয়া বিশেষ অনুষ্ঠানত৷
মঙলবাৰে ঠিক ১১ বজাৰ লগে লগেই দ্বিতীয়বাৰৰ বাবে মুখ্যমন্ত্ৰী হিচাপে শপতগ্ৰহণ কৰিব হিমন্ত বিশ্ব শৰ্মাই৷ এই অনুষ্ঠানত দেশৰ প্ৰায় ২০খন ৰাজ্যৰ মুখ্যমন্ত্ৰীয়ে অংশগ্ৰহণ কৰিব৷ ইয়াৰোপৰি উপস্থিত থাকিব কেন্দ্ৰীয় মন্ত্ৰীৰ লগতে, গৃহমন্ত্ৰী অমিত শ্বাহ, প্ৰধানমন্ত্ৰী নৰেন্দ্ৰ মোদী, প্ৰতিৰক্ষামন্ত্ৰী ৰাজনাথ সিঙো৷ ইতিমধ্যেই গুৱাহাটীত উপস্থিত হৈছে প্ৰতিৰক্ষা মন্ত্ৰী ৰাজনাথ সিং।
শপতগ্ৰহণ অনুষ্ঠানত উপস্থিত থাকিবলগীয়া মুখ্যমন্ত্ৰীৰ তালিকা?
মঙলবাৰৰ শপতগ্ৰহণ অনুষ্ঠানত উপস্থিত থাকিব- ছিকিমৰ মুখ্যমন্ত্ৰী প্ৰেম সিং তামাং, ত্ৰিপুৰাৰ মুখ্যমন্ত্ৰী মানিক চাহা, পশ্চিমবংগৰ মুখ্যমন্ত্ৰী শুভেন্দু অধিকাৰী, উত্তৰাখণ্ডৰ মুখ্যমন্ত্ৰী প্ৰেম সিং তামাং, উত্তৰপ্ৰদেশৰ মুখ্যমন্ত্ৰী যোগী আদিত্যনাথ, অন্ধ্ৰপ্ৰদেশৰ মুখ্যমন্ত্ৰী এন চন্দ্ৰবাবু নাইডু, অৰুণাচলৰ মুখ্যমন্ত্ৰী পেমা খাণ্ডু, বিহাৰৰ মুখ্যমন্ত্ৰী সম্ৰাট চৌধুৰী, ছত্তিশগড়ৰ মুখ্যমন্ত্ৰী বিষ্ণু দেও ছাই, গোৱাৰ মুখ্যমন্ত্ৰী প্ৰমোদ সাৱস্ত, গুজৰাটৰ মুখ্যমন্ত্ৰী ভূপেন্দ্ৰভাই পেটেল, হাৰিয়ানাৰ মুখ্যমন্ত্ৰী নায়াব সিং ছৈনী, মধ্যপ্ৰদেশৰ মুখ্যমন্ত্ৰী মোহন যাদৱ, মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নবিছ, মণিপুৰৰ মুখ্যমন্ত্ৰী য়ুমনাম খেমচন্দ্ৰ সিং, মেঘালয়ৰ মুখ্যমন্ত্ৰী কনৰাড ছাংমা, নাগালেণ্ডৰ মুখ্যমন্ত্ৰী নেফিঅ’ ৰিঅ, ওড়িশাৰ মোহন চৰণ মাঝি, ৰাজস্থানৰ মুখ্যমন্ত্ৰী ভজনলাল শৰ্মা৷
উল্লেখ্য যে মুখ্যমন্ত্ৰীৰ ওপৰিও এই শপতগ্ৰহণ অনুষ্ঠানত উপস্থিত থাকিব কেইবাগৰাকী উপমুখ্যমন্ত্ৰী আৰু বিজেপিৰ বহু ৰাষ্ট্ৰীয় নেতাও৷ এই শপতগ্ৰহণ অনুষ্ঠানত মুখ্যমন্ত্ৰীৰ সৈতে শপতগ্ৰহণ কৰিব ৪গৰাকী মন্ত্ৰীয়ে৷ চৰণ বড়ো, ৰামেশ্বৰ তেলী, অজন্তা নেওগ আৰু অতুল বৰাই মুখ্যমন্ত্ৰী হিমন্ত বিশ্ব শৰ্মাৰ সৈতে একেলগে শপতগ্ৰহণ কৰিব৷ অৱশ্যে কোনে কি দপ্তৰ পাব সেয়া বৰ্তমানো জানিব পৰা হোৱা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
