কংগ্ৰেছৰ উপসভাপতি তথা লোকসভাৰ সাংসদ ৰাহুল গান্ধীৰ বিৰুদ্ধে প্ৰায় ১০০০ খন এজাহাৰ দাখিল কৰিছে অসম ৰাজ্যিক বিজেপিয়ে৷
সংবাদ সংস্থা এনআইএ-এ প্ৰকাশ কৰা অনুসৰি ভাৰতখন কেৱল গুজৰাটৰ পৰা পশ্চিমবংগলৈ বিদ্যমান বুলি অভিহিত কৰি ৰাহুল গান্ধীয়ে টুইট কৰাৰ অভিযোগ কৰি বিজেপিয়ে কংগ্ৰেছ নেতাগৰাকীৰ বিৰুদ্ধে দেশদ্ৰোহৰ অভিযোগ দাখিল কৰিছে৷
বিজেপিৰ অভিযোগ যে ৰাহুল গান্ধীয়ে গুজৰাটৰ পৰা পশ্চিমবংগলৈ ভাৰতখন বিদ্যমান বুলি কৈ অসমসহ উত্তৰ পূৰ্বাঞ্চলক ভাৰতৰ অংগ নহয় বুলি ক’ব খুজিছে৷ বিজেপিৰ এক সূত্ৰই দাবী কৰিছে যে ৰাহুল গান্ধীয়ে অৰুণাচল প্ৰদেশসহ উত্তৰ পূৰ্বাঞ্চলক উপেক্ষা কৰি চীনৰ অংগ বুলি কৰা দাবীক স্বীকাৰ কৰিব খুজিছে৷ আৰু ই একপ্ৰকাৰে দেশদ্ৰোহ বুলিও অভিহিত কৰিছে বিজেপিৰ সূত্ৰটোৱে৷
এই অভিযোগ উত্থাপন কৰিয়ে অসম ৰাজ্যিক বিজেপিয়ে কংগ্ৰেছ নেতাগৰাকীয়ে ৰাজ্যজুৰি প্ৰায় ১০০০ খন এজাহাৰ দাখিল কৰিছে৷
উল্লেখ্য যে যোৱা ১০ ফেব্ৰুৱাৰিত সাংসদ ৰাহুল গান্ধীয়ে এক টুইট কৰিছিল৷ উক্ত টুইটত ৰাহুল গান্ধীয়ে বৈচিত্ৰৰ মাজতো ভাৰত কেনেকৈ ঐক্য তাৰ উদাহৰণ দি বুজাবলৈ চেষ্টা কৰিছিল৷
ৰাহুল গান্ধীয়ে লিখিছিল, ‘‘ঐক্যই হৈছে আমাৰ সংঘীয় শক্তি৷ আমাৰ সংস্কৃতি, আমাৰ বৈচিত্ৰতা, আমাৰ ভাষাসমূহ, আমাৰ মানুহ, আমাৰ ৰাজ্যসমূহেই হৈছে ভাৰতৰ মূল চালিকা শক্তি৷’’ ইয়াৰ পিছতে ৰাহুলে উপমাৰে বুজাবলৈ গৈ লিখে, ‘‘কাশ্মীৰৰ পৰা কেৰালাকৈ, গুজৰাটৰ পৰা পশ্চিম বংগলৈকে ভিন্নৰঙী ভাৰতখন অতি মনোমোহা৷ অনুগ্ৰহ কৰি ইয়াক কেতিয়াও অপমান নকৰিব৷’’
এই টুইটৰ পিছতে অসম, ত্ৰিপুৰা, মণিপুৰ আদি উত্তৰ পূৰ্বাঞ্চলৰ বিজেপি মুখ্যমন্ত্ৰীসকলে ৰাহুল গান্ধীৰ টুইটত অসমসহ উত্তৰ পূৰ্বাঞ্চলক উল্লেখ নকৰা বিষয়টো টুইটৰ যোগে দৃষ্টিগোচৰ কৰি কংগ্ৰেছ নেতাগৰাকীয়ে উত্তৰ পূৰ্বাঞ্চলক উপেক্ষা কৰাৰ অভিযোগ কৰিছে৷
বিজেপিয়ে ৰাহুল গান্ধীয়ে অসমসহ উত্তৰ পূৰ্বাঞ্চলক এইদৰে উপেক্ষা কৰি চীনে এই সমগ্ৰ অঞ্চলটোক নিজৰ বুলি কৰি অহা দাবীক মান্যতা দিয়া বুলি গুৰুতৰ অভিযোগ উত্থাপন কৰিছে৷
এই বিষয়ে প্ৰতিক্ৰিয়া প্ৰকাশ কৰি অসমৰ মুখ্যমন্ত্ৰী ডঃ হিমন্ত বিশ্ব শৰ্মাই ৰাহুল গান্ধীক প্ৰশ্ন কৰি কয় ভাৰত কেৱল এক সংঘ নহয়। এক ৰাষ্ট্ৰ হিচাপে গৌৰৱান্বিত। আপোনাৰ টুকড়ে টুকড়ে গেঙৰ দৰ্শনত বন্দী নহয়৷ ৰাষ্ট্ৰ, ৰাষ্ট্ৰীয়তা আৰু ৰাষ্ট্ৰীয়তাবাদৰ লৈ সৈতে আপোনাৰ সমস্যা কি? বংগৰ পিছত আমি উত্তৰ পূৰ্বাঞ্চল দেশৰ বাহিৰত নেকি?
ত্ৰিপুৰা আৰু মণিপুৰৰ মুখ্যমন্ত্ৰী বিপ্লৱ কুমাৰ দেৱ আৰু এন বীৰেণ সিঙেও ৰাহুল গান্ধীৰ এই টুইটৰ তীব্ৰ বিৰোধিতা কৰিছে৷
ইয়াৰ পিছতে অসম ৰাজ্যিক বিজেপিৰ সূত্ৰই কংগ্ৰেছ নেতা ৰাহুল গান্ধীৰ বিৰুদ্ধে ১০০০ খন এজাহাৰ দাখিল কৰিছে বুলি প্ৰকাশ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
