অসম লাইভ ২৪ঃ তেজস্বিতা গ’লগৈ। তেজস্বিতাৰ অকাল বিয়োগে মৰ্মাহত কৰিছে ৰাজ্যবাসীক। এনেকৈ কেনেকৈ আঁতৰি যাব পাৰে তেজস্বিতা? ইমান সপোন, ইমান আশা সকলো নিমিষতেই কেনেকৈ শেষ হ’ব পাৰে? ৰাজ্যবাসীয়ে উত্থাপন কৰিছে প্ৰশ্ন কিন্তু উত্তৰ দিবলৈ তেজস্বিতা এতিয়া কাহানিও উভতি আহিব নোৱাৰা বাটৰ যাত্ৰী। এগৰাকী উদীয়মান শিল্পী এনেকৈ আঁতৰি যোৱাটো অসমৰ সমাজ জীৱনৰ বাবেও বৃহৎ ক্ষতি।
তেজস্বিতাক লৈ লিখা লেখাৰে ভৰি পৰিছে সামাজিক মাধ্যম। এদিন লতাশিল বিহুত তাই নাচিব, কেৱল অসমতেই তাই নিজকে সীমাবদ্ধ কৰি ৰাখিব খোজা নাছিল। সপোন দেখিছিল এদিন ইণ্ডিয়ান আইডলত অসমৰ নাম উজলাই তুলিব। কিন্তু সেই সপোনবোৰক বাস্তৱ ৰূপ দিবলৈ তেজস্বিতা আৰু এই পৃথিৱীত নাই। তেজস্বিতাৰ খুবেই ঘনিষ্ঠ এগৰাকী ব্যক্তিয়ে সামাজিক মাধ্যমত লিখিছে তেজস্বিতাৰ সপোনৰ কথা। সংগীতক লৈ তেজস্বিতাই কৰা পৰিকল্পনাৰ কথা। অহা ৮ অক্টোবৰত মাজুলীৰ এখন বিশেষ মিউজিক স্কুলৰ পৰা তেজস্বিতাই ডিগবৈত অনুষ্ঠান কৰিবলৈ যোৱাৰ কথা। ২ অক্টোবৰলৈ অনুশীলনত আহি থকা তেজস্বিতাই এনেকৈ বিদায় মাগিব নোৱাৰে। তাইৰ ৰোগৰ চিকিৎসা নাছিল নে? গাড়ীত প্ৰিয় বান্ধৱীৰে কাষৰ চিটত বহি ডিগবৈ যোৱাৰ পৰিকল্পনা কৰা তেজস্বিতাক লৈ এই মন্তব্য কৰিছে তেওঁৰ এগৰাকী ঘনিষ্ঠ ব্যক্তিয়ে।
মাজুলীৰ স্বাস্থ্যখণ্ডৰ অৱস্থা সঁচাকৈয়ে এতিয়াও বহু পিছপৰা নেকি এই বিষয় বিলাকো তেজস্বিতাৰ মৃত্যুৰ পিছতেই চৰ্চালৈ আহিছে। মাজুলীৰ স্বাস্থ্যখণ্ডৰ দুৰাৱস্থা এতিয়াও আছেনে? ২০১৮ চনত বৰ্তমানৰ মুখ্যমন্ত্ৰী তেতিয়াৰ স্বাস্থ্যমন্ত্ৰী ডঃ হিমন্ত বিশ্ব শৰ্মাই মাজুলীৰ শ্ৰী শ্ৰী পীতাম্বৰ দেৱ অসামৰিক চিকিৎসালয় পৰিদৰ্শন কৰিছিল। পৰিদৰ্শন কৰিয়েই তেতিয়াৰ স্বাস্থ্যমন্ত্ৰী শৰ্মাই টুইটত লিখিছিল মাজুলীৰ অত্যাধুনিক ব্যৱস্থা সম্পন্ন চিকিৎসালয়খনৰ কথা। উন্নত সকলো সা-সুবিধাই চিকিৎলালয়খনত কৰাৰ কথাও উল্লেখ কৰিছিল। ২০০ বিছনাযুক্ত এই চিকিৎসালয়খনত ২০১৯-ত পুনৰ অত্যাধুনিক নতুন প্ৰযুক্তি সংযোজনৰ বাবে শিলন্যাস কৰিছিল মাজুলীৰ বিধায়ক তথা তেতিয়াৰ মুখ্যমন্ত্ৰী সৰ্বানন্দ সোণোৱালে। মাজুলীবাসীয়ে আৰু উন্নত চিকিৎসাৰ পৰা বঞ্চিত হ’ব নালাগে তাৰেই ব্যৱস্থা কৰা বুলি বাৰে বাৰে ভাষণত উল্লেখ কৰিছিল মাজুলীৰ বিধায়ক সৰ্বানন্দ সোনোৱালেও। কথাবোৰ আগবাঢ়িল মাজুলীও নদী দ্বীপৰ পৰা জিলালৈ ৰূপান্তৰ হ’ল। মাজুলী-নিমাতী সংযোগী দলঙৰ কামো আৰম্ভ হ’ল। আমাৰ সকলোৰে মনত ধাৰণাও আহিল নাই মাজুলী আৰু পৰিত্যক্ত নহয়। মাজুলীবাসীয়ে প্ৰকৃত উন্নয়ন দেখিছে। মাজুলী অসমৰ মূল-ভুখণ্ডৰ সৈতে কোনোক্ষেত্ৰতেই পিছপৰা নহয়। তেজস্বিতাৰ মৃত্যুৱে আকৌ এবাৰ এই ধাৰণাক যেন ভুল প্ৰমাণিত কৰিলে। মাজুলী আজিও পৰিত্যক্তই সেই কথা পুনৰবাৰ তেজস্বিতাৰ মৃত্যুৱে যেন উদঙাই দিলে। এটা অক্সিজেন চিলিণ্ডাৰো কিয় সেই অত্যাধুনিক চিকিৎসালয়ত তেজস্বিতাৰ বাবে নোলাল? আইচিইউ-ৰ ব্যৱস্থা সঁচাকৈয়ে নাইনে? সামাজিক মাধ্যমত উত্থাপিত কেতবোৰ প্ৰশ্নৰ উত্তৰ কোনে দিব?
মৃত্যু কাৰ কেতিয়া কেনেকৈ আহে কোনেও নাজানে! কিন্তু তেজস্বিতাৰ মৃত্যু জানো হঠাতেই হৈছিল? পৰিয়ালৰ লোকে জনোৱা অনুসৰি অচেতন তেজস্বিতাক তাৎক্ষণিকভাৱে চিকিৎসালয়লৈ লৈ যোৱা হৈছিল। চিকিৎসালয়ত ভৰ্তি কৰোৱাৰ লগে লগেই তেজস্বিতাক প্ৰাথমিক চিকিৎসা প্ৰদান কৰিছিল এগৰাকী চকু চিকিৎসকে। তাৰ পিছতেই উশাহ-নিশাহ লোৱাত কষ্ট হোৱা স্বত্বেও তেজস্বিতাক তাৎক্ষণিকভাৱে প্ৰদান কৰা নাছিল অক্সিজেন মাস্ক। দিয়া হোৱা নাছিল আইচিইউ কেবিন। পৰিয়ালৰ এই ভাষ্যৰ পিছতেই চিকিৎসালয়খনৰ অধীক্ষকক তাৎক্ষণিকভাৱে নিলম্বন কৰা হৈছে। এই নিলম্বনেই প্ৰমাণ কৰিছে এতিয়াও মাজুলীত চিকিৎসাৰ নামত চলি থকা গাফিলতিৰ কথা।
মাজুলীবাসীয়ে তেজস্বিতাৰ বাবেই ন্যায় বিচাৰিছে এনে নহয়। মাজুলীৰ প্ৰত্যেকগৰাকী ব্যক্তিৰেই জীৱনৰ সুৰক্ষা বিছাৰিছে মাজুলীবাসীয়ে। তেজস্বিতাৰ মৃত্যুৰ সঠিক তদন্তত এতিয়া মুখ্যমন্ত্ৰীগৰাকীৰো হস্তক্ষেপ বিচাৰিছে মাজুলীবাসীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
