আৰক্ষীৰ মন্তব্য- সবিশেষ স্বীকাৰ পত্নীৰ ! গৰম তেল, জলকীয়া গুৰি, গ্লাছৰ বটল…
দেশ জুৰি চাঞ্চল্যৰ সৃষ্টি কৰা কৰ্নাটকৰ ডিজিপি ঘটনাত আৰক্ষীয়ে ফাদিল কৰিলে বহু ৰহস্য। আৰক্ষীয়ে দাবী কৰা অনুসৰি পত্নীয়ে স্বীকাৰ কৰিলে সকলো। পত্নীয়েই অতি নিৰ্মম ভাৱে প্ৰাণ কাঢ়িলে ডিজিপি স্বামী ওম প্ৰকাশৰ।
কৰ্ণাটকৰ প্ৰাক্তন আৰক্ষী অধীক্ষক ওম প্ৰকাশৰ হত্যাকাণ্ডই সকলোকে জোকাৰি গৈছে। প্ৰাক্তন ডিজিপিক হত্যাৰ অভিযোগত তেওঁৰ পত্নী পল্লৱীক গ্ৰেপ্তাৰ কৰিছে আৰক্ষীয়ে। এই হত্যাকাণ্ডৰ গোচৰটোত এতিয়া যিবোৰ তথ্য পোহৰলৈ আহিছে সেইবোৰে সকলোকে আচৰিত কৰি তুলিছে।
জানিব পৰা মতে প্ৰাক্তন ডিজিপি ওম প্ৰকাশৰ পত্নীৰ সৈতে কাজিয়া হৈছিল। সেই কাজিয়াৰ সময়তে পত্নী পল্লৱীয়ে ডিজিপিৰ চকুত জলকীয়াৰ গুড়ি নিক্ষেপ কৰাৰ অভিযোগ উত্থাপন হৈছে। তাৰ পিছত ৰছীৰে বান্ধি ছুৰীৰে আঘাত কৰি হত্যা কৰে। আৰক্ষীৰ সূত্ৰ অনুসৰি ৬৮ বছৰীয়া অৱসৰপ্ৰাপ্ত আই পি এছ বিষয়াগৰাকীক কাঁচৰ বটলেৰেও আক্ৰমণ কৰিছিল।
লাভ কৰা তথ্য অনুসৰি ওম প্ৰকাশ আৰু পল্লৱীৰ মাজত এজন আত্মীয়ক দিয়া সম্পত্তি সন্দৰ্ভত বিবাদ চলি আছিল। এই বিতৰ্কই শেষত হিংসাত্মক ৰূপ লয়, য’ত প্ৰাক্তন ডিজিপিয়ে প্ৰাণ হেৰুৱায়।
জেৰাৰ সময়ত ওম প্ৰকাশৰ পত্নী পল্লৱীয়ে আৰক্ষীক জনোৱা মতে, বিগত এসপ্তাহ ধৰি ঘৰখনত কাজিয়া চলি আছিল আৰু ওম প্ৰকাশে বাৰে বাৰে পত্নী আৰু কন্যাক গুলীয়াই হত্যা কৰাৰ ভাবুকি দি আহিছিল।
পত্নীয়ে উল্লেখ কৰা অনুসৰি, ২০ এপ্ৰিলৰ পুৱাৰে পৰা কেইবাটাও কথাক লৈ কাজিয়া চলি আছিল আৰু দুপৰীয়ালৈকে ই তীব্ৰতৰ হৈ পৰে। পল্লৱীয়ে দাবী কৰে যে প্ৰথম অৱস্থাত স্বামী ওম প্ৰকাশে পত্নী হত্যা কৰিবলৈ চেষ্টা কৰিছিল। কিন্তু কোনোমতে স্বামীৰ হাতৰ পৰা নিজৰ জীৱন ৰক্ষা কৰিবলৈ সক্ষম হৈছিল।
প্রতিবেদন অনুসৰি পত্নী পল্লৱীয়ে আৰক্ষীক জনোৱা মতে, প্রকাশৰ ওপৰত উতলি থকা ৰন্ধন তেল ঢালি জলকীয়াৰ গুড়ি নিক্ষেপ কৰি হাত বান্ধি কাঁচৰ বটল, তাৰ পাছত পাকঘৰৰ কটাৰীৰে আঘাত কৰে৷ শেষত অত্যধিক ৰক্তক্ষৰণৰ বাবেই মৃত্যু হোৱা বুলি প্রতিবেদনত উল্লেখ কৰা হৈছে৷
আৰক্ষীয়ে ঘটনাৰ পাছত পল্লৱী আৰু কন্যাক জিম্মাত নিয়ে। প্ৰায় ১২ ঘণ্টা ধৰি আৰক্ষীয়ে মাতৃ-কন্যা দুয়োকে জেৰা কৰে। সেই জেৰাৰ সময়তে প্ৰকাশ কৰে এই শিহৰণাকৰী ঘটনাৰ সবিশেষ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
