ভাৰতীয় ক্ৰিকেট দলৰ তাৰকা অলৰাউণ্ডাৰ ৰবীন্দ্ৰ জাদেজাই টেষ্ট ক্ৰিকেটত এক বিশেষ কৃতিত্ব অৰ্জন কৰিছে। শ্ৰীলংকাৰ বিৰুদ্ধে গালে আন্তঃৰাষ্ট্ৰীয় ষ্টেডিয়ামত চলি থকা প্ৰথমখন টেষ্ট মেচত জাদেজাই ৪,০০০ৰো অধিক ৰান আৰু ৩৫০ৰো অধিক উইকেট লাভ কৰা খেলুৱৈৰ বিশেষ তালিকাত নিজৰ নাম অন্তৰ্ভুক্ত কৰিছে। এই কৃতিত্বৰ জৰিয়তে জাদেজা টেষ্ট ক্ৰিকেটৰ ইতিহাসত মাত্ৰ চতুৰ্থজন খেলুৱৈ হিচাপে এই বিশেষ মাইলৰ খুঁটি স্পৰ্শ কৰিছে। তেওঁ হৈছে কিংবদন্তি কপিল দেৱৰ পিছত এই কৃতিত্ব লাভ কৰা দ্বিতীয়জন ভাৰতীয় ক্ৰিকেটাৰ।
কোনেও কৰিব নোৱাৰা কাম কৰিলে জাদেজাই
টেষ্ট ক্ৰিকেটত ৪,০০০ৰো অধিক ৰান আৰু ৩৫০ৰো অধিক উইকেট লাভ কৰা খেলুৱৈৰ তালিকাত জাদেজাৰ সৈতে আছে ইংলেণ্ডৰ ইয়ান বোথাম, নিউজিলেণ্ডৰ ডেনিয়েল ভেট্টোৰী আৰু ভাৰতৰ কপিল দেৱ। কপিল দেৱে ১৩১খন টেষ্টত ৫,২৪৮ ৰান কৰাৰ লগতে ৪৩৪টা উইকেট দখল কৰিছিল।
ইয়ান বোথামে ১০২খন টেষ্টত ৫,২০০ ৰান আৰু ৩৮৩টা উইকেট লাভ কৰিছিল। আনহাতে ডেনিয়েল ভেট্টোৰীয়ে ১১৩খন টেষ্টত ৪,৫৩১ ৰান আৰু ৩৬২টা উইকেট দখল কৰিছিল। গুৰুত্বপূৰ্ণ কথাটো হৈছে এই মাইলৰ খুঁটি স্পৰ্শ কৰা বিশ্বৰ দ্ৰুততম খেলুৱৈত পৰিণত হৈছে ৰবীন্দ্ৰ জাদেজা। শ্ৰীলংকাৰ বিৰুদ্ধে গালে টেষ্টত ৩টা উইকেট দখল কৰাৰ লগে লগে এই কৃতিত্বৰ অধিকাৰী হয় জাদেজা।
ভাৰতৰ পঞ্চমজন ৩৫০ উইকেট দখলকাৰী
জাদেজা হৈছে টেষ্ট ক্ৰিকেটত ৩৫০টা উইকেট দখল কৰা পঞ্চমজন ভাৰতীয় বলাৰ। ইয়াৰ পূৰ্বে এই কৃতিত্ব লাভ কৰিছিল অনিল কুম্বলে, ৰবিচন্দ্ৰন অশ্বিন, কপিল দেৱ আৰু হৰভজন সিঙে। বাওঁহতীয়া স্পিনাৰ হিচাপে জাদেজাৰ এই কৃতিত্ব আৰু অধিক গুৰুত্বপূৰ্ণ। টেষ্ট ক্ৰিকেটত সৰ্বাধিক উইকেট দখল কৰা বাওঁহতীয়া স্পিনাৰসকলৰ মাজতো তেওঁ অন্যতম শীৰ্ষস্থানীয় বলাৰ। ৰবীন্দ্ৰ জাদেজাৰ বিশেষত্ব কেৱল বলিঙতে সীমাবদ্ধ নহয়। তেওঁ এজন সফল বেটছমেনো। ভাৰতৰ হৈ বহু গুৰুত্বপূৰ্ণ সময়ত নিম্ন ক্ৰমত বেটিং কৰি জাদেজাই দলক উদ্ধাৰ কৰিছে। টেষ্ট ক্ৰিকেটত তেওঁৰ নামত আছে ৪,০৯৫ ৰান। ইয়াৰ ভিতৰত আছে ৬টাকৈ শতক আৰু ২৭টা অৰ্ধশতক। টেষ্টত জাদেজাৰ বেটিং গড় ৩৮.২৭।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
