চৰ্চাত থকা ৫ গৰাকীক প্ৰাৰ্থীৰ বিপৰ্যয়ক লৈ এতিয়া সামাজিক মাধ্যমত চলিছে চৰ্চা৷ সামাজিক মাধ্যমত বহুতেই সমৰ্থন জনাইছিল বিশেষ ৫গৰাকী প্ৰাৰ্থীক৷ কিন্তু ইভিএমত তেওঁলোকে নাপালে জনতাৰ সমৰ্থন যাৰ বাবে শোচনীয় পৰাজয় স্বীকাৰ কৰিবলগীয়া হৈছে ছচিয়েল মিডিয়াত জনপ্ৰিয় ৫ প্ৰাৰ্থীয়ে৷ কিন্তু কোন এই ৫ প্ৰাৰ্থী?
প্ৰথমেই খুবেই চৰ্চাত থকা প্ৰাৰ্থীগৰাকী হৈছে গৌৰৱ গগৈ৷ গৌৰৱ গগৈ যোৰহাট লোকসভাৰ সাংসদ হোৱাৰ পাছত এইবাৰ যোৰহাট বিধানসভা সমষ্টিৰ পৰা নিৰ্বাচনত প্ৰতিদ্বন্দ্বিতা কৰিছিল৷ সামাজিক মাধ্যমত বহুজনে গৌৰৱক একপ্ৰকাৰে মুখ্যমন্ত্ৰীয়েই পাতি পেলাইছিল৷ বহুজনে কৈছিল গৌৰৱেই অসমৰ পৰবৰ্তী মুখ্যমন্ত্ৰী৷ কিন্তু মুখ্যমন্ত্ৰী হোৱাটো দূৰৈৰে কথা নিজেই জয়লাভ কৰিব নোৱাৰিলে গৌৰৱ গগৈয়ে৷ বিজেপি প্ৰাৰ্থী হিতেন্দ্ৰনাথ গোস্বামীৰ হাতত শোচনীয় পৰাজয় হয় গৌৰৱ গগৈৰ৷
তাৰপিছতেই চৰ্চাত থকা আন এজন প্ৰাৰ্থী হৈছে খোৱাং সমষ্টিৰ প্ৰাৰ্থী লুৰীণজ্যোতি গগৈ৷ লুৰীণজ্যোতি গগৈয়ে নিজে খোলা দল অসম জাতীয় পৰিষদক প্ৰতিনিধিত্ব কৰি আগবাঢ়িলেও সমগ্ৰ ৰাজ্যত এখন আসনো দখল কৰিব নোৱাৰিলে৷ নিজেও খোৱাঙৰ বিজেপি প্ৰাৰ্থী চক্ৰধৰ গগৈৰ হাতত শোচনীয় পৰাজয় বৰণ কৰিছে৷
চৰ্চাত আছিল জ্ঞানশ্ৰী বৰাও৷ মৰিয়নী সমষ্টিত বিজেপি প্ৰাৰ্থী ৰূপজ্যোতি কূৰ্মীৰ বিৰুদ্ধে যুঁজ দিছিল জ্ঞানশ্ৰী বৰাই৷ অসম চৰকাৰৰ অধীনৰ চাকৰি এৰি ৰাজনীতিলৈ আহিছিল জ্ঞানশ্ৰী৷ জ্ঞানশ্ৰীক জেন-জি প্ৰাৰ্থী বুলি সামাজিক মাধ্যমত বহুজনে আদৰিও লৈছিল৷ বহুজনেই কৈছিল জ্ঞানশ্ৰীৰ দৰে শিক্ষিত নাৰী ৰাজনীতিলৈ অহাটো ভাল লক্ষণ৷ জ্ঞানশ্ৰীক বিধানসভাত চাব খোজো বুলি সামাজিক মাধ্যমত পোষ্ট দিয়া বহুজনেই কিন্তু ইভিএমত নিৰাশ কৰিলে জ্ঞানশ্ৰীক৷ যাৰবাবে পৰাজয় বৰণ কৰিবলগীয়া হৈছে জ্ঞানশ্ৰী বৰাই৷
চৰ্চাত থকা এগৰাকী প্ৰাৰ্থী হৈছে কুংকী চৌধুৰী৷ কুংকী চৌধুৰীয়ে প্ৰতিদ্বন্দ্বিতা আগবঢ়াইছিল চেণ্ট্ৰেল গুৱাহাটীৰ পৰা৷ কুংকীৰ বিৰুদ্ধে আছিল বিজেপি প্ৰাৰ্থী বিজয় গুপ্তা৷ বিজয় গুপ্তাতকৈ সামাজিক মাধ্যমত কুংকীৰ সমৰ্থকৰ সংখ্যাই সৰহ আছিল৷ যাৰবাবে বহুতেই আশা কৰিছিল কুংকীয়েও জয়ী হৈ বিধানসভালৈ আহিব৷ কিন্তু আশাত চেঁচাপানী ঢালি কুংকীকো বিধায়ক হোৱাৰ সুযোগ নিদিলে সমষ্টিবাসীয়ে৷
মীৰা বৰঠাকুৰো সামাজিক মাধ্যমত চিনাকী মুখ হৈ পৰিছিল৷ তেওঁৰ মন্তব্যসমূহৰ বাবেই তেওঁ বিশেষ চৰ্চা লাভ কৰিছিল৷ ইফালে তেওঁৰ বিৰুদ্ধে প্ৰতিদ্বন্দ্বিতা কৰিছিল মনোনয়ন দাখিলৰ এদিন পূৰ্বে বিজেপিত যোগ দিয়া প্ৰাৰ্থী প্ৰদ্যুৎ বৰদলৈ৷ প্ৰদ্যুৎ বৰদলৈক চালানি বুলি সমালোচনা কৰিছিল দিছপুৰৰেই বহু ভোটাৰে৷ কিন্তু ইভিএমত প্ৰদ্যুতক বাচি ল’লে প্ৰায়সংখ্যক দিছপুৰবাসীয়ে৷ যাৰ বাবে প্ৰদ্যুত বৰদলৈৰ হাতত শোচনীয় পৰাজয় স্বীকাৰ কৰিবলগীয়া হৈছে মীৰা বৰঠাকুৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
