বিপাকৰ বাংলাদেশৰ মহম্মদ ইউনূছৰ অন্তৰ্বৰ্তিকালীন চৰকাৰ৷ আমেৰিকাৰ আন্তৰ্জাতিক উন্নয়ন সংস্থাৰ পৰা যি সাহায্য ইমানদিন বাংলাদেশে পাই আছিল সেয়া বন্ধ কৰা হ’ল৷ ক্ষমতালৈ অহাৰ পাছত কেইবাটাও নিৰ্দেশনা জাৰি কৰিছে প্ৰেছিডেণ্ট ড’নাল্ড ট্ৰাম্পে৷ তাৰপিছতেই বন্ধ কৰা হৈছে বাংলাদেশৰ আৰ্থিক সাহায্য৷ শনিবাৰে এক বিজ্ঞাপ্তি জাৰি কৰি সেই কথা জনাইছে আমেৰিকা যুক্তৰাষ্ট্ৰই৷
বাংলাদেশৰ সৈতে চুক্তি, প্ৰকল্প বাতিল কৰাৰ নিৰ্দেশ দিছে৷ ইউনূছৰ সৈতে ট্ৰাম্পৰ সম্পৰ্ক এনেও খুব এটা মধুৰ নহয়৷ ইয়াৰ প্ৰভাৱতেই আমেৰিকাৰ নতুন চৰকাৰে এই সিদ্ধান্ত লৈছে নেকি সেই প্ৰশ্নও উত্থাপিত হৈছে৷ প্ৰায় ৫০ বছৰ ধৰি বাংলাদেশক জনস্বাস্থ্য, শিক্ষা, ইন্ধন, পৰিবেশ, খাদ্য, প্ৰাকৃতিক দুৰ্যোগ মোকাবিলাসহ আৰু বিভিন্ন ক্ষেত্ৰত আৰ্থিক সাহায্য দি আছিল আমেৰিকাই৷ বাংলাদেশৰ সংবাদমাধ্যমৰ দাবী যে ৮০০ কোটি ডলাৰ, ভাৰতীয় মুদ্ৰাত প্ৰায় ৬৮ হাজাৰ কোটি টকা সাহায্য দিছে আমেৰিকাই৷ এইবাৰ সেই সাহায্যই বন্ধ কৰিলে ট্ৰাম্প চৰকাৰে৷
বিগত ২৪ জানুৱাৰীত ইজৰাইল আৰু মিছৰ এৰি প্ৰায় সকলো দেশতেই আৰ্থিক সাহায্য বন্ধ কৰি দিছে ট্ৰাম্পৰ প্ৰশাসনে৷ আমেৰিকাৰ বিদেশ সচিব মাৰ্কো ৰুবিয়ে জনাইছে যে নতুনকৈ সাহায্যৰ বিষয়সমূহ অনুমোদিত নোহোৱা পৰ্যন্ত এই সাহায্য দিয়া নহ’ব৷ আগন্তুক ৮৫ দিনৰ মাজত বিদেশত সহায়তাৰ বিষয়সমূহ পৰ্যালোচনা কৰা হ’ব৷ তাৰপাছতেই এই বিষয়টোক লৈ পৰবৰ্তী সিদ্ধান্ত ল’ব ট্ৰাম্প চৰকাৰে৷
আৰ্থিক সহায়তা বন্ধ কৰাক লৈ আমেৰিকাৰ তৰফৰ পৰা বিশদভাৱে আৰু কিছু জনোৱা হোৱা নাই৷ প্ৰচাৰৰ সময়তেই ট্ৰাম্পে প্ৰতিশ্ৰুতি দিছে, ‘তেওঁ ক্ষমতাত আহিলে আমেৰিকাত প্ৰথম নীতি গ্ৰহণ কৰা হ’ব৷’ সূত্ৰৰ খবৰত সেই নীতিৰ অধীনতেই এই সিদ্ধান্ত লৈছে ট্ৰাম্প চৰকাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
