অসম লাইভ ২৪ঃ ওৰ পৰাৰ দিশে ডিম্পল হত্যাকাণ্ডৰ ৰহস্য৷ হত্যাকাণ্ডৰ ৪৮ ঘণ্টাৰ ভিতৰতেই আংশিক সফলতা আৰক্ষীৰ৷ আটকাধীন আশীষৰ বন্ধুৰ বাৰোৱাৰীস্থিত বাসগৃহৰ পৰা উদ্ধাৰ হত্যাকাৰী ডিম্পলৰ মোবাইল ফোন৷ হত্যাকাণ্ডৰে জড়িত থকাৰ সন্দেহত ৩ জনক আটক মহানগৰ আৰক্ষীৰ৷ আৰক্ষীৰ জালত তিনি হত্যাকাৰী ক্ৰমে আশীষ গুপ্তা, কৰণ আৰু জিতুমণি৷ বুধবাৰে উজান বজাৰত দিনদুপৰতে কিশোৰী ডিম্পল কুমাৱটক নৃশংসভাৱে হত্যা কৰিছিল ৩জন যুৱকে৷ হত্যাকাণ্ডৰ ঘটনাৰ দিনাই বুধবাৰে সন্ধিয়া ৩ অভিযুক্তক আটক কৰি আনে লতাশিল আৰক্ষীয়ে৷ ৩ অভিযুক্তৰ ওপৰত জেৰা অব্যাহত আছে৷ লতাশিল আৰক্ষী থানাৰ সন্মুখত স্থানীয় লোকৰ তীব্ৰ প্ৰতিবাদ৷ ফাষ্ট ট্ৰেক আদালতৰ জৰিয়তে বিচাৰ প্ৰক্ৰিয়া সম্পন্ন কৰি শাস্তিৰ প্ৰদানৰ দাবী তোলে প্ৰতিবাদকাৰীয়ে৷ মূল অভিযুক্ত আশীষ গুপ্তা ডিম্পলৰ সম্পৰ্কীয় ভাতৃ৷ সম্পৰ্কীয় ভাতৃ আশীষ গুপ্তা ২০ দিনমান পূৰ্বে ডিম্পলৰ ঘৰত থকাকৈ আহিছিল৷ আশীষ গুপ্তা ডিম্পলৰ মাতৃৰ জ্যেষ্ঠ ভগ্নীৰ পুত্ৰ৷ অৰ্থাৎ ডিম্পলৰ জেঠায়েকৰ পুত্ৰ৷ আশীষে হেনো ৫ লাখ টকা ঘৰৰ পৰা চুৰি কৰিছিল৷ সেই বাবে পিতৃ-মাতৃয়ে ঘৰৰ পৰা একপ্ৰকাৰে খেদি পঠিয়াইছিল৷ তাৰ পাছত আহি ডিম্পলৰ আন এগৰাকী জেঠায়েকৰ ঘৰত থাকিবলৈ লয়৷ তাৰ পাছত আশীষে মাহীয়েক অৰ্থাৎ ডিম্পলৰ মাতৃৰ ঘৰত থাকিবলৈ লয় ২০ দিন মান পূৰ্বৰে পৰা৷ স্থানীয় লোকৰ ভাষ্য অনুসৰি আশীষ ড্ৰাগছ এডিক্ট, ভঙুৱা এজন উদণ্ড যুৱক ৷হত্যাকাণ্ডৰ কথা পোহৰলৈ অহাৰ পাছত আশীষ হেনো ফাৰ্মাচীলৈ গৈছিল বেণ্ডেড কিনিবলৈ৷ আশীষৰ হাত-কাপোৰ হেনো আছিল তেজেৰে লুটুৰি পুতুৰি৷ ঘটনাৰ দিনা পুৱা চাৰে দহ বজাত পিতৃয়ে ডিম্পলৰ মোবাইলত ফোন কৰিছিল৷ ৰিচিভ কৰিছিল আশীষে আৰু ডিম্পলে গা ধুবলৈ যোৱা বুলি কৈছিল৷ ডিম্পলে সেই সময়ত কেতিয়াও গা নোধোৱে বাবে পিতৃৰ সন্দেহ ওপজে আশীষৰ কথাত৷ কৰণ আৰু জিতুমণি দুয়োজন আশীষৰে অধিক হলি-গলি থকাৰ সন্দেহত আটক কৰিছে আৰক্ষীয়ে৷ কিন্তু আশীষেই হত্যাকাৰী বুলি চুবুৰীয়াৰ সন্দেহ৷ ইপিনে আৰু এটা গুৰুত্বপূৰ্ণ ক্লু পাইছে আৰক্ষীয়ে৷ দিনৰ ১১.২০ বজাত আশীষে ফোন কৰিছিল বন্ধু কৰণক৷ কৰণক ফোন কৰিছিল প্ৰেমিকা মমতা দাসৰ মোবাইলৰ পৰা৷ ১ মিনিট ২০ ছেকেণ্ড কৰণেৰে কথা পাতিছিল আশীষে৷ ফোনত কথা পতাত মমতাৰ মোবাইল ফোনটো ব্যৱহাৰ হোৱা বাবে লতাশিল আৰক্ষীয়ে মমতাৰ ওপৰত জেৰা অব্যাহত ৰাখিছে তেওঁৰ ঘৰতে৷ শীঘ্ৰে মমতাও আটক হ’ব পাৰে৷ ইপিনে মৰণোত্তৰ পৰীক্ষাৰ পাছত পৰিয়ালৰ লোকক ডিম্পলৰ মৃতদেহ চমজাই দিয়া হৈছে৷ ডিম্পলৰ মৃতদেহক লৈ উজান বজাৰত এক শোকাকুল পৰিৱেশ৷ হিয়াধুনি কান্দিছে পিতৃ-মাতৃয়ে৷ নৱগ্ৰহ শ্মশানত পঞ্চভূতত বিলীন ডিম্পল৷ বুধবাৰে উজান বজাৰত নিজ বাসগৃহতে অকলশৰে থকা অৱস্থাত ছুৰীৰে খুচি খুচি, পটাগুটিৰে থেঁতেলিয়াই থেঁতেলিয়াই, প্ৰেছাৰ কুকাৰেৰে কোবাই কোবাই নৃশংসভাৱে হত্যা কৰা হৈছিল কিশোৰী ডিম্পল কুমাৱটক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
