গুৱাহাটী মহানগৰীৰ হোটেল বিলাস ইনত সংঘটিত পাঁচজনকৈ লোকৰ মৃত্যুৰ ঘটনাক লৈ ৰাজ্যজুৰি তীব্ৰ চাঞ্চল্য অব্যাহত আছে। এই চাঞ্চল্যকৰ হত্যাকাণ্ডৰ মূল অভিযুক্ত ঘনকান্ত গগৈৰ পত্নী জোনমণি গগৈয়ে স্বামীৰ পক্ষত থিয় দি ন্যায়ৰ দাবী উত্থাপন কৰিছে। মুখ্যমন্ত্ৰীৰ ওচৰত স্বামীৰ বিৰুদ্ধে উত্থাপিত অভিযোগৰ সঠিক তদন্ত কৰাৰ আহ্বান জনাইছে পত্নী জোনমণিয়ে।
‘মোৰ স্বামীয়ে তেনে কাম কৰা নাই। ভালকৈ তদন্ত কৰিলে সকলো ওলাব’—এই মন্তব্যৰে স্বামীৰ বিৰুদ্ধে চলি থকা তদন্তক লৈ নিজৰ স্থিতি স্পষ্ট কৰিছে জোনমণিয়ে। তেওঁৰ মতে, ঘটনাটোৰ প্ৰকৃত সত্য পোহৰলৈ আনিবলৈ নিৰপেক্ষ আৰু সঠিক তদন্তৰ প্ৰয়োজন।
এই মন্তব্যত ঘাতকৰ পত্নীয়ে এবাৰো ঘনকান্তই গুলীচালনা কৰাৰ কথা উল্লেখ কৰা নাই।
কি ঘটনা ঘটিছিল হোটেল বিলাস ইনত?
উল্লেখ্য যে, ২০২৬ চনৰ ২৬ অক্টোবৰৰ নিশা গুৱাহাটীৰ উলুবাৰী-বৰা চাৰ্ভিচ অঞ্চলৰ হোটেল বিলাস ইনত সংঘটিত হৈছিল ভয়ংকৰ গুলীচালনাৰ ঘটনা। এই ঘটনাত হোটেলৰ সহ-মালিক হেলেনা ভৰালী, তেওঁৰ ভাতৃ ভূদেৱ ভৰালী, হেলেনাৰ পুত্ৰ দেবৰ্ষি, বোৱাৰী ৰিণিকা আৰু কৰ্মচাৰী নাৰায়ণ দাসৰ মৃত্যু হৈছিল।
ঘটনাৰ মূল অভিযুক্ত হিচাপে ঘনকান্ত গগৈৰ নাম পোহৰলৈ আহিছে। হোটেলখন লীজত লোৱা আৰু আৰ্থিক লেনদেনক কেন্দ্ৰ কৰি সৃষ্টি হোৱা বিবাদৰ পৰিণতিত এই ঘটনা সংঘটিত হোৱা বুলি আৰক্ষীয়ে সন্দেহ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
