অসম লাইভ২৪ঃ কৰমণ্ডল এক্সপ্ৰেছ দুৰ্ঘটনাৰ প্ৰায় এসপ্তাহ সম্পূৰ্ণ হ’লেও ভুৱনেশ্বৰত এতিয়াও ক্ষাম কটা নাই মৃত্যু বিভীষিকা। ভুৱনেশ্বৰৰ এখন মৰ্গত এতিয়াও পৰি আছে ৮২ টা মৃতদেহ। দেহকেইটা চিনাক্ত পৰি পৰিয়ালৰ হাতত গতাই দিবলৈকে ৰৈ আছে ওড়িশা প্ৰশাসন। কিন্তু দুৰ্ঘটনাৰ এসপ্তাহ সম্পূৰ্ণ হ’লেও এই ৮২ টা মৃতদেহৰ এটাও চমজি ল’বলৈ অহা নাই কোনো পৰিয়াল।
ওড়িশাৰ উৎকট গৰমৰ বাবে দেহসমূহ মৰ্গত ৰখাটোও এতিয়া জটিল হৈ পৰিছে। এনেকৈ আৰু কেইটামান দিন থাকিলে চিনাক্তকৰণ সম্ভৱ নহ’ব বুলি জনাইছে প্ৰশাসনে। চিনাক্ত নোহোৱা এইসমূহ মৃতদেহক লৈ সমস্যাত পৰিছে ওড়িশা প্ৰশাসনো। চিনাক্তকৰণ প্ৰক্ৰিয়া যাতে দ্ৰুত হয় তাৰবাবে চুবুৰীয়া ৰাজ্য পশ্চিমবংগ, বিহাৰ আৰু ঝাৰখণ্ড চৰকাৰৰ সৈতে আলোচনাত মিলিত হৈছে ওড়িশা চৰকাৰ।
ভুৱনেশ্বৰ পৌৰনিগমৰ কমিছনাৰ বিজয় অমৃতা কুলাঙ্গে কয়, ‘দেহসমূহ চিনাক্তকৰণৰ বাবে আমাৰ ৰাজ্য চৰকাৰে চুবুৰীয়া ৰাজ্যসমূহৰ সৈতে আলোচনাত মিলিত হৈছে। মৃতদেহ চিনাক্তকৰণৰ বাবে যোৱা পৰিয়ালৰ সহায়ক হোৱাকৈ এটা কণ্ট্ৰল ৰুমৰো ব্যৱস্থা কৰা হৈছে। যিসকলে মৃতদেহ নিবলৈ আহে তেওঁলোকৰ খোৱা আৰু থকাৰো ব্যৱস্থা কৰা হৈছে। ভুৱনেশ্বৰৰ বিশেষ মৰ্গটোলৈ ১৬২ টা মৃতদেহ আহিছিল। তাৰভিতৰত ৮০ টা মৃতদেহ চিনাক্ত কৰি পৰিয়ালৰ হাতত তুলি দিয়া হয়। বাকী ৮২ টা মৃতদেহ এতিয়াও অচিনাক্ত অৱস্থাত আছে।
কেইবাটাও মৃতদেহক লৈ আকৌ সমস্যাও হৈছে। এটা মৃতদেহকেই বহুতেই নিজৰ আত্মীয় বুলি দাবী কৰিছে। গৰমৰ বাবে মৃতদেহসমূহ গেলিবলৈকো আৰম্ভ কৰিছে। উপায়হীন হৈ ডিএনএ পৰীক্ষাৰেই সহায় ল’ব লাগিব বুলি জনাইছে ওড়িশা প্ৰশাসনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
