অসম লাইভ ২৪ঃ ৩০ ছেপ্টেম্বৰ বুধবাৰে বাবৰি মছজিদ ধ্বংসৰ গোচৰৰ এক গুৰুত্বপূৰ্ণ ৰায়দান প্ৰদান কৰে চি বি আইৰ বিশেষ আদালতৰ বিশেষ বিচাৰপতি সুৰেন্দ্ৰ কুমাৰ যাদৱে। এই গোচৰত অভিযোগমুক্ত কৰা হয় ৩২ জনকৈ অভিযুক্তক। ইয়াৰ ভিতৰত- বিজেপিৰ একালৰ উপ-প্ৰধানমন্ত্ৰী এল কে আদৱানী, উত্তৰ প্ৰদেশৰ প্ৰাক্তন মুখ্যমন্ত্ৰী কল্যাণ সিং, বিজেপি নেতা-নেত্ৰী মুৰুলী মনোহৰ যোশী, উমা ভাৰতী, বিনয় কাটিয়াৰ, সাক্ষী মহাৰাজ আদি। গোচৰটোৰ ৰায়দানত কোৱা হয় যে ১৯৯২ চনৰ ৬ ডিচেম্বৰৰ বাবৰি মছজিদ ধ্বংসকাৰ্য পৰিকল্পিত নাছিল। এই কাৰ্যত জড়িত আছিল সমাজ বিৰোধী চক্ৰ, যিসকলে উত্তেজিত হৈ মছজিদটো ধ্বংস কৰিছিল। ৰায়টোত এল কে আদৱানীকে ধৰি একাংশ হিন্দুত্ববাদী নেতাৰ প্ৰসংগত কোৱা হয় যে মাথোঁ উচটনিমূলক ভাষণ দোষী সাব্যস্ত কৰিবলৈ যথেষ্ট নহয়।
এই ৰায়দানক লৈ অভিযোগমুক্তসকলৰ উপৰি আনন্দৰ বন্যা বয় হিন্দুত্ববাদী শিবিৰত। ইয়াৰ বিপৰীতে এই ৰায়ক লৈ অসন্তুষ্ট বিৰোধী শিবিৰ তথা ইছলামিক দল-সংগঠন।
ইয়াৰ পূৰ্বে ৩ দশকজোৰা বিতৰ্কৰ অৱসান ঘটাই ২০১৯ৰ ৯ নৱেম্বৰত ৰাম জনমভূমি বাবৰি মছজিদ গোচৰৰ চূড়ান্ত ৰায়দান কৰিছিল দেশৰ মুখ্য ন্যায়াধীশ ৰঞ্জন গগৈৰ নেতৃত্বত উচ্চতম ন্যায়ালয়ৰ এক বিচাৰপীঠে। সেই মৰ্মে বাবৰি মছজিদৰ স্থানত ৰাম মন্দিৰ নিৰ্মাণ আৰু অযোধ্যাতে আন এক স্থানত মছজিদ নিৰ্মাণৰ ৰায়দান কৰিছিল সৰ্বোচ্চ ন্যায়ালয়ে। তাৰ পাছত ৫ আগষ্টত অযোধ্যাত ৰাম মন্দিৰৰ ভূমি পূজন আৰু আধাৰশিলা স্থাপন কৰিছিল প্ৰধানমন্ত্ৰী নৰেন্দ্ৰ মোদীয়ে।
এতিয়া আহো বাবৰি মছজিদ ধ্বংসৰ সময়ছোৱালৈ। সেইদিনা ১৯৯২ চনৰ ৬ ডিচেম্বৰ। সমগ্ৰ দেশৰ প্ৰায় ডেৰ লাখ কৰ সেৱক উপস্থিত হৈছিল অযোধ্যাত। লালকৃষ্ণ আদৱানীৰ নেতৃত্বত আৰম্ভ হৈছিল বিশাল ৰথযাত্ৰা। লালকৃষ্ণ আদৱানী, মুৰুলী মনোহৰ যোশী আদিৰ উদাত্ত ভাষণ। যিকোনো বিনিময়ত অযোধ্যাত ৰাম মন্দিৰ নিৰ্মাণ কৰিবই। তাৰ পাছতেই একাংশ কৰ সেৱক উত্তেজিত হৈ উঠে আৰু জঁপিয়াই পৰে ১৬ শতিকাত মোগলৰ দ্বাৰা নিৰ্মিত মছজিদটোৰ ওপৰত। কৰ সেৱকৰ হাতত নিমিষতে ধ্বংসস্তূপত পৰিণত হয় বাবৰি মছজিদ। অসহায় হৈ চাই থাকিবলগীয়া হয় আৰক্ষী-নিৰাপত্তা বাহিনীয়ে। এই ঘটনাক কেন্দ্ৰ কৰি ৰথযাত্ৰাত অংশগ্ৰহণ কৰা বিশ্ব হিন্দু পৰিষদ আৰু বিজেপিৰ একাংশ নেতাক নিক্ষেপ কৰা হয় কাৰাগাৰলৈ। এই ঘটনাৰ ফলত হিন্দু-মুছলমানৰ মাজত সূত্ৰপাত হোৱা সংঘৰ্ষত অতিকমেও ৩ হাজাৰ লোক প্ৰাণহানি হয়।
১৯৯২ চনতে ঘটনা সন্দৰ্ভত দুটাকৈ গোচৰ ৰুজু হয়। পাছত গোচৰৰ সংখ্যা ৪৯টালৈ বৃদ্ধি হয়। এনেদৰেই ২৮ বছৰে চলি থকা আইনী যুঁজৰ অৱসান ঘটাই আজি ৩০ ছেপ্টেম্বৰত চি বি আইৰ বিশেষ আদালতে প্ৰদান কৰে এক গুৰুত্বপূৰ্ণ ৰায় য’ত ৩২ জনকৈ অভিযুক্তক অভিযোগমুক্ত কৰা হয়।
উল্লেখ্য যে, অযোধ্যা অঞ্চল মোগলে দখলৰ কৰাৰ আনন্দত ১৫২৮ খ্ৰীষ্টাব্দত মোগল সেনাপতি মীৰ বাকিয়ে অযোধ্যাত এটা মছজিদ নিৰ্মাণ কৰে। আৰু নামকৰণ কৰে মোগল চুলতান বাবৰৰ নামত। হিন্দুসকলৰ বিশ্বাস যে এটা মন্দিৰ ধ্বংস কৰি সেই স্থানত মোগল সেনাপতি বাকিয়ে মছজিদটো নিৰ্মাণ কৰিছিল। অৱশ্যে পুৰাতত্ত্ব বিভাগৰ গৱেষণাতো এটা কথা উদ্ধাৰ হয় যে সেই স্থানত পূৰ্বে মন্দিৰসদৃশ এক আন্তঃগাঁথনি আছিল। এই দাবী ১৮২২ চনত প্ৰথমবাৰলৈ ফাইজাবাদ আদালতৰ এগৰাকী বিষয়াই উত্থাপন কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
