অসম লাইভ২৪ঃ কোনোৱে যাত্ৰা কৰিছিল পেটৰ টানত, কোনোবা গৈছিল চিকিৎসাৰ বাবে, কোনোবা যাত্ৰা কৰিছিল ক্ষন্তেক বিনোদনৰ বাবে। কোনেনো জানিছিল এইদৰে হঠাৎ নামি আহিব কাল অমানিশা। যিয়ে যি কামতেই ওলাই নাযাওক কিয় দুৰ্ঘটনাৰ ভয়াৱহতাৰ পৰিণতি সকলোৰে একেই। শাৰী শাৰী মৃতদেহ, যিসকলক জীৱন্ত অৱস্থাত উদ্ধাৰ কৰিবলৈ সক্ষম হৈছে তেওঁলোকেও সেই পৰিস্থিতিৰ কথা বৰ্ণনা কৰি শিঁয়ৰি উঠিছে। আহত অধিকাংশৰেই অৱস্থা সংকটজনক।
আহত অৱস্থাত উদ্ধাৰ হোৱা ছাদ্দাম নামৰ যুৱকজনৰ পত্নীয়ে দিছে ঘটনাৰ শিহঁৰণকাৰী বৰ্ণনা। ছাদ্দামে বহিঃৰাজ্যত কাম কৰে। কিছুদিন পূৰ্বে তেওঁৰ এটি সন্তান জন্ম পাইছে। সন্তানটোক চাবৰ বাবেই কামৰ পৰা কিছুদিন ছুটি লৈ ঘৰলৈ আহি আছিল ছাদ্দাম। কিন্তু এটা কালনিশাই শেষ কৰিলে সকলো আশা। কাল অমানিশাত ছাদ্দামো গ’লগৈ উভতি নহাৰ বাটেৰে।
পশ্চিমবংগৰ পূব বৰ্ধমানত ঘৰ ছাদ্দাম শেখৰ। পৰিয়ালটোক চলাবৰ বাবেই ছাদ্দামে বিগত কেইবাবছৰ ধৰি বহিঃৰাজ্যত কাম কৰি আছিল। কিছুদিন আগতেই এটি সন্তান জন্মহোৱাত সন্তানৰ মোহতেই ঘৰলৈ আহি আছিল ছাদ্দাম। পত্নী আৰু সন্তানৰ সৈতে কেইটামান দিন কটাব, সেই উদ্দেশ্যেই আনন্দমনেৰে ঘৰলৈ আহি আছিল ছাদ্দাম। ঘৰলৈ আহি থাকোতে ট্ৰেইনৰ পৰা পত্নীক কৰা শেষৰটো ফোনত ছাদ্দামে আনন্দত কৈছিল, ‘তোমালোকৰ সৈতে ভাল সময় অলপ কটাম। এইবাৰ বেছিদিন নাথাকো, আমাৰ সন্তানটোৱে কথা ক’ব পৰা হ’লে আকৌ আহিম। সি মোক দেউতা বুলি মাতিব, জীৱনৰ আটাইতকৈ ডাঙৰ প্ৰাপ্তি মই তাতেই পাম।’
সেই কথাবোৰ ফলিয়াবলৈ নিয়তিয়ে যেন সুযোগেই নিদিলে। সন্তানক বুকুত সামৰি লোৱাৰ হেঁপাহ সামৰি দুৰ্ঘটনাত প্ৰাণ হেৰুৱালে ছাদ্দামে। কৰ্মসূত্ৰে কেৰালাত আছিল ছাদ্দাম। ঘৰলৈ অহাৰ বাটতেই ২৫ বছৰীয়া ছাদ্দাম শ্বেখে মৃত্যুক সাবটি লৈছে। কোলাত সন্তানক লৈ ছাদ্দামৰ পত্নীয়ে ৰাষ্ট্ৰীয় সংবাদ মাধ্যমৰ আগত দিছে এই দুঃসংবাদ। পত্নীয়ে বাৰে বাৰে কৈছে, ‘মই তেওঁ অহালৈ প্ৰত্যেকবাৰেই বৰ আশাৰে ৰৈ থাকো। কিন্তু এইবাৰতো মোৰ অপেক্ষা শেষ নহ’ব। মই জীৱনটো তেওঁলৈ ৰৈ থাকিলেও তেওঁ আৰু নাহিব, মই কেনেকৈ এই কথা মানি লওঁ। কণমানিটোৱেওটো নুবুজিব এই কথা! কেনেকৈ তাৰ বাপেক তাক চাবলৈ আহিয়েই চিৰদিনৰ বাবে গুচি গ’ল।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
