অসম লাইভ২৪ঃ দেশৰ তেওঁ নামজ্বলা সংগীত পৰিচালক। বিশ্বজুৰি খ্যাতি আছে তেঁওৰ। অস্কাৰৰ দৰে সন্মানো দেশলৈ কঢ়িয়াই আনিছিল তেওঁ। গীতৰ বাবেই বিশ্বৰ চিনাকী এ আৰ ৰহমান। স্বভাৱগতভাৱে কম কথা কোৱা এ আৰ ৰহমানে প্ৰায় প্ৰতিখন মঞ্চত কেৱল গীতৰ মাজত এটা দুটা কথা কয়। এইবাৰ কিন্তু কথাৰ বাবেই বিতৰ্কত সোমাই পৰিছে এ আৰ ৰহমান। ৰহমানে এক অনুষ্ঠানত পত্নী চায়ৰা বানুৰ সৈতে উপস্থিত আছিল।
বিশেষভাৱে পুৰস্কৃত কৰাৰ বাবে এ আৰ ৰহমানক অনুষ্ঠানটোত নিমন্ত্ৰণ জনোৱা হৈছিল। পুৰস্কাৰ গ্ৰহণ কৰি পোনতেই ভাষণ প্ৰদান কৰে ৰহমানে। ৰহমানে ভাষণত কয়, ‘মই নিজৰ সাক্ষাৎকাৰ চাই একেবাৰেই ভাল নাপাও। কিন্তু মোৰ পত্নীয়ে পুৰণি সাক্ষাৎকাৰসমূহ খুচৰি চাই থাকে। তেওঁৰ হেনো মোৰ কণ্ঠস্বৰ খুবেই পছন্দৰ।’ ৰহমানে পত্নী চায়েৰালৈ ভাষণৰ বাবে মাইক্ৰফোনটো আগুৱাই দিয়ে। মাইক্ৰফোনটো দিয়েই পত্নীক সঁকিয়াইয়ো দিয়ে, ‘হিন্দীত কথা নকবা, তামিলত ক’বা।’ ৰহমানৰ এই নিৰ্দেশ শুনাৰ পাছতেই পত্নীয়ে কিছু থতমত খাই ইংৰাজীতেই ভাষণ আৰম্ভ কৰে।
চায়েৰাই কয়, ‘মোক ক্ষমা কৰিব, তামিলত কথা ক’বলৈ মই তামিল বহুত ভালকৈ ক’ব নোৱাৰো। মই সুখী মোৰ স্বামীয়ে পুৰস্কাৰ লাভ কৰিছে। তেওঁৰ কণ্ঠ মোৰো খুব পছন্দৰ। তেওঁৰ কণ্ঠৰ প্ৰেমত পৰিয়েই মই তেওঁৰ কাষ চাপিছিলো। প্ৰেমত পৰিছিলো।’ চায়েৰাই ভাষণ প্ৰদান কৰোতেও স্বামীক লৈ কৰা গৌৰৱ ফুঁটি উঠিছিল। তামিলৰ সমান্তৰালকৈ হিন্দী চিনেমা ইণ্ডাষ্ট্ৰীত ৰহমানৰ আছে বিশেষ স্থান।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
