অসম লাইভ২৪ঃ ২০২৪ ৰ লোকসভা নিৰ্বাচনৰ পূৰ্বে কৰ্ণাটক বিধানসভা নিৰ্বাচন আছিল বিজেপি আৰু কংগ্ৰেছ দুই দলৰ বাবেই অগ্নিপৰীক্ষা৷ কেন্দ্ৰত থকা বিজেপি দলৰ বাবে কৰ্ণাটকত বিধানসভা নিৰ্বাচন আছিল দক্ষিণলৈ সোমোৱাৰ এক অচিলা৷ ইফালে কংগ্ৰেছৰ বাবে কৰ্ণাটকৰ বিজয় আছিল অস্তিত্ব ৰক্ষাৰ শেষ যুঁজ৷ অৱশেষত কৰ্ণাটকত শেষ হাঁহি মাৰিলে কংগ্ৰেছ দলে৷ কৰ্ণাটকত বিজেপিৰ পৰাজয়ৰ লগে লগেই সমগ্ৰ দক্ষিণভাৰতেই বিজেপিমুক্ত হৈ পৰিল৷ আনহাতে ৰাহুল গান্ধী ‘ভাৰত জোড়ো’ যাত্ৰাৰ পাছত এয়া আছিল প্রথমটো নিৰ্বাচন৷ এই বৃহৎ জয়ৰ পাছতেই ৰাহুল গান্ধীয়েও সুখী হৈ আগবঢ়াইছে নিজা মন্তব্য৷
দক্ষিণ ভাৰতৰ ৫খন ৰাজ্য, অন্ধ্ৰপ্ৰদেশ, কৰ্ণাটক, কেৰালা, তামিলনাডু আৰু তেলেংগানাৰ মাজত কেৱলমাত্ৰ কৰ্ণাটকহে বিজেপিৰ শাসনত আছিল আৰু কেন্দ্ৰীয়শাসিত অঞ্চল পুদুচেৰীত বিজেপি সমৰ্থিত এন আৰ কংগ্ৰেছ শাসনত আছে৷ কিন্তু পুদুচেৰীতকৈ কৰ্ণাটক নিৰ্বাচন নৰেন্দ্ৰ মোদী, অমিত শ্বাহৰ বাবে গুৰুত্বপূৰ্ণ আছিল৷ ভোট প্ৰচাৰৰ বাবে কৰ্ণাটকত কেইবাদিনো উপস্থিত হৈছিল প্রধানমন্ত্ৰী নৰেন্দ্ৰ মোদী৷ হিন্দুত্বৰ প্ৰচাৰৰ লগে লগে হিন্দু অধ্যুষিত কৰ্ণাটকত মোদীয়ে বাৰে বাৰে কৈছিল ৰাষ্ট্ৰপ্ৰেম আৰু উন্নয়নৰ কথা৷ তাৰপিছতো কৰ্ণাটকবাসীয়ে মোদীৰ পক্ষ নলৈ ৰাহুলৰ পক্ষতেই ঢাল খালে৷ ৰাহুলে দিয়া ৫ গেৰাণ্টীয়েহে আকৰ্ষণ কৰিলে কৰ্ণাটকৰ ভোটদাতাক৷ দক্ষিণ ভাৰতৰ এই ৰাজ্যত কাম নকৰিলে মোদী মেজিকে৷
উল্লেখ্য যে, বিশেষজ্ঞসকলৰ মতে কৰ্ণাটকত সাম্প্ৰদায়িক হিংসাৰ ঘটনা আজিলৈকে ঘটা নাই৷ কৰ্ণাটকৰ ৰাজনীতিত হিন্দুসকলৰ দুটা সম্প্ৰদায় লিঙ্গায়েত আৰু ভোক্কালিগাদৰ দ্বন্দ আছে যদিও কেতিয়াও কোনো সংঘৰ্ষ হোৱা নাই৷ একাংশ লিঙ্গায়েতৰ বিজেপি দলৰ প্ৰতি সমৰ্থন আছিল৷ কিন্তু ভোক্কালিগাদাৰ মাজত বিজেপিৰ কোনো প্রভাৱ নাছিল৷ ভোটৰ প্ৰচাৰত বিজেপিয়ে হিন্দুত্ববাদৰ কথাবোৰ প্ৰচাৰ কৰিছিল যদিও কৰ্ণাটকবাসীয়ে এই কথাত বিশেষ গুৰুত্ব নিদিলে৷ বিজেপি দলে বিগত বৰ্ষতো হিজাব বিৰোধী আন্দোলনত বিশেষ আগভাগ লৈছিল৷ শেষলৈ কৰ্ণাটকৰ শিক্ষা প্ৰতিষ্ঠানত হিজাব নিষিদ্ধ কৰাত সফলো হৈছিল৷ ইয়াৰোপৰি কৰ্ণাটকত হালাল কৰা মাংস বিক্ৰি কৰাৰ ক্ষেত্ৰতো নিষেধাজ্ঞা জাৰি কৰা হৈছিল ২০২২ চনত৷ শ্ৰীৰাম সেনা, বজৰং দল, হিন্দু জাগৰণ বেদীকৰ দৰে সংগঠনৰ দাবীতেই হালাল কৰা মাংস বন্ধৰ বাবে বিধানসভাত বিল পাছ কৰাৰো চেষ্টা কৰিছিল বিজেপি দলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
