🔹 ‘তুমি ক’লেই ইনষ্টাগ্ৰাম এৰিব নোৱাৰো…’ স্বামীয়ে ইনষ্টাগ্ৰাম এৰিবলৈ কোৱাৰ বাবেই নৱবিবাহিতাৰ ভাতৃয়ে পিষ্টলেৰে আক্ৰমণ কৰিলে জোঁৱায়েকৰ গৃহত

অসম লাইভ২৪ঃ ‘ইনষ্টাগ্ৰাম কৰিব নোৱাৰিবা…’ নৱবিবাহিতা পত্নীক ইনষ্টাগ্ৰাম ব্যৱহাৰত বাধা দিছিল স্বামীৰ লগতে শহুৰৰ পৰিয়ালে। কিন্তু নৱবিবাহিতা নাচোড়বান্দা। ইনষ্টাগ্ৰাম কোনো কাৰণতে এৰিব নোৱাৰি। স্পষ্টভাৱেই স্বামী পৰিয়ালক সেই কথা জনাই দিছিল নৱবিবাহিতাই। বিষয়টোক লৈ স্বামী-স্ত্ৰীৰ মাজত আৰম্ভ হয় সংঘাতৰ। সংঘাত ইমানেই বাঢ়ি যায় যে নৱবিবাহিতা অৱশেষত পিতৃ গৃহলৈ যায়গৈ।

ঘটনাটো বিহাৰৰ হাজিপুৰৰ লালগঞ্জ থানাৰ কাষৰীয়া এলেকাৰ। স্থানীয় সূত্ৰৰ খবৰ অনুসৰি ১৫ দিন পূৰ্বে হাজিপুৰৰ ছবা খাতুনৰ সৈতে বিবাহপাশত আৱদ্ধ হৈছিল লালগঞ্জৰ ইলিয়াছ। ধুমধামেৰে অনুষ্ঠিত হৈছিল বিবাহৰ অনুষ্ঠান। ইলিয়াছৰ অভিযোগ, নৱবিবাহিতাই সকলোসময়তেই ফোনতেই ব্যস্ত থাকে। ইনষ্টাগ্ৰামকে ধৰি প্ৰায় সকলোবোৰ সামাজিক মাধ্যমেই সকলো সময়ৰ সংগী ছবা খাতুনৰ। এইদৰে ফোনত ব্যস্ত থকাত ইলিয়াছৰ পৰিয়ালৰ সকলোৱে আপত্তি দৰ্শাই। তাৰপাছতেই ইলিয়াছে পত্নীক ফোনৰ ব্যৱহাৰ কমাবলৈ কয়। কিন্তু পত্নী ছবাই ইলিয়াছৰ কথাক আওকান কৰি ফোনতেই ব্যস্ত থাকে। এই ব্যস্ততাৰ বাবে ইলিয়াছৰ পৰিয়ালৰ লোকসকলে ঠাট্টামূলকভাৱে বহু কথা ক’বলৈ আৰম্ভ কৰে।

এইদৰে ঠাট্টা-মস্কৰা কৰাক লৈ ছবা আৰু ইলিয়াছৰ মাজত কাজিয়াৰ সূত্ৰপাত। কাজিয়া ইমানেই ভয়ংকৰ হৈ পৰে যে দুয়োপক্ষৰ মাজত হতাহতি পৰ্যন্ত হয়গৈ। আৰক্ষী সূত্ৰই প্ৰকাশ কৰামতেষ ছবাই ইলিয়াছৰ ঘৰ ত্যাগ কৰি বৰ্তমান পিতৃগৃহত আছে। ছবাই পিতৃগৃহত গৈ সমগ্ৰ কাহিনী বিৱৰি কোৱাৰ পাছতেই তেওঁৰ ভাতৃ মহম্মদ ছোহেলে পিষ্টলেৰে ছবাৰ স্বামী পৰিয়ালক আক্ৰমণ কৰিছে। ছবাৰ ভাতৃৰ এই আক্ৰমণৰ পাছতেই ইলিয়াছৰ পৰিয়াল আৰক্ষীৰ কাষ চাপিছে। আৰক্ষীয়ে ইলিয়াছৰ এজাহাৰৰ ভিত্তিত ছবাৰ ভাতৃক আটকো কৰিছে। এই সমগ্ৰ ঘটনাৰ পাছতেই এতিয়া বিষয়টোক লৈ আৰক্ষীয়ে তদন্ত অব্যাহত ৰখা বুলিও জানিবলৈ দিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ