তেওঁ চালেনে নাই! কেতিয়া চাব! হোৱাটছএপ ষ্টেটাছত ফটো এখন লগাই বাৰে বাৰে চাইছে ভিউজ। যিগৰাকী বিশেষ ব্যক্তিক উদ্দেশ্য কৰি ষ্টেটাছটো লগোৱা হয় সেই ব্যক্তিগৰাকীয়ে নোচোৱালৈ উগুল-থুগুল লাগি থাকে। ষ্টেটাছটো তেওঁ চোৱাৰ পাছতহে যেন শান্তি! কেতিয়াবা যাক উদ্দেশ্য কৰি ষ্টেটাছ দিয়া হয়, তেওঁ নোচোৱাকৈয়ে ২৪ ঘণ্টা উকলি যায় আৰু উদ্দেশ্য সিদ্ধি নোহোৱাকৈয়ে হোৱাটছএপ ষ্টেটাছটো নাইকীয়া হৈ যায়।
জনপ্ৰিয় মেছেজিং এপ হোৱাটছএপে নিয়মিত অন্তৰালত ইয়াৰ বিভিন্ন ফীচাৰ আপডেট কৰে। শেহতীয়াকৈ হোৱাটছএপে আন এক নতুন আকৰ্ষণীয় ফীচাৰ লৈ আহিছে। হোৱাটছএপ ষ্টেটাছক লৈ এক ফীচাৰ আপডেট কৰিছে হোৱাটছএপে। এতিয়া আপুনি উদ্দেশ্য কৰি দিয়া লোকজনে চাব লাগিব আপোনাৰ হোৱাটছএপ ষ্টেটাছ। ষ্টেটাছত মেনশ্যন কৰাৰ সুবিধা উপলব্ধ কৰিছে হোৱাটছএপে।
হোৱাটছএপৰ নতুন ফীচাৰ আপডেট অনুসৰি ষ্টেটাছত কনটেক্ট মেনশ্যন কৰাৰ সুবিধা উপলব্ধ হ’ব। এই ফীচাৰৰ সহায়ত আপুনি যাক উদ্দেশ্য কৰি হোৱাটছএপ ষ্টেটাছ লগায় তাত তেওঁক মেনশ্যন কৰিব পাৰিব। আপুনি ষ্টেটাছ লগোৱাৰ লগে লগে মেনশ্যন কৰা লোকজনে নটিফিকেশ্যন লাভ কৰিব। সম্প্ৰতি এই ফীচাৰটোৰ ওপৰত পৰীক্ষা-নিৰীক্ষা কৰি থকা হৈছে আৰু শীঘ্ৰেই হোৱাটছএপৰ নতুন আপডেটত ই উপলব্ধ হোৱাৰ সম্ভাৱনা আছে।
হোৱাটছএপৰ নতুন আপডেট সম্পৰ্কীয় খবৰ প্ৰচাৰ কৰা ৱেবচাইট wabetainfo ত এই ফীচাৰৰ কথা উল্লেখ কৰা হৈছে। ২০০ কোটিৰো অধিক লোকে ব্যৱহাৰ কৰা মেছেজিং এপ হোৱাটছএপৰ এই নতুন ফীচাৰে ব্যৱহাৰকাৰীক বেচ আমোদ দিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
