বিশ্বজুৰি ক্ৰমাৎ বৃদ্ধি পোৱা ডিজিটেলাইজেচন আৰু শিশু, কিশোৰ-কিশোৰীৰ ক্ৰমবৰ্ধমান ব্যৱহাৰ বৃদ্ধি চিন্তাৰ কাৰণ হৈ পৰিছে। অনলাইন সুৰক্ষা ভাৰতত নবীকৃত আইনী আৰু নীতিগত বিতৰ্কৰ কেন্দ্ৰবিন্দু হৈ পৰিছে। দিল্লী উচ্চ ন্যায়ালয়ত দাখিল কৰা ৰাজহুৱা স্বাৰ্থ জড়িত গোচৰত ১৩ বছৰৰ তলৰ শিশুক ছ’চিয়েল মিডিয়া প্লেটফৰ্মত প্ৰৱেশ কৰাত বাধা আৰোপ কৰিবলৈ দাবী জনাইছে। আবেদনখনত উল্লেখ কৰা হৈছে যে বৰ্তমানৰ ব্যৱস্থাই শিশুসকলক চাইবাৰ অপৰাধ, প*ৰ্ণগ্ৰাফী, অনলাইন শোষণ, মানসিক স্বাস্থ্যজনিত সমস্যা আৰু তথ্যৰ অপব্যৱহাৰৰ পৰা পৰ্যাপ্তভাৱে সুৰক্ষা প্ৰদান নকৰে।
দিল্লী উচ্চ ন্যায়ালয়ত দাখিল কৰা এক জনস্বাৰ্থ জড়িত গোচৰত ১৩ বছৰৰ তলৰ শিশুৱে ছ’চিয়েল মিডিয়াত প্ৰৱেশ কৰিব নোৱাৰাকৈ এক ফলপ্ৰসূ আইনী কাঠামো প্ৰণয়ন কৰিবলৈ কেন্দ্ৰীয় চৰকাৰৰ নিৰ্দেশ বিচাৰিছে। আবেদনখনৰ মতে, বেছিভাগ ছ’চিয়েল মিডিয়া প্লেটফৰ্মে বয়সৰ সীমা নিৰ্ধাৰণ কৰে যদিও বাস্তৱত সেইবোৰ পৰীক্ষা নকৰে। ইয়াৰ ফলত শিশুসকলে ভুৱা বয়সৰ সীমা প্ৰৱেশ কৰি প্লেটফৰ্মসমূহ ব্যৱহাৰ কৰাত সহজ হৈ পৰে। বয়স পৰীক্ষণ ব্যৱস্থাটো বাধ্যতামূলক কৰি শিশুৰ বাবে নিৰাপদ ডিজিটেল পৰিৱেশ সুনিশ্চিত কৰিবলৈ আদালতক অনুৰোধ জনাইছে। আৱেদনখনত উল্লেখ কৰা অনুসৰি ছ’চিয়েল মিডিয়াত অনুপযুক্ত আৰু যৌ*ন সম্পৰ্কীয় বিষয়বস্তু অনিয়ন্ত্ৰিতভাৱে উন্মোচন কৰাটোৱে সংবিধানৰ ২১ নং অনুচ্ছেদৰ অধীনত জীৱন আৰু ব্যক্তিগত স্বাধীনতাৰ অধিকাৰ খৰ্ব কৰে। আবেদনখনত মানসিক স্বাস্থ্য, চাইবাৰ অপৰাধ, অনলাইন গ্ৰুমিং আৰু ডাটা প্ৰাইভেচিৰ সৈতে জড়িত বিপদৰ কথাও উল্লেখ কৰা হৈছে। এই আবেদন দাখিল কৰিছে তিনি বছৰীয়া শিশুৰ মাতৃ কীৰ্তি দুয়া আৰু শিশু চিকিৎসক ডাঃ শৰদ গুপ্তাই।
দিল্লী উচ্চ ন্যায়ালয়ৰ স্থিতি
যদিও দিল্লী উচ্চ ন্যায়ালয়ে প্ৰথমতে মুখ্য ন্যায়াধীশ দেৱেন্দ্ৰ কুমাৰ উপাধ্যায় আৰু ন্যায়াধীশ কাৰিয়াক লৈ গঠিত বিভাগীয় বিচাৰপীঠৰ সন্মুখত এই গোচৰৰ শুনানি গ্ৰহণ কৰিছিল, তথাপিও বাৰ এণ্ড বেঞ্চে প্ৰকাশ কৰা অনুসৰি পিছত ন্যায়াধীশ তেজছ কাৰিয়াই PIL শুনানিৰ পৰা নিজকে আঁতৰাই ৰাখিছিল। আদালতে উল্লেখ কৰিছে যে ৫ আগষ্টত বিষয়টোৰ শুনানি গ্ৰহণ কৰিব। যদিও উচ্চ ন্যায়ালয়ে এই সন্দৰ্ভত এতিয়াও চূড়ান্ত সিদ্ধান্ত গ্ৰহণ কৰা নাই, তথাপিও ভাৰতৰ ডিজিটেল নীতিৰ বাবে এই শুনানি তাৎপৰ্যপূৰ্ণ বুলি প্ৰমাণিত হ’ব পাৰে। যদি আদালতে কেন্দ্ৰীয় চৰকাৰৰ পৰা সঁহাৰি বিচাৰে বা কোনো নীতিৰ পুনৰ বিবেচনাৰ পৰামৰ্শ দিয়ে তেন্তে ই শিশুৰ অনলাইন সুৰক্ষাৰ ওপৰত নতুন ৰাষ্ট্ৰীয় আলোচনাৰ সূচনা কৰিব পাৰে।
পৃথিৱীৰ আন দেশত কি নিয়ম?
আমেৰিকাকে ধৰি বিশ্বৰ বিভিন্ন দেশৰ চৰকাৰে ছ’চিয়েল মিডিয়া কোম্পানীসমূহৰ প্ৰতি জবাবদিহিতা বৃদ্ধিৰ বাবে পদক্ষেপ গ্ৰহণ কৰিছে। আমেৰিকাত শিশুৰ অনলাইন গোপনীয়তা সুৰক্ষা আইন (COPPA)-এ ১৩ বছৰৰ তলৰ শিশুৰ পৰা তথ্য সংগ্ৰহৰ বাবে অভিভাৱকৰ সন্মতি বাধ্যতামূলক কৰে। ইউৰোপীয় ইউনিয়নৰ জিডিপিআৰে শিশুৰ তথ্য সুৰক্ষাৰ বাবেও নিৰ্দিষ্ট ব্যৱস্থা প্ৰদান কৰে। শেহতীয়া কেইবছৰত অষ্ট্ৰেলিয়ায়ো নাবালক শিশুৰ ছ’চিয়েল মিডিয়াৰ ব্যৱহাৰ সীমিত কৰাৰ বাবে কঠোৰ আইন প্ৰণয়নৰ উদ্যোগ লৈছে। ব্ৰিটেইনৰ অনলাইন সুৰক্ষা আইনখনে ডিজিটেল প্লেটফৰ্মত শিশুৰ সুৰক্ষা শক্তিশালী কৰাৰ ওপৰত গুৰুত্ব আৰোপ কৰিছে। ভাৰতত দাখিল কৰা এই পিআইএলকো এই বিশ্বব্যাপী বিতৰ্কৰ প্ৰেক্ষাপটত গুৰুত্বপূৰ্ণ বুলি বিবেচিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
