অসম লাইভ২৪ঃ শিকাৰ আগ্ৰহ থাকিলে বয়স কেতিয়াও হেঙাৰ নহয়। এই কথাকেই প্ৰমাণ কৰিলে ৭৮ বছৰ বয়সীয়া মিজোৰামৰ এজন বৃদ্ধই। ৩ কিঃমিঃ খোজ কাঢ়ি স্কুলীয়া পোছাক পিন্ধি দৈনিক স্কুললৈ যায় বৃদ্ধজন। কান্ধত বেগ লৈ লালৰিংথাৰা নামৰ সেই বৃদ্ধজনে দৈনিক সৰু সৰু শিশুসকলৰ সৈতে ক্লাছ কৰে। মিজোৰামৰ চমফাই জিলাৰ ৰুআইকাবন গাঁৱৰ বাসিন্দা লালৰিংথাৰা।
তেওঁ চলিত বৰ্ষতেই ৰুআইকাবন গাওঁৰ এখন বিদ্যালয়ত নৱম শ্ৰেণীত নামভৰ্তী কৰিছে। ১৯৪৫ চনত জন্ম লালৰিংথাৰৰ। তেতিয়া তেওঁ দ্বিতীয় শ্ৰেণীলৈকে পঢ়ি পঢ়াশুনা সামৰিছিল। পিতৃৰ মৃত্যুৰ পাছত ঘৰৰ একমাত্ৰ পুত্ৰ সন্তান হিচাপে ঘৰৰ দায়িত্ব পালন কৰিবলগা হয়। মিজোৰামৰ বিভিন্ন জিলাত বসতি স্থাপনৰ অন্তত ১৯৯৫ চনত তেওঁ ৰুৱাইকাবন গাওঁত জীৱনৰ বাকীছোৱা কাল কটাবলৈ মন স্থিৰ কৰে।
দাৰিদ্ৰতাই কোঙা কৰাৰ বাবে শিক্ষাজীৱন সমাপ্ত কৰা লালৰিংথাৰাই আকৌ বিদ্যালয়ত নামভৰ্তি কৰিবলৈ পায় খুবেই সুখী বুলি ৰাষ্ট্ৰীয় সংবাদমাধ্যমৰ আগত ব্যক্ত কৰিছে। তেওঁ এই সন্দৰ্ভত কয় যে, টেলিভিছনৰ বাতৰি বুজিবলৈ, ইংৰাজীত আৱেদন পত্ৰ লিখা শিকিবলৈকে তেওঁ বিদ্যালয়ত আকৌ নামভৰ্তী কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
