কেৱল নিছা নহয়, ৰীল বনোৱাটো তেওঁৰ পেছাও আছিল৷ সেই পেছাই প্ৰাণ ল’লে এগৰাকী ইনফ্লুয়েঞ্চাৰৰ৷ মহাৰাষ্ট্ৰৰ ৰায়গড় ওচৰৰ কুম্ভ জলপ্ৰপাতত ৰিল বনাবলৈ গৈছিল ট্ৰেভেল ব্লগাৰ আনভি কামদাৰে৷ শ্বুটিঙৰ সময়ত এটা দ খাৱৈত পৰি মৃত্যু হ’ল মুম্বাইৰ এইগৰাকী ইনফুয়েঞ্চাৰৰ৷ ২৬ বছৰ বয়সীয়া এই ইনষ্টাগ্ৰাম ইনফ্লুয়েন্সাৰ তেওঁৰ ট্ৰেভেল ব্লগসমূহৰ বাবে বেছ জনপ্ৰিয় আছিল৷ লাইক, কমেণ্ট, শ্বেয়াৰৰ নিছাতেই আকৌ এটি নতুন ৰিল ভিডিঅ’ শ্বুট কৰিবলৈ ৰায়গড়ৰ কুম্ভ জলপ্ৰপাতৰ কাষলৈ গৈছিল আনভি কামদাৰ৷ আৰু সেয়াই কাল হ’ল তেওঁৰ বাবে৷ ৰিল ভিডিঅ’ শ্বুটিং কৰাৰ সময়ত ৩০০ ফুট গভীৰ খাৱৈত পৰি যায় আনভি৷
ইনষ্টাগ্ৰাম ইনফ্লুয়েঞ্চাৰ আনভি কামদাৰে বিগত ১৬ জুলাইত কুম্ভ জলপ্ৰপাতলৈ গৈছিল৷ তেওঁৰ সৈতে আছিল অইন ৭গৰাকী বন্ধু৷ বুধবাৰে পুৱা ১০.৩০ মিনিটত ঘটে মৰ্মান্তিক ঘটনা৷ ৰিল ভিডিঅ’ শ্বুট কৰাৰ সময়তে হঠাৎ পিছলি পৰে আনভি৷ স্থানীয় কৰ্তৃপক্ষই দ্ৰুত পদক্ষেপ গ্ৰহণ কৰি উদ্ধাৰকাৰী দলক ফোন কৰে৷ লগে লগেই সেই স্থানত উদ্ধাৰকাৰী দলৰ লোক উপস্থিত হৈ অভিযান চলায়৷ অভিযানত পৰি যোৱাৰ ৬ঘণ্টা পাছত জীৱন্তে উদ্ধাৰ হয় আনভি৷ এগৰাকী উদ্ধাৰকাৰী দলৰ সদস্যই এই অভিযানৰ বিষয়ে কয়, ‘আমি ঘটনাস্থলত উপস্থিত হৈয়েই দ্ৰুততৰভাৱে অভিযান চলাও৷ তেতিয়ালৈকে আমি গম পাইছিলো যে যুৱতীগৰাকী ৩০০-৩৫০ ফুট তলত পৰি গৈছে৷ ইমান তলত তেওঁৰ কাষত গৈ পোৱাটো আমাৰ বাবে এক প্ৰত্যাহ্বান হৈ পৰিছিল৷ প্ৰচণ্ড বৃষ্টিপাতে উদ্ধাৰকাৰ্যত সমস্যাৰো সৃষ্টি কৰিছিল৷ এটা উলম্ব কপিকল ব্যৱহাৰ কৰি তেওঁক আমি বাহিৰলৈ উলিয়াই আনিছো৷’
আনভিক জীৱিত অৱস্থাতেই উদ্ধাৰ কৰে উদ্ধাৰকাৰী দলে৷ উদ্ধাৰকাৰী দলে জনোৱামতে দ খাৱৈত পৰি যোৱাৰ সময়ত তেওঁৰ শৰীৰৰ বিভিন্ন স্থানত গুৰুতৰ আঘাত লাগিছিল৷ লগে লগেই তেওঁক মহকুমা হাস্পতালত ভৰ্তি কৰোৱা হয়৷ হাস্পতালতেই মৃত্যুক সাৱটি লয় আনভিয়ে৷ আনভিৰ মৃত্যুৰ পাছতেই কুম্ভ জলপ্ৰপাতত পৰ্যটকক লৈ বিশেষ নিৰ্দেশনা জাৰি কৰিছে আৰক্ষীয়ে৷ সকলোকে একেবাৰে কাষলৈ নাযাবৰ বাবে আহ্বান জনাইছে প্ৰশাসনে৷ জীৱনক বিপন্ন কৰি কোনো কাম কৰা অনুচিত বুলিও সঁকীয়াই দিছে প্ৰশাসনে৷ আনভিৰ মৃত্যুত এতিয়া সামাজিক মাধ্যমত গভীৰ শোক প্ৰকাশ কৰা দেখা গৈছে তেওঁৰ অনুৰাগীসকলক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
