‘ৰাজ্যৰ সংখ্যালঘু অঞ্চলত হ’ব উন্নয়নৰ ধুমুহা’

লাহৰীঘাটত নিৰ্বাচনী প্ৰতিশ্ৰুতি পূৰণৰ দাবীৰে বিজয় উৎসৱত অংশগ্ৰহণ কৰি মুখ্যমন্ত্ৰী হিমন্ত বিশ্ব শৰ্মাই মুছলমান ৰাইজৰ উন্নয়ন আৰু বিভিন্ন সমস্যা সমাধানৰ আশ্বাস দিয়ে। মুখ্যমন্ত্ৰীগৰাকীয়ে কয় যে সংখ্যালঘু এলেকাসমূহত উন্নয়নৰ ধুমুহা সৃষ্টি কৰা হ’ব। অৰুণোদয় আঁচনিৰ পৰা আৰম্ভ কৰি লাখপতি বাইদেউ আঁচনিলৈকে চৰকাৰী সুবিধাসমূহ যাতে যোগ্য হিতাধিকাৰীয়ে লাভ কৰে, তাৰ ব্যৱস্থা কৰা হ’ব।

মুখ্যমন্ত্ৰীয়ে কয় যে মুছলমান ৰাইজৰ প্ৰতিটো সমস্যা সমাধানৰ বাবে চৰকাৰ প্ৰতিশ্ৰুতিবদ্ধ। ৰাইজে নিজৰ সমস্যাসমূহ স্থানীয় বিধায়ক আৰু সাংসদক জনাব লাগে। তেওঁলোক ৰাইজৰ ঘৰে ঘৰে গৈ সমস্যাৰ বুজ ল’ব। মাটি-বাৰী, ৰাস্তা-ঘাটকে ধৰি বিভিন্ন সমস্যাৰ সমাধানৰ বাবে পদক্ষেপ গ্ৰহণ কৰা হ’ব। মুছলমান মহিলাসকলেও লাখপতি বাইদেউ আঁচনিৰ সুবিধা লাভ কৰি আৰ্থিকভাৱে স্বাৱলম্বী হ’ব পাৰিব বুলি তেওঁ আশ্বাস দিয়ে।

চৰকাৰী আঁচনিৰ সুবিধা লাভৰ ক্ষেত্ৰত দালালৰ প্ৰভাৱ বন্ধ কৰাৰ কথাও উল্লেখ কৰে মুখ্যমন্ত্ৰীয়ে। তেওঁৰ মতে, চৰকাৰী আঁচনিৰ নামত দালালি কৰা লোকসকলক কোনো কাৰণতে ৰেহাই দিয়া নহ’ব। যোগ্য হিতাধিকাৰীয়ে যাতে কোনো মধ্যভোগীৰ সহায় নোলোৱাকৈ আঁচনিৰ সুবিধা লাভ কৰে, তাৰ ওপৰত গুৰুত্ব দিয়া হ’ব।

কংগ্ৰেছ আৰু AIUDFক সমালোচনা কৰি মুখ্যমন্ত্ৰীয়ে কয় যে নিৰ্বাচনৰ সময়ত কংগ্ৰেছে বহু প্ৰতিশ্ৰুতি দিয়ে, কিন্তু নিৰ্বাচনৰ পিছত সেই প্ৰতিশ্ৰুতিসমূহ পাহৰি যায়। ইয়াৰ বিপৰীতে বিজেপিয়ে নিৰ্বাচনৰ সময়ত দিয়া প্ৰতিশ্ৰুতি আখৰে আখৰে পালন কৰে বুলি তেওঁ দাবী কৰে। কথাৰে নহয়, কামেৰে বিজেপিয়ে নিজৰ প্ৰতিশ্ৰুতি প্ৰমাণ কৰে বুলিও মন্তব্য কৰে মুখ্যমন্ত্ৰীগৰাকীয়ে।

কংগ্ৰেছৰ কোনো বিধায়কে যদি ৰাইজৰ ওপৰত দাদাগিৰি কৰে, তেন্তে সেই বিষয়ে চৰকাৰক অৱগত কৰিবলৈও মুখ্যমন্ত্ৰীয়ে আহ্বান জনায়। ৰাইজৰ সমস্যা সমাধানৰ ক্ষেত্ৰত চৰকাৰ সদায় আগবাঢ়ি আহিব বুলি তেওঁ আশ্বাস দিয়ে।

ৰাজ্যত পুনৰ বৃহৎ উচ্ছেদ অভিযানৰ ইংগিত

লাহৰীঘাটৰ সভাত মুখ্যমন্ত্ৰী হিমন্ত বিশ্ব শৰ্মাই উচ্ছেদ অভিযানক লৈও কেইবাটাও গুৰুত্বপূৰ্ণ মন্তব্য কৰে। তেওঁ স্পষ্ট কৰি দিয়ে যে উচ্ছেদৰ ক্ষেত্ৰত চৰকাৰে ধৰ্মৰ ভিত্তিত কোনো বিচাৰ নকৰে। চৰকাৰী ভূমি বা বনাঞ্চল দখল কৰি থাকিলে বেদখলকাৰীৰ বিৰুদ্ধে ব্যৱস্থা গ্ৰহণ কৰা হ’ব। মুখ্যমন্ত্ৰীয়ে কয় যে হিন্দু-মুছলমানৰ মাজত বিভেদ সৃষ্টি কৰাটো চৰকাৰৰ উদ্দেশ্য নহয়। যিয়েই বনাঞ্চল বা চৰকাৰী ভূমি দখল কৰিব, তেওঁৰ বিৰুদ্ধে উচ্ছেদ অভিযান চলিব। মাটি দখল কৰি বহি থকা মাতাব্বৰসকলকো ৰেহাই দিয়া নহ’ব বুলি তেওঁ সকীয়াই দিয়ে।

তেওঁ লগতে কয় যে কোনো লোকৰ যদি বসবাসৰ বাবে মাটিৰ প্ৰয়োজন হয়, তেন্তে চৰকাৰৰ ওচৰত মাটিৰ বাবে আবেদন জনাব পাৰে। চৰকাৰে প্ৰয়োজন অনুসৰি মাটি দিয়াৰ ব্যৱস্থা কৰিব পাৰে। কিন্তু এঠাইৰ পৰা আন ঠাইলৈ গৈ চৰকাৰী ভূমি দখল কৰি বসতি স্থাপন কৰাৰ নীতি কোনো কাৰণতে গ্ৰহণযোগ্য নহ’ব। মুখ্যমন্ত্ৰীৰ এই মন্তব্যই ৰাজ্যত পুনৰ বৃহৎ উচ্ছেদ অভিযান চলোৱাৰ সম্ভাৱনাৰ ইংগিত দিছে। চৰকাৰী ভূমি আৰু বনাঞ্চল বেদখলমুক্ত কৰাৰ ক্ষেত্ৰত চৰকাৰে কঠোৰ পদক্ষেপ গ্ৰহণ কৰিব বুলি তেওঁ স্পষ্ট কৰি দিয়ে।

সামগ্ৰিকভাৱে লাহৰীঘাটৰ সভাত মুখ্যমন্ত্ৰী হিমন্ত বিশ্ব শৰ্মাই সংখ্যালঘু ৰাইজৰ উন্নয়ন, চৰকাৰী আঁচনিৰ সুবিধা, দালালৰ বিৰুদ্ধে ব্যৱস্থা আৰু বেদখলমুক্ত অভিযানৰ বিষয়ে নিজৰ বক্তব্য দাঙি ধৰে। কংগ্ৰেছক তীব্ৰ সমালোচনা কৰাৰ লগতে বিজেপি চৰকাৰে উন্নয়নমূলক কামৰ জৰিয়তে ৰাইজৰ আস্থা লাভ কৰিছে বুলিও তেওঁ দাবী কৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ