অসম লাইভ ২৪ঃ
ক্ৰীড়াঃ দেওবাৰে হঠাতে অহা বৰষুণৰ বাবে আই পি এলৰ ফাইনেল খেল অনুষ্ঠিত নহ’ল। বৰষুণৰ বাবে ফাইনেল খেলখন স্থগিত কৰা হৈছিল। গুজৰাট টাইটানছ বনাম চেন্নাই চুপাৰ কিংছৰ ফাইনেল খেলখন আজি অনুষ্ঠিত হোৱাৰ খবৰ ইতিমধ্যে লাভ কৰা গৈছে। বতৰৰ কথা ভাবিয়েই ভাৰতীয় ক্ৰিকেট নিয়ন্ত্ৰণ ব’ৰ্ডে (বিচিচিআই) আই পি এলৰ ফাইনেলৰ বাবে অতিৰিক্ত দিন নিৰ্ধাৰণ কৰি ৰাখিছিল।
এক পূৰ্বানুমান অনুসৰি, সোমবাৰৰ দিনটোতো বৰষুণ হোৱাৰ সম্ভাৱনা প্ৰকট কৰে ৰাষ্ট্ৰীয় বতৰ বিজ্ঞান সংস্থাই। ভাল খবৰটো এয়াই যে সন্ধিয়াৰ ভাগত ধাৰাসাৰ বৰষুণ অহাৰ কোনো সম্ভাৱনা নাই। কিনকিনীয়া বৰষুণ অহাৰহে সম্ভাৱনা আছে। তেনে পৰিপ্ৰেক্ষিতত খেলখন বাতিল হোৱাৰ সম্ভাৱনা তেনেকৈ নাই। অৱশ্যে, আহমেদাবাদত সোমবাৰে ৰাতিপুৱাৰ ভাগত এজাক মধ্যমীয়া বৰষুণ আহিছিল। বতৰ বিজ্ঞানীসকলে আশ্বাস দিছে যে দুপৰীয়াৰ ভাগত আকাশত ডাৱৰ নাথাকিব। পুৱা ৭ বজাত আহমেদাবাদৰ আকাশ ৭০ শতাংশ ডাৱৰে আৱৰি আছিল। আন এক অনুমান অনুসৰি, ফাইনেলৰ আৰম্ভণিৰ সময়ত অৰ্থাৎ সন্ধিয়া ৭.৩০ বজাত আকাশৰ ৫০ শতাংশ ডাৱৰে আৱৰি থাকিব পাৰে। কিন্তু, সেই ডাৱৰৰ পৰা বৰষুণ অহাৰ সম্ভাৱনা নাই। নিশাৰ ভাগলৈ আহমেদাবাদৰ আকাশত মেঘ নাথাকিব। বতৰ ফৰকাল হ’ব।
উল্লেখ্য যে, দেওবাৰে ক্ৰিকেট অনুৰাগীসকলৰ বহু প্ৰতীক্ষিত আই পি এল ফাইনেল চোৱাত বৰষুণে বিধি-পথালি দিয়াৰ সময়তে আজিৰ দিনটোত কিছু আশাৰ ৰেঙণি দেখিবলৈ পোৱা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
