অসম লাইভ২৪ঃ UPI ৰ জগতত আহিব এইবাৰ বিৰাট পৰিবৰ্তন। মুহূৰ্ততেই লেনদেনৰ কৰিব পৰা যি সুবিধা বৰ্তমানলৈকে UPI ব্যৱহাৰকাৰীয়ে লাভ কৰি আহিছে তাৰ কিছু সালসলনি অনাৰ কথা ঘোষণা কৰিছে কেন্দ্ৰই। কাৰণ UPI লেনদেনত ৪ঘণ্টাৰ সময়সীমা ঠিক কৰিবলৈ আগবাঢ়িছে কেন্দ্ৰ। কিন্তু এই ৪ঘণ্টাৰ সময়সীমা প্ৰকৃততে কি?
একাধিক মিডিয়া ৰিপৰ্টৰ দাবী যে ২০০০টকাতকৈ বেছি পৰিমাণৰ অৰ্থ লেনদেন কৰিবলৈ এতিয়াৰে পৰা ৪ঘণ্টাতকৈ বেছি সময় লাগিব। এই নিয়ম সকলো UPI ট্ৰেন্সফাৰৰ বাবেই প্ৰযোজ্য হ’ব। প্রথমবাৰ ২০০০ টকাতকৈ বেছি লেনদেন কৰা ব্যৱহাৰকাৰীৰ বাবে এই নিয়ম প্ৰযোজ্য হ’ব। মূলত অনলাইন প্ৰতাৰণাৰ সমস্যা দূৰ কৰিবলৈকে এই সিদ্ধান্ত গ্ৰহণ কৰিছে কেন্দ্ৰীয় চৰকাৰে। UPI অধিকাৰীসকলৰ সৈতে এই বিষয়ে আলোচনাও আৰম্ভ কৰিছে কেন্দ্ৰই। এই পদক্ষেপত UPI ব্যৱহাৰকাৰীৰ কিছু সমস্যা পোনতে হ’লেও অনলাইন পেমেণ্টৰ জালিয়াতি কিছু পৰিমাণে ৰোধ হ’ব বুলি জনাইছে কেন্দ্ৰই।
এই নিয়ম প্ৰযোজ্য হ’লে UPI-ত আহিব ৪ঘণ্টাৰ এটা উইণ্ড। এই উইণ্ডই কেনেকৈ কাম কৰিব? এই নতুন নিয়মৰ আওঁতাত ফোন পে, গুগল পে, পেটিএম আদি UPI-ব্যৱহাৰকাৰীয়ে তাৎক্ষণিকভাৱে কোনো অচিনাকী ব্যক্তিলৈ UPI-একাউণ্টেৰে ২০০০ টকাতকৈ বেছি ধনৰ লেনদেন কৰিব নোৱাৰিব। ইয়াৰবাবে ৪ঘণ্টাতকৈয়ো বেছি সময় লাগিব। যিসকলে দীৰ্ঘদিন ধৰি UPI-লেনদেন কৰি আছে তেওঁলোকৰ বাবে এই সমস্য নহয়। কেৱল অচিনাকী নম্বৰত পঠিয়াওতেহে এই সমস্যাই দেখা দিব।
বৰ্তমান UPI-ট্ৰেন্সফাৰ তাৎক্ষণিক। এটা নতুন UPI-আই ডি তৈয়াৰ কৰিলে প্ৰথম ২৪ ঘণ্টাত আপুনি সৰ্বাধিক ৫০০০টকা অন্য ব্যক্তিক পঠিয়াব বাবে। আই ডি ২৪ ঘণ্টাতকৈ পুৰণি হ’লে লেনদেনৰ সৰ্বোচ্চ সীমা ১লাখ টকাতকৈ বেছি কৰিব পাৰিব। এই পৰিমাণ অৱশ্যে বেংক অনুযায়ী ভিন্ন হয়। মঙলবাৰে অনুষ্ঠিত হোৱা বৈঠকত ৰিজাৰ্ভ বেংক অৱ ইণ্ডিয়াৰ প্ৰতিনিধিসকলো উপস্থিত আছিল। বিষয়টো বৰ্তমানো আলোচনা পৰ্যায়তেই আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
