অসম লাইভ২৪ঃ সংসদৰ বৰ্ষাকালীন অধিবেশন বৃহস্পতিবাৰৰ পৰা আৰম্ভ হ’ব। ১১ আগষ্টলৈকে চলিব এই অধিৱেশন। অধিৱেশনৰ পূৰ্বে বুধবাৰে কেন্দ্ৰীয় চৰকাৰে সদনত অনুষ্ঠিত কৰিছে সৰ্বদলীয় এখন বৈঠকৰ। বৈঠকতেই কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে মণিপুৰৰ পৰিস্থিতিক লৈ মুখ খুলিছে। বিৰোধীয়ে এই অধিৱেশনত মণিপুৰৰ বিষয়টো আলোচনা কৰাৰ বাবে জনোৱা দাবীক মানি লৈছে প্ৰতিৰক্ষা মন্ত্ৰী ৰাজনাথ সিঙে।
কি কৈছে প্ৰতিৰক্ষা মন্ত্ৰী ৰাজনাথ সিঙে?
বিৰোধীয়ে বিগত দুমাহ ধৰি মণিপুৰৰ হিংসাত্মক পৰিস্থিতিক লৈ কেন্দ্ৰক জগৰীয়া কৰি থকাৰ সময়তে শেহতীয়াকৈ কেন্দ্ৰীয় চৰকাৰে বিষয়টোক লৈ আগ্ৰহী হৈ উঠাক লৈ বহুতৰেই মনত উত্থাপিত হৈছে প্ৰশ্ন। ২৪ৰ লোকসভা নিৰ্বাচনত ইয়াৰ প্ৰভাৱ পৰিব বুলি অনুমান কৰিয়েই কেন্দ্ৰই এইবাৰ মণিপুৰৰ বিষয়টোক লৈ আগ্ৰহী হৈছে নেকি? বুধবাৰে অনুষ্ঠিত সৰ্বদলীয় বৈঠকত কংগ্ৰেছে এই বিষয়টো উত্থাপন কৰিছিল। কংগ্ৰেছে মণিপুৰৰ ওপৰিও মুল্যবৃদ্ধিৰ বিষয়টো আলোচনাৰ প্ৰস্তাৱ দিছে শাসক দলৰ নেতাসকলক। সংসদৰ অধিৱেশন ভালধৰণে আগবঢ়াবলৈ হ’লে বিষয়টোত শাসক দলে মন দিয়ক বুলিও আহ্বান জনাইছে কংগ্ৰেছ দলৰ সাংসদে।
উল্লেখ্য যে, ৩ মে’ৰ পৰা মণিপুৰত অব্যাহত আছে হিংসাত্মক ঘটনা। বৰ্তমানলৈকে এই হিংসাত্মক ঘটনাত ১০০ ৰো অধিক লোকৰ মৃত্যু হৈছে। ৬০,০০০ ৰো অধিক লোক গৃহহীন হৈছে। কংগ্ৰেছৰ সাংসদে এই বিষয়সমূহ উত্থাপন কৰাৰ পাছতেই, মন্ত্ৰী ৰাজনাথ সিঙে কয় যে, সংসদৰ বৰ্ষাকালীন অধিৱেশনৰ সময়ত মণিপুৰত সংঘটিত হিংসাত্মক ঘটনাৰ বিষয়ে আলোচনা কৰিবলৈ শাসক দল সাজু আছে। সংসদীয় পৰিক্ৰমা মন্ত্ৰী প্ৰহ্লাদ যোশীয়েও এই সন্দৰ্ভত কয় যে, মণিপুৰত দুমাহ ধৰি চলি থকা হিংসাত্মক ঘটনাৰ কথা সংসদত আলোচনা কৰিবলৈ সকলো সাজু।
চৰকাৰে ৩১ খন বিধেয়ক উত্থাপন কৰিব এই অধিৱেশনত
সূত্ৰৰ খবৰ অনুসৰি, চৰকাৰে বৰ্ষাকালীন অধিৱেশনত মুঠ ৩১খন বিধেয়ক উত্থাপন কৰাৰ প্ৰস্তুতি চলাইছে। ৩১ বিধেয়কৰ ভিতৰত আছে কেন্দ্ৰীয় অধ্যাদেশ, যি দিল্লীৰ বিষয়াসকলক স্থানান্তৰ আৰু নিযুক্তি দিয়াৰ অধিকাৰৰ সৈতে সম্পৰ্কিত। এই বিষয়টোত, ২৬ টা বিৰোধী দল আম আদমী পাৰ্টিৰ সৈতে আছে। সকলোৱে কেজৰিৱালক সমৰ্থনো কৰিছে।
ইপিনে বুধবাৰে অনুষ্ঠিত সৰ্বদলীয় বৈঠকত ভাগ লৈছে কেইবাগৰাকীও নেতাই। বিৰোধী নেতাৰ ভিতৰত আছে, কংগ্ৰেছৰ জয়ৰাম ৰমেশ, প্ৰমোদ তিৱাৰী, আপনা দলৰ সভাপতি অনুপ্ৰিয়া পেটেল, এছপিৰ ৰাম গোপাল যাদৱ, এছ টি হাছান, এআইএডিএমকেৰ থাম্বো দুৰাই, আপৰ সঞ্জয় সিঙকে ধৰি কেইবাজনো নেতা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
