স্বামীয়ে ২ কন্যাৰ সৈতে উ*লংগ কৰি উলিয়াই দিছিল ঘৰৰ চৌহদৰ পৰা

আপুনি হয়টো এনে বহু মহান লোকৰ সংগ্ৰামৰ কথা শুনিছে। শুনিছে বহু ডাঙৰ ডাঙৰ খেলুৱৈৰো সংগ্ৰামৰ কাহিনী। কিন্তু আজি দেশৰ বাবে স্বৰ্ণ জয় কৰা এগৰাকী খেলুৱৈৰ জীৱনৰ এনে সংগ্ৰামৰ কাহিনী কম, যিটো শুনিলে আপোনাৰো গৌৰৱেৰে উফন্দি উঠিব বুকু। এইগৰাকী খেলুৱৈৰ সংগ্ৰামৰ কাহিনী শব্দৰে সঠিকভাৱে বৰ্ণনা কৰাটোও কঠিন। শাৰীৰিক বাধা, দৰিদ্ৰতা আৰু অপমানক সমান্তৰালভাৱে পৰাভূত কৰি আজি তেওঁ কমনৱেলথ গেমছত দেশৰ বাবে আজুৰি আনিছে স্বৰ্ণ পদক। এইগৰাকী খেলুৱৈৰ নাম শৰ্মিলা ধনখড়। শৰ্মিলাই চলিত গ্লাছগো কমনৱেলথ গেমছৰ পেৰা শ্বটপুট F57 শাখাত ৯.৮১ মিটাৰ থ্ৰ’নিক্ষেপ কৰি জিনিছে সোণৰ পদক। শৰ্মিলাৰ এই বিজয়ৰ আঁৰত লুকাই আছে অসীম কষ্ট, ত্যাগ আৰু অদম্য সাহসৰ এক দীঘলীয়া কাহিনী।

জন্মৰ কিছুদিন পিছতে অৰ্থাৎ দুবছৰ বয়সতে পলিঅ’ত আক্ৰান্ত হৈছিল শৰ্মিলা। তেতিয়াৰ পৰাই বিশেষভাৱে অক্ষম হৈয়ে অতিবাহিত কৰিছে সমগ্ৰ জীৱন। ইপিনে শৰ্মিলাৰ মাতৃও জন্মৰে পৰাই দৃষ্টিহীন। অতি দৰিদ্ৰ পৰিয়ালত জন্মা শৰ্মিলাই ইমান প্ৰতিকূল পৰিস্থিতিৰ মাজতো পঢ়া-শুনাত সৰুৰে পৰা আছিল অতি চোকা ছাত্ৰী। প্ৰতিটো শ্ৰেণীতে প্ৰথম স্থানত থকা শৰ্মিলাৰ কিন্তু দৰিদ্ৰতাৰ বাবে শিক্ষা জীৱনো দীঘলীয়া নহল। দৰিদ্ৰতাৰ বাবে মাত্ৰ ১৯ বছৰ বয়সতে বিৱাহপাশত আবদ্ধ হবলগীয়া হৈছিল শৰ্মিলা। বিশেষভাৱে সক্ষম কন্যাৰ বাবে বিৱাহৰ বাবে পাত্ৰ আহোতেই কন্যাদান কৰাটো দৰিদ্ৰ পিতৃৰ বাবে তেনেই স্বাভাৱিক কথা। বিৱাহৰ পিছত দুগৰাকীকৈ কন্যা সন্তানৰ মাতৃ হয় শৰ্মিলা। কিন্তু সুৰাপায়ী স্বামীৰ পৰা কোনো দিনেই উচিত সন্মান আৰু মৰ্যাদা পোৱা নাছিল শৰ্মিলাই। স্বামীৰ দৈনিক শাৰীৰিক আৰু মানসিক নিৰ্যাতনৰ বলি হৈছিল শৰ্মিলা ধনখড়। স্বামীৰ নিৰ্যাতন ইমানেই বাঢ়ি গৈছিল যে এদিন সুৰাপায়ী স্বামীয়ে দুই কন্যাসহ শৰ্মিলাক উ*লংগ কৰি ঘৰৰ চৌহদৰ পৰা বাহিৰ কৰি দিছিল। পিছত চুবুৰীয়াই উদ্ধাৰ কৰি নিছিল নিজৰ ঘৰলৈ। এই কথা জানিব পাৰি পিতৃয়ে নিজৰ ঘৰলৈ আনিছিল দুই কন্যাসহ শৰ্মিলাক।

স্কুলীয়া জীৱনত কিছুদিন শ্বটপুট খেলা শৰ্মিলাই এই সময়খিনিত শ্বটপুট খেলবিধৰ বিষয়ে কিছু জ্ঞান আহৰণ কৰাৰ উপৰিও মাজে-সময়ে অনুশীলনো কৰে। জীৱিকা নিৰ্বাহৰ বাবে তেওঁ কিছুদিন বাছত কণ্ডাক্টৰ হিচাপেও কাম কৰিছিল। এই সময়ছোৱাতে অৰিজিত সিঙৰ সৈতে চিনাকি হয়। অৰিজিত সিং পেছাত এজন ৰং মিস্ত্ৰী। অৰিজিত সিঙৰ সৈতে মন মিলাত শৰ্মিলাই দ্বিতীয়বাৰৰ বাবে বিৱাহপাশত আৱদ্ধ হয়। অৰিজিতে শৰ্মিলাৰ দুয়োটি কন্যাকো আকোঁৱালি লয়। দ্বিতীয় বিৱাহৰ পিছত অৰিজিতৰ উৎসাহতে শ্বটপুটৰ প্ৰতি পূৰ্ণৰূপত মনোনিৱেশ কৰে। গ্লাছগ’ কমনৱেল্থ গেমছৰ মাত্ৰ এবছৰ আগতেই শৰ্মিলাৰ পিতৃৰ মৃত্যু হৈছিল। গ্লাছগোত দেশৰ হৈ স্বৰ্ণ জয় কৰাৰ পিছতে শৰ্মিলাই এই সফলতাৰ কৃতিত্ব দিয়ে মাতৃ আৰু তেওঁৰ দ্বিতীয় স্বামী অৰিজিতক। কিন্তু দুখৰ বিষয় এয়েই যে শৰ্মিলাৰ পৰিয়ালটোৰ এতিয়াও নাই এটা স্থায়ী বাসস্থান। এটা সৰু ভাৰাঘৰত থাকিয়েই জীৱন অতিবাহিত কৰিছে এইগৰাকী খেলুৱৈয়ে। দেশৰ হৈ স্বৰ্ণ জয় কৰাৰ পিছতে তেওঁ হাৰিয়ানা চৰকাৰলৈ এটা স্থায়ী বাসস্থানৰ বাবে কৰিছে অনুৰোধ।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ