মৃত্যুৰ পূৰ্বে জুবিন গাৰ্গে শেষ সাক্ষাৎকাৰ দি গৈছে বিশিষ্ট সাহিত্যিক ৰীতা চৌধুৰীক৷ জুবিনৰ মৃত্যুৰ বাতৰি পায় আবেগিক লৈ ৰীতা চৌধুৰীয়ে সামাজিক মাধ্যমত দিছে বিশেষ পোষ্ট৷ সেই সাক্ষাৎকাৰতেই জুবিনে কৈছিল সাগৰৰ কথা, পুনঃ জন্মৰ কথা৷ সেইদিনাও জুবিন শাৰীৰিকভাৱে বৰ সুস্থ নাছিল৷ ৰীতা চৌধুৰীয়ে লিখিছে-
‘সময়েও নীৰৱ কৰিব নোৱাৰে যি ঐশ্বৰিক কন্ঠক
আমাৰ মৰমৰ জুবিন
এই মুহূৰ্তত শিপালৈকে জোকাৰি যোৱা যি অবিশ্বাস্য বাস্তৱৰ আঘাত আৰু যাক ধাৰণ কৰিবলৈ অক্ষম শোক৷ তাক প্ৰকাশ কৰিবলৈ মোৰ কলম অসমৰ্থ৷ ছিংগাপুৰলৈ যোৱাৰ দুদিন আগত জুবিন আমাৰ ঘৰলৈ আহিছিল৷ মোৰ প’ডকাষ্টৰ অতিথি হৈ৷ তাৰ আটাইতকৈ দীঘল আৰু শেষ সাক্ষাৎকাৰটো সেইটোৱেই আছিল৷ কথাৰ মাজতে সি কৈছিল— ”সাগৰত একো নাই৷” যোৱাৰ পৰত সি মোক বাৰে বাৰে আকোঁৱালি লৈছিল৷ তাৰ ঠুনুকা যেন লগা গাটো তেতিয়া তিৰতিৰকৈ কঁপি আছিল৷ গাটো তপত আছিল৷ তাৰ শৰীৰ যে ভালে নাই সেই স্পৰ্শতেই মই গম পাইছিলোঁ৷ হাৰিব নজনা ল’ৰাটোৱে হাঁহি মুখেৰে মাত লগাই গুচি গৈছিল৷
আমাৰ মৰমৰ ল’ৰাটোক অসুস্থ অৱস্থাত ছিংগাপুৰলৈ কিয় গান গাবলৈ লৈ গ’ল? সময়ে কেতিয়াবাহে পৃথিৱীক উপহাৰ দিয়া এনে আপুৰুগীয়া এটা জীৱনৰ অৱহেলা আৰু দায়িত্বজ্ঞানহীনতাৰ ফলত হোৱা এই অসময়-প্ৰস্থান অসহনীয়৷
কোনে জানে আকৌ কিমান শতিকা আমি অপেক্ষা কৰিব লাগিব সময়ৰ এনে উপহাৰলৈ!
মোক সি কৈ গৈছিল, ”যদি আকৌ জন্ম হ’ব লাগে, জুবিন গাৰ্গ হিচাপেই জন্ম ল’ব বিচাৰোঁ৷”
অগণিতজনৰ হৃদয়ৰ কেন্দ্ৰত চিৰস্থায়ী স্থান লাভ কৰা সময়াতীত এই সত্তা মৃত্যুহীন৷ অবিনাশী৷
প্ৰণাম৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
