শিশুৰো হ’ব পাৰে থাইৰয়ড, অভিভাৱকে কি কি কথাত গুৰুত্ব দিব?

থাইৰয়ড সম্পৰ্কে বহুতৰে এটা ভুল ধাৰণা হ’ল যে ই কেৱল প্ৰাপ্তবয়স্ক লোককহে আক্ৰান্ত কৰে। কিন্তু কেৱল প্ৰাপ্তবয়স্কৰ লোককহে নহয়, শিশুৰ ওপৰতো ইয়াৰ প্ৰভাৱ পৰিব পাৰে। গতিকে থাইৰয়ড শিশুৰ ক্ষেত্ৰত নহ’ব বুলি ইয়াক আওকাণ কৰা উচিত নহয়। অভিভাৱকে শিশুৰ ক্ষেত্ৰত কি কি লক্ষণত গুৰুত্ব দিব লাগে?
থাইৰয়ড এনে এক ৰোগ যাৰ ফলত মানুহৰ ওজন হয় কমি যায় নহয় দ্ৰুতগতিত বৃদ্ধি পায়। কোৱা হয় যে এবাৰ কাৰোবাৰ এই ৰোগ হ’লে নিয়ন্ত্ৰণ কৰিবলৈ আজীৱন ঔষধ খাব লাগে। আন এটা প্ৰচলিত ধাৰণা এয়া যে- থাইৰয়ড এনে এক ৰোগ যিয়ে কেৱল প্ৰাপ্তবয়স্ক লোককহে আক্ৰান্ত কৰে। কিন্তু চিকিৎসা বিশেষজ্ঞসকলৰ মতে থাইৰয়ড শিশুসকলৰ মাজতো দেখা দিব পাৰে। যদি শিশুৰ ওজন দ্ৰুতগতিত বাঢ়িছে বা কমিছে তেন্তে পিতৃ-মাতৃয়ে তেওঁলোকৰ থাইৰয়ড পৰীক্ষা কৰাব লাগে। এয়া ডিঙিত থকা পখিলাৰ আকৃতিৰ এক গ্ৰন্থি যিয়ে আমি খোৱা সকলো বস্তু শক্তিলৈ ৰূপান্তৰিত কৰে।

থাইৰয়ড হাইপোথাইৰয়ডিজম আৰু হাইপাৰথাইৰয়ডিজম দুই প্ৰকাৰৰ। শিশুৰ থাইৰয়ডৰ সন্দৰ্ভত ডেৰাডুনৰ বিশেষজ্ঞ চিকিৎসক ডাঃ প্ৰিয়া(Consultant, Endocrinology, Kailash Hospital, Dehradun)ই কয় যে-বহুতে ভাবে যে থাইৰয়ডৰ সমস্যা কেৱল প্ৰাপ্তবয়স্ক লোকৰ মাজতহে দেখা দিয়ে। কিন্তু সেয়া সঁচা নহয়। শিশুসকলেও থাইৰয়ডৰ সমস্যা, বিশেষকৈ হাইপ’থাইৰয়ডিজম অনুভৱ কৰিব পাৰে অৰ্থাৎ তেনে শিশুৰ থাইৰয়ড গ্ৰন্থিয়ে পৰ্যাপ্ত পৰিমাণে থাইৰয়ড হৰম’ন উৎপাদন কৰা নাই। শিশুৰ সঠিক বৃদ্ধি, মগজুৰ বিকাশ, শক্তি বজাই ৰখাৰ বাবে এই হৰম’নবোৰ অতি প্ৰয়োজনীয়।

অভিভাৱকসকলে কিহৰ প্ৰতি গুৰুত্ব দিব লাগে?
প্ৰথম কথা, যদি আপোনাৰ শিশুৰ বয়স অনুসৰি উচ্চতা বা শাৰীৰিক বৃদ্ধি লেহেমীয়া হয় বা যৌৱনকাল পলমকৈ আৰম্ভ হয়, তেন্তে নিশ্চিতভাৱে চিকিৎসকৰ পৰামৰ্শ লওক।
দ্বিতীয়তে, যদি শিশুটিয়ে পৰ্যাপ্ত পৰিমাণে টোপনি যোৱাৰ পিছতো সকলো সময়তে ভাগৰুৱা হৈ থাকে, তেন্তে ইয়াক কেৱল এলাহ বুলি ভাবি আওকাণ নকৰিব।
তৃতীয়তে, যদি শিশুটিয়ে পঢ়া-শুনাত মনোনিৱেশ কৰিবলৈ অসুবিধা পাইছে, কথাবোৰ মনত ৰখাত অসুবিধা পাইছে বা স্কুলত তেওঁৰ প্ৰদৰ্শন হঠাতে অৱনতি ঘটিবলৈ আৰম্ভ কৰিছে, তেন্তে ইয়াৰ এটা কাৰণ হ’ব পাৰে থাইৰয়ডৰ সমস্যা। ইয়াৰ উপৰিও অস্পষ্টভাৱে ওজন বৃদ্ধি আৰু কোষ্ঠকাঠিন্যও ইয়াৰ লক্ষণ হ’ব পাৰে। কাৰণ অনডাৰএক্টিভ থাইৰয়ড গ্ৰন্থিয়ে বিপাকীয় ক্ৰিয়া আৰু পাচন দুয়োটাকে লেহেমীয়া কৰে।

শেষত, যদি আপোনাৰ শিশুটিৰ আনতকৈ ঠাণ্ডা বেছি লাগে, ছাল অতি শুকান হয় বা ডিঙিৰ আগফালে ফুলা দেখা যায়, তেন্তে এই লক্ষণসমূহক আওকাণ কৰা উচিত নহয়।

ভাল খবৰটো হ’ল থাইৰয়ড ৰোগ চিকিৎসাযোগ্য। গতিকে যদি আপুনি এই লক্ষণসমূহৰ কেইবাটাও একেলগে লক্ষ্য কৰে তেন্তে শিশুটিক শিশু চিকিৎসকৰ ওচৰলৈ নিশ্চয়কৈ লৈ যাব। সাধাৰণ তেজৰ পৰীক্ষাৰ দ্বাৰা ইয়াক ধৰা পেলাব পাৰি আৰু সময়মতে চিকিৎসা কৰিলে শিশুৰ বৃদ্ধি আৰু বিকাশ স্বাভাৱিকভাৱে হ’ব পাৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ