মুখৰ পৰা দুৰ্গন্ধ ওলোৱা সমস্যাটো আজিৰ সমাজত বহু লোকৰ মাজত দেখা যায়। ই সাধাৰণতে কোনো এটা বিশেষ বেমাৰ নহয়, কিন্তু ই বিভিন্ন মুখ-দাঁত, খাদ্যাভ্যাস বা দেহৰ ভিতৰৰ সমস্যাৰ লক্ষণ হ’ব পাৰে। চিকিৎসা বিজ্ঞানত ইয়াক Halitosis বুলি কোৱা হয়। এই সমস্যাই ব্যক্তিৰ আত্মবিশ্বাস কমাই দিব পাৰে আৰু ৰাজহুৱা স্থানত আপোনাক অস্বস্তিত পেলাব পাৰে। সেয়ে ইয়াৰ কাৰণ আৰু সমাধান ভালদৰে বুজি লোৱা অতি প্ৰয়োজনীয়।
মুখৰ দুৰ্গন্ধৰ মুখ্য কাৰণসমূহ কি কি?
মুখৰ দুৰ্গন্ধৰ মুখ্য কাৰণসমূহৰ ভিতৰত আটাইতকৈ সাধাৰণ কাৰণ হৈছে মুখৰ অস্বচ্ছতা। যদি নিয়মিতভাৱে দাঁত ব্ৰাছ নকৰিলে দাঁতৰ মাজত খাদ্যৰ কণিকা জমা হৈ থাকে আৰু সেইবোৰ বেক্টেৰিয়াই ভাঙি দুৰ্গন্ধ সৃষ্টি কৰে। বিশেষকৈ জিভা পৰিষ্কাৰ নকৰিলে বেক্টেৰিয়া বেছি পৰিমাণে জমা হয় আৰু মুখৰ দুৰ্গন্ধ বাঢ়ে। দাঁতৰ পোক বা কেভিটি আৰু মাড়িৰ ৰোগ যেনে gingivitis বা periodontitis থাকিলেও মুখৰ পৰা দুৰ্গন্ধ ওলায়। এইবোৰ অৱস্থাত দাঁত আৰু মাড়িত বেক্টেৰিয়াৰ সক্ৰিয়তা বাঢ়ি যায়। জিভাৰ ওপৰত ময়লা বা পাতল স্তৰ জমা হোৱাটোও মুখৰ দুৰ্গন্ধৰ এটা গুৰুত্বপূর্ণ কাৰণ। ইয়াৰ উপৰি মুখ শুকাই যোৱা অৰ্থাৎ লেলেৱাতি কমি যোৱা অৱস্থাত বেক্টেৰিয়া সহজে বৃদ্ধি পায়, কাৰণ লেলাৱতিয়ে মুখৰ ভিতৰখন পৰিষ্কাৰ কৰি ৰাখে। ইয়াৰ উপৰিও খাদ্যাভ্যাসো মুখৰ দুৰ্গন্ধৰ অন্যতম কাৰণ হ’ব পাৰে। পিঁয়াজ, নহৰু, মছলাযুক্ত খাদ্য, জাংক ফুড আদিয়ে মুখj দুৰ্গন্ধ সৃষ্টি কৰিব পাৰে। ধূমপান, গুটখা বা তামোল সেৱন কৰা লোকৰ ক্ষেত্ৰত এই সমস্যা অধিক দেখা যায়। ইয়াৰ উপৰি পেটৰ গেছ, এচিডিটি বা হজমৰ সমস্যা থাকিলেও মুখৰ পৰা দুৰ্গন্ধ আহিব পাৰে।
মুখৰ দুৰ্গন্ধ পৰা কেনেকৈ পৰিত্ৰাণ পাব?
এই সমস্যাৰ পৰা মুক্তি পাবলৈ ঘৰুৱা যত্ন অতি প্ৰয়োজনীয়। নিয়মিতভাৱে দিনত কমেও দুবাৰ দাঁত ব্ৰাছ কৰিব লাগে আৰু ফ্লুৰাইডযুক্ত টুথপেষ্ট ব্যৱহাৰ কৰা উচিত। জিভা পৰিষ্কাৰ কৰাটো অতি গুৰুত্বপূর্ণ, কিয়নো জিভাৰ ওপৰত থকা বেক্টেৰিয়াই মুখৰ দুৰ্গন্ধৰ অন্যতম মুখ্য কাৰণ। গৰম পানীত নিমখ মিহলাই কুলা কৰিলে মুখৰ বেক্টেৰিয়া কমে আৰু দাঁত-মাড়ি সুস্থ থাকে। দিনত পৰ্যাপ্ত পৰিমাণে পানী খোৱা অভ্যাস গঢ়ি তুলিব লাগে, কাৰণ পানীৰ অভাৱত মুখ শুকাই যায় আৰু দুৰ্গন্ধ বাঢ়ে। তুলসী পাত, পুদিনা বা লৱং চোবাই খোৱাটোও উপকাৰী, কিয়নো এইবোৰে মুখ সতেজ কৰি বেক্টেৰিয়া কমায়। খাদ্যাভ্যাসত সেউজীয়া শাক-পাচলি আৰু ফলমূল বেছি খোৱা উচিত আৰু পিঁয়াজ-নহৰু বা জাংক ফুড কমাব লাগে। দহি (curd) খোৱাও উপকাৰী, কাৰণ ইয়াত থকা ভাল বেক্টেৰিয়াই মুখ আৰু পেটৰ স্বাস্থ্য উন্নত কৰে।
যদি ঘৰুৱা যত্ন লোৱাৰ পাছতো মুখৰ দুৰ্গন্ধ দীৰ্ঘদিন ধৰি থাকে, তেন্তে ই দাঁতৰ গভীৰ ৰোগ বা পেটৰ সমস্যাৰ লক্ষণ হ’ব পাৰে। এনে অৱস্থাত দন্ত চিকিৎসক বা চিকিৎসকৰ পৰামৰ্শ লোৱা উচিত। মুখৰ দুৰ্গন্ধ এক নিয়ন্ত্ৰণযোগ্য সমস্যা। সঠিক দাঁত পৰিষ্কাৰ, স্বাস্থ্যকৰ খাদ্যাভ্যাস আৰু নিয়মিত যত্নৰ জৰিয়তে এই সমস্যাৰ পৰা সহজে মুক্তি পাব পাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
