ধ*ৰ্ষণ কাণ্ডক লৈ ইংলেণ্ডৰ ঘৰুৱা ক্ৰিকেটত সৃষ্টি হৈছে চাঞ্চল্য। এচেক্স কাউণ্টি ক্ৰিকেট ক্লাবৰ ২৪ বছৰীয়া বেটছমেন ৰবিন দাসৰ বিৰুদ্ধে দুটা গুৰুতৰ ধ*ৰ্ষণৰ অভিযোগ উত্থাপন হৈছে। অভিযোগৰ পিছতে এচেক্স কাউণ্টি ক্ৰিকেট ক্লাবে তেওঁক তাৎক্ষণিকভাৱে দলৰ পৰা নিলম্বন কৰিছে। এই গোচৰৰ সন্দৰ্ভত ৰবিন দাসে ২০২৬ চনৰ ৯ অক্টোবৰত ইনাৰ লণ্ডনৰ ক্ৰাউন ক’ৰ্টত হাজিৰ হ’ব লাগিব। আৰক্ষীৰ তথ্য অনুসৰি, ঘটনাটো ২০২৪ চনৰ মাৰ্চ মাহত লণ্ডনৰ ব্ৰিক্সটন অঞ্চলত সংঘটিত হৈছিল।
লণ্ডন মহানগৰ আৰক্ষীৰ তথ্য অনুসৰি, ২০২৪ চনৰ মাৰ্চ মাহত ব্ৰিক্সটনত এগৰাকী মহিলাৰ ওপৰত ধ*ৰ্ষণৰ অভিযোগ উত্থাপন হৈছিল। ঘটনাটোৰ তদন্ত চলোৱাৰ পিছত ২০২৫ চনৰ ২৭ আগষ্টত আৰক্ষীয়ে ৰবিন দাসক গ্ৰেপ্তাৰ কৰে। পৰৱৰ্তী সময়ত ২০২৬ চনৰ ২৩ জুলাইত তেওঁৰ বিৰুদ্ধে দুটা ধ*ৰ্ষণৰ অভিযোগ আনুষ্ঠানিকভাৱে উত্থাপন কৰা হয়। এতিয়া বিষয়টো আদালতৰ বিচাৰাধীন। অভিযোগসমূহ আদালতত প্ৰমাণিত হ’লে তেওঁ আইনীভাৱে গুৰুতৰ শাস্তিৰ সন্মুখীন হ’ব পাৰে।
অভিযোগৰ গুৰুত্বৰ প্ৰতি লক্ষ্য ৰাখি এচেক্স কাউণ্টি ক্ৰিকেট ক্লাবে ৰবিন দাসক নিলম্বন কৰাৰ সিদ্ধান্ত গ্ৰহণ কৰিছে। ক্লাবটোৱে এক আনুষ্ঠানিক বিবৃতিত কয় যে তেওঁলোকৰ এগৰাকী চুক্তিবদ্ধ খেলুৱৈয়ে ক্লাবৰ বাহিৰৰ এক গুৰুতৰ বিষয়ৰ সন্দৰ্ভত আদালতত হাজিৰ হ’বলগীয়া হৈছে। ক্লাবটোৱে লগতে জনাইছে যে এই বিষয়ত ইংলেণ্ড আৰু ৱেলছ ক্ৰিকেট ব’ৰ্ড (ECB), পেছাদাৰী ক্ৰিকেটাৰ্ছ এছ’চিয়েচন (PCA) আৰু সংশ্লিষ্ট কৰ্তৃপক্ষৰ সৈতে নিয়মীয়াকৈ যোগাযোগ ৰক্ষা কৰি থকা হৈছে। ক্লাবৰ মতে, ৰবিন দাসৰ নিলম্বন চলি থকা আইনী প্ৰক্ৰিয়াৰ অংশ। আদালতৰ প্ৰক্ৰিয়া সম্পূৰ্ণ নোহোৱা পৰ্যন্ত এই বিষয়ত অধিক মন্তব্য নকৰাৰ সিদ্ধান্ত লৈছে ক্লাবটোৱে।
ৰবিন দাসৰ জন্ম ২০০২ চনৰ ফেব্ৰুৱাৰী মাহত বাংলাদেশত কিন্তু তেওঁ এগৰাকী সোঁহতীয়া বেটছমেন হিচাপে ইংলেণ্ডৰ ঘৰুৱা ক্ৰিকেটত খেলি আহিছে। প্ৰথম শ্ৰেণীৰ ক্ৰিকেটত তেওঁ এতিয়ালৈকে ৯খন মেচ খেলিছে। এই মেচসমূহত ২৫.১৫ গড়ে মুঠ ৩২৭ ৰান সংগ্ৰহ কৰিছে। তেওঁৰ নামত আছে এটা শতক। আনহাতে, লিষ্ট এ ক্ৰিকেটত ৰবিন দাসে ২৯খন মেচ খেলি ৩১.০০ গড়ে ৮০৫ ৰান সংগ্ৰহ কৰিছে। এই ফৰ্মেটত তেওঁ এটা শতক আৰু পাঁচটা অৰ্ধশতক অৰ্জন কৰিছে। ২০২৬ চনৰ ২১ জুলাইত মিডলছেক্সৰ বিৰুদ্ধে ৱান ডে কাপত ৰবিন দাসে শেষবাৰৰ বাবে খেলপথাৰত নামিছিল। ইয়াৰ পিছতেই উত্থাপিত অভিযোগৰ পৰিপ্ৰেক্ষিতত তেওঁক এচেক্স কাউন্টি দলৰ পৰা নিলম্বন কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
