অসম লাইভ২৪ঃ ৰাজ্যৰ তিনিখনকৈ চিকিৎসা মহাবিদ্যালয়ৰ স্বীকৃতি বাতিল। পুৱাৰে পৰাই স্বীকৃতি বাতিলৰ খবৰে শিৰোনাম দখল কৰিছে। কেন্দ্ৰীয় চৰকাৰে বাতিল কৰিছে ৪০ খনকৈ চিকিৎসা মহাবিদ্যালয়ৰ স্বীকৃতি। বহু আঁসোৱাহ থকাৰ বাবেই স্বীকৃতি বাতিল কৰা হৈছে বুলি জনাইছে ৰাষ্ট্ৰীয় চিকিৎসা আয়োগৰ ইউজি বোৰ্ডে।
ৰাষ্ট্ৰীয় চিকিৎসা আয়োগৰ ইউজি বোৰ্ডে চিকিৎসা মহাবিদ্যালয়সমূহত অনুসন্ধান ত্ৰুটি ধৰা পেলাইছিল। তাৰ পাছতে স্বীকৃতি বাতিলৰ সিদ্ধান্ত লৈছে। ৩০ মে’ত প্ৰকাশ পাইছিল এই তথ্য। স্বীকৃতি বাতিল কৰা চিকিৎসা মহাবিদ্যালয়সমূহৰ ভিতৰত আছে, গুৱাহাটী চিকিৎসা মহাবিদ্যালয়, অসম চিকিৎসা মহাবিদ্যালয় আৰু ফকৰুদ্দিন আলী আহমেদ চিকিৎসা মহাবিদ্যালয়। কিন্তু আঁসোৱাহসমূহৰ কাৰণ দৰ্শাবলৈ চিকিৎসা মহাবিদ্যালয়সমূহক উত্তৰ দিবলৈ এমাহৰ সময়সীমা বান্ধি দিছে আয়োগে।
এই সন্দৰ্ভত ৰাজ্যৰ স্বাস্থ্য মন্ত্ৰী কেশৱ মহন্তইয়ো প্ৰতিক্ৰিয়া দাঙি ধৰিছে। স্বাস্থ্য মন্ত্ৰী কেশৱ মহন্তই এই সন্দৰ্ভত কয়,’এয়া এক গতানুগতিক নিয়ম।এইবাৰ বাতৰিত ওলাইছে বাবে গম পাইছে। আগতে বাতৰিত নোলায়। নিয়মিত পৰিদৰ্শনত আঁসোৱাহ দেখিলে তেওঁলোকে অভিযোগ দিয়ে। এইবাৰ চি চি কেমেৰা নাই চলা বুলি অভিযোগ কৰিছিল। তেওঁলোকে সময় দিয়ে। সেই সময়ৰ ভিতৰত তাৰ উত্তৰ দিয়া হৈছে।’
আনহাতে জি এম চি এইচৰ অধীক্ষক অভিজিত শৰ্মাই স্বীকৃতি বাতিলক লৈ দিয়া প্ৰতিক্ৰিয়াত কয়, ‘এন এম চিয়ে পৰিদৰ্শনৰ বাবে প্ৰতিবছৰে মানুহ পঠিয়ায়। এইবাৰ এন এম চি ২৩ জানুৱাৰীত আচম্বিত পৰিদৰ্শনৰ বাবে আহিছিল। ৰাষ্ট্রীয় বন্ধৰ দিনত পৰিদৰ্শন কৰিছিল দলটোৱে। অভিযোগ আহিব পাৰে। আমি অভিযোগ পঢ়ি উত্তৰ দিছো। তেওঁলোকে কেমেৰাৰ কথা কৈছিল। কিন্তু এন এম চিয়ে লগোৱা কেমেৰা আমি চাব নোৱাৰো। ইতিমধ্যে ২৫ টা কেমেৰা আমি লগাইছো আৰু সেই ডাটাবোৰ এন এম চিলৈ গৈ আছে। কিন্তু কেমেৰাৰ কোড তেওঁলোকৰ ওচৰত থাকে আমি সেই কেমেৰা চাব নোৱাৰো। অন্যহাতে মেডিকেল কলেজত অধ্যাপক, কিতাপ-পত্ৰ আদি বস্তু পৰ্যাপ্ত পৰিমাণে আছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
