অসম লাইভ২৪ঃ বিতৰ্কিত মন্তব্য কৰি অনুশোচনাত দগ্ধ হৈছে সাংসদ আজমল। মুখ্যমন্ত্ৰী ড০ হিমন্ত বিশ্ব শৰ্মা আৰু হিন্দু সম্প্ৰদায়ক লৈ বিতৰ্কিত মন্তব্য কৰি ক্ষমা বিচাৰিবলৈ বাধ্য হৈছে সাংসদ আজমল। অনুশোচনাত দগ্ধ হৈ আজমলে কৈছে, তেওঁ ভুল কৰিছে।
মুখ্যমন্ত্ৰীক লাভ জেহাদ কৰিবলৈ আহ্বান জনোৱাৰ লগতে হিন্দুসকলক লৈও আপত্তিজনক মন্তব্য কৰিছিল AIUDF-ৰ মুৰব্বীগৰাকীয়ে। যাৰ পিছতে ৰাজ্যজুৰি সৃষ্টি হৈছিল তীব্ৰ প্ৰতিক্ৰিয়াৰ। থানাই থানাই আজমলৰ বিৰুদ্ধে ৰুজু হৈছিল গোচৰ। নভৱা–নিচিন্তাকৈ মন্তব্য কৰি অনুতপ্ত হৈছে আজমল। পলমকৈ হ’লেও আজমলে বুজিলে তেওঁৰ মন্তব্য সঠিক হোৱা নাই। আনক আঘাত দিয়া মন্তব্য কৰি ইতিমধ্যে ভুল স্বীকাৰ কৰিছে আজমলে। উঠাই লৈছে সেই বিশেষ মন্তব্যটো বুলি প্ৰকাশ কৰিছে আজমলে।
সংবাদ মাধ্যমৰ সন্মুখত এই সম্পৰ্কে প্ৰতিক্ৰিয়া ব্যক্ত কৰি আজমলে কয়, ‘‘মই ভুল কৰিছো। তাৰ বাবে মই অনুতপ্ত। মই মোৰ মন্তব্য উঠাই লৈছো। ক্ষমা বিচৰাৰ পিছতে সেই কথাৰ অন্ত হৈছে।’’ ইয়াৰোপৰি তেওঁ কৰা মন্তব্যক লৈ এতিয়া ৰাজনীতি হোৱা বুলিও মন্তব্য কৰিছে আজমলে। এই বিষয়টোক লৈ মন্তব্য প্ৰকাশ কৰি আজমলে কয়, ‘‘থানাই থানাই গোচৰ ৰুজু হ’লেও মই আইনৰ ওপৰত বিশ্বাসী। মুখ্যমন্ত্ৰীয়ে মোৰ গোচৰ কৰিমগঞ্জ অথবা আমেৰিকালৈ পঠাই দিলেও মই আইনী যুঁজ যুঁজিবলৈ সাজু।’’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
