গুৱাহাটী বিশ্ববিদ্যালয়ৰ ভিজিটিং প্ৰফেচাৰ মনোনীত বিশিষ্ট লেখক তথা সুবক্তা ময়ূৰ বৰা।
বিশিষ্ট লেখক, চিন্তাবিদ তথা সুবক্তা ময়ূৰ বৰাক গুৱাহাটী বিশ্ববিদ্যালয়ে ভিজিটিং প্ৰফেচাৰ হিচাপে মনোনীত কৰিছে ৷ গুৱাহাটী বিশ্ববিদ্যালয়ৰ পঞ্জীয়কে এক জাননীযোগে বিশিষ্ট লেখকগৰাকীক এই পদৰ বাবে মনোনীত কৰাৰ বিষয়ে সদৰি কৰিছে ।
অসমীয়া আৰু ইংৰাজী মিলি ১৮ খনকৈ গ্ৰন্থৰ প্ৰণেতা ময়ূৰ বৰাই প্ৰায়বোৰ গ্ৰন্থৰ জৰিয়তে দীৰ্ঘদিন ধৰি অসমীয়া সমাজৰ বহুবোৰ প্ৰথাগত চিন্তা আৰু ৰক্ষণশীল মনোভাৱক যুক্তিৰে বিৰোধিতা কৰি সচেতন ৰাইজৰ মাজত এখন সুকীয়া আসন দখল কৰিবলৈ সক্ষম হৈছে ।
অসমৰ বহু মৰ্যাদাসম্পন্ন অনুষ্ঠানত বক্তৃতা প্ৰদান কৰা ময়ূৰ বৰাই অসমীয়া ইংৰাজী দুয়োটা ভাষাতে ভাষণ দিয়াৰ উপৰিও সুন্দৰ ৰসবোধেৰে নিজৰ ভাৱধাৰা উপস্থাপন কৰি দৰ্শক তথা শ্ৰোতাক আপ্লুত কৰি আহিছে।
২০২১ চনত আমেৰিকাৰ নৰ্থ কেৰলিনা ষ্টেট ইউনাভাৰ্চিটীৰ ছাত্ৰসমাজৰ আগত অসম আৰু অসমীয়াৰ গৰিমা সম্পৰ্কে ভাষণ দি সকলোৰে দৃষ্টি আকৰ্ষণ কৰা বৰাই ২০২৪ চনৰ জুন জুলাই মাহতো আমেৰিকা যুক্তৰাষ্ট্ৰৰ ছয়খন চহৰত মুঠ ৮ খন অনুষ্ঠানত বক্তৃতা প্ৰদান কৰিছে ।
ইয়াৰে দুটা বক্তৃতাৰ বিষয়বস্তু আছিল শংকৰদেৱৰ বহুমুখী প্ৰতিভা আৰু মানৱতাবাদী ভাবাদৰ্শৰ প্ৰাসংগিকতা ।
উল্লেখযোগ্য যে ২০২৪ চনৰ ২০ জুলাই তাৰিখে আটলাণ্টা চহৰত বৰাই দিয়া বক্তৃতাটোৰ জৰিয়তে অসমৰ সমাজত বিভিন্ন ধৰ্মাৱলম্বীলোকৰ মাজত থকা সমন্বয় সম্প্ৰীতিৰ কথা জানিব পাৰি ভাৰতৰ কনচাল জেনেৰেলেও বৰাক বিশেষ সম্বৰ্ধনা জ্ঞাপন কৰিছিল ।
নাবাৰ্ডৰ দৰে এটা কেন্দ্ৰীয় চৰকাৰৰ শীৰ্ষস্থানীয় বেংকৰ জ্যেষ্ঠ বিষয়া হিচাপে ২৫ বছৰতকৈও অধিক কাল ভাৰতৰ বিভিন্ন ঠাইত কাৰ্যনিৰ্বাহ কৰি ২০২১ চনত স্বেচ্ছাই অৱসৰ লোৱা ময়ূৰ বৰাৰ বিপুল অভিজ্ঞতাই গুৱাহাটী বিশ্ববিদ্যালয়ৰ শিক্ষকসমাজ আৰু ছাত্ৰসমাজ উভয়কে সমৃদ্ধ কৰিব পাৰিব বুলি কৰ্তৃপক্ষই আশা প্ৰকাশ কৰিছে ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
