চকলেট সদায় সৰু সৰু বৰ্গাকাৰত কিয় ভাগ কৰা থাকে?

চকলেট খোৱাৰ সময়ত আপুনি নিশ্চয় এটা কথা লক্ষ্য কৰিছে যে প্ৰায় সকলো চকলেটেই সৰু সৰু বৰ্গাকাৰ বা আয়তাকাৰ খণ্ডত বিভক্ত হৈ থাকে। কিন্তু কেতিয়াবা ভাবি চাইছেনে, চকলেট একেবাৰে মসৃণ আৰু সমতলভাৱে কিয় বনোৱা নহয়? আচলতে এই নক্সাটো কেৱল ধুনীয়া দেখুৱাবলৈ কৰা নহয়। ইয়াৰ আঁৰত লুকাই আছে মানুহৰ মনস্তাত্বিক দিশ, বিজ্ঞান, ব্যৱহাৰিক সুবিধা আৰু উৎপাদন প্ৰক্ৰিয়াৰ বহুতো যুক্তিসংগত কাৰণ। আহক, জানো এই বৰ্গাকাৰ খণ্ডসমূহৰ প্ৰকৃত উদ্দেশ্য কি।

প্ৰয়োজনতকৈ অধিক চকলেট খোৱাৰ পৰা বিৰত ৰাখে

মানুহৰ মগজুৱে বহু ক্ষেত্ৰত চকুৰে দেখা বস্তুৰ ওপৰত ভিত্তি কৰিয়েই কিমান খাদ্য খাব লাগে সেয়া নিৰ্ধাৰণ কৰে। বৰ্গতাকৃতিৰ ভাগ নথকা চকলেটৰ ক্ষেত্ৰত সাধাৰণতে অজানিতে আমি গোটেইতো এবাৰতে খাই পেলাব পাৰোঁ কিন্তু বৰ্গাকাৰত ভাগ কৰা চকলেটৰ ক্ষেত্ৰত সাধাৰণতে সেয়া নহয়। শুনিবলৈ আচহুৱা যেন লাগিলেও মনস্তাত্বিক গৱেষণাৰ পিছতে প্ৰায়বোৰ চকলেট এনেদৰে ভাগ ভাগ কৰি প্ৰস্তুত কৰা হৈছে। কিয়নো চকলেটটো যেতিয়া সৰু সৰু টুকুৰাত ভাগ কৰা থাকে, প্ৰতিটো টুকুৰাই মগজুক একোটা ‘ষ্টপ ছিগনেল’ দিয়ে। ফলত কেইটামান টুকুৰা খোৱাৰ পিছতেই বহুতে সহজে ৰৈ যাব পাৰে আৰু অতিৰিক্ত চকলেট খোৱাৰ আশংকা কমে।

আনৰ সৈতে সহজে ভাগ-বটোৱাৰা কৰিব পাৰি

চকলেটৰ আনন্দ কেৱল অকলে নহয়, আপোনজনৰ সৈতে ভাগ কৰি খোৱাতহে মাদকতা থাকে। সেয়েহে সৰু সৰু বৰ্গাকাৰ টুকুৰাবোৰ এই ক্ষেত্ৰত বিশেষভাৱে উপযোগী।
ইতিহাসবিদসকলৰ মতে, ঊনবিংশ শতিকাত চকলেট সাধাৰণ পৰিয়াললৈ অধিক পৰিমাণে উপলব্ধ হোৱাৰ পিছত, সমানভাৱে ভাগ কৰিব পৰাকৈ এনে নক্সা জনপ্ৰিয় হয়। প্ৰতিটো ব্লকেই একে আকাৰ আৰু একে পৰিমাণে প্ৰস্তুত কৰা হয়।

সহজে ভাঙি নাযায়

কাৰখানাৰ পৰা দোকানলৈ আৰু তাৰ পিছত গ্ৰাহকৰ হাতলৈ আহোঁতে একোটা চকলেটে দূৰ বাট অতিক্ৰম কৰিবলগীয়া হয়। এই যাত্ৰাপথ বহু হেঁচা, জোকাৰণিৰ মাজেৰে পাৰ হয়। যদি চকলেট একেবাৰে সমতল পাতৰ দৰে বনোৱা হ’লহেঁতেন, তেন্তে যিকোনো ঠাইৰ পৰা সহজেই ফাটি বা ভাঙি যোৱাৰ আশংকা থাকিলহেঁতেন। কিন্তু মাজত থকা খাঁজসমূহে চাপ সুষমভাৱে বিতৰণ কৰাত সহায় কৰে। যাৰ বাবে চকলেটসমূহ ভাঙি যোৱাৰ আশংকা যথেষ্ট হ্ৰাস পায়।

উৎপাদন প্ৰক্ৰিয়াও সহজ আৰু নিখুঁত হয়

এই বৰ্গাকাৰ নক্সাই চকলেট নিৰ্মাণকাৰী কোম্পানীসমূহৰ কামো যথেষ্ট সহজ কৰি তোলে। কাৰখানাত গলিত চকলেট বিশেষ সাঁচত ঢালি ঠাণ্ডা কৰা হয়। যদি এটা ডাঙৰ, একেবাৰে সমতল চকলেট বনোৱা হয়, তেন্তে ই সকলো ঠাইতে সমানভাৱে ঠাণ্ডা নহ’বও পাৰে। ফলত ভিতৰত বায়ুৰ বুদবুদ, ফাঁট বা অন্যান্য ত্ৰুটি সৃষ্টি হ’ব পাৰে। সৰু সৰু খাঁজ থকাৰ বাবে চকলেট সকলো দিশৰ পৰা সমানভাৱে আৰু দ্ৰুতগতিত ঠাণ্ডা হয়। লগতে সাঁচৰ পৰা ভঙা-চিঙা নোহোৱাকৈ সহজে উলিয়াব পাৰি। ইয়াৰ ফলত প্ৰতিটো চকলেট বাৰৰ আকাৰ, ওজন আৰু মান একে ধৰণৰ বজাই ৰখা সহজ হয়।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ