গাজাৰ যুদ্ধৰ ভয়াৱহতা পুনৰ পোহৰলৈ আহিছে। গাজা চহৰত ইজৰাইলৰ বিমান আক্ৰমণৰ প্ৰায় তিনি বছৰৰ পাছত এই ধ্বংসাৱশেষৰ পৰা উদ্ধাৰ হৈছে ১১২ জন পেলেষ্টাইনী লোকৰ মৃ*তদেহ। ইয়াৰ ভিতৰত আছে একেটা পৰিয়ালৰ বৃহৎ সংখ্যক মহিলা আৰু শিশু। গাজাৰ অসামৰিক প্ৰতিৰক্ষা বিভাগৰ মতে, যুদ্ধ আৰম্ভ হোৱাৰ পিছত এই ভূখণ্ডত অনুষ্ঠিত হোৱা অন্যতম বৃহৎ গণ অন্ত্যেষ্টিক্ৰিয়া আছিল।
গাজা অসামৰিক প্ৰতিৰক্ষা বিভাগৰ তথ্য অনুসৰি গাজা চহৰৰ ছাব্ৰাত আবু শ্বৰিয়া আৰু আল হুছেইনহ পৰিয়ালৰ ঘৰৰ ধ্বংসাৱশেষৰ পৰা ১১২ জন লোকৰ মৃ*তদেহ আৰু মানৱ অৱশিষ্ট উদ্ধাৰ কৰা হৈছে। মঙলবাৰে উদ্ধাৰ হোৱা মৃ*তদেহৰ গণ অন্ত্যেষ্টিক্ৰিয়া সম্পন্ন কৰা হয়। অন্ত্যেষ্টিক্ৰিয়াৰ সময়ত মৃ*তদেহকেইটা পেলেষ্টাইনৰ পতাকাৰে শ্ৰদ্ধাঞ্জলি অৰ্পণ কৰা হয়।
গাজা অসামৰিক প্ৰতিৰক্ষা বিভাগৰ মতে, ২০২৩ চনৰ ২৩ নৱেম্বৰত ইজৰাইলী আক্ৰমণত পৰিয়াল দুটাৰ আৱাসিক চৌহদক লক্ষ্য কৰি লোৱা হৈছিল। অব্যাহত থকা যুদ্ধৰ বাবে সেই সময়ত উদ্ধাৰকাৰী দল উপস্থিত হ’ব পৰা নাছিল। বিগত জুলাইৰ মাজভাগত প্ৰথমবাৰৰ বাবে উদ্ধাৰকাৰী দলসমূহে সেই স্থানত উপস্থিত হ’বলৈ সক্ষম হয়, তাৰ পিছত তেওঁলোকে দুসপ্তাহ ধৰি ধ্বংসাৱশেষৰ মাজত মৃ*তদেহৰ সন্ধান কৰে।
গাজাৰ অসামৰিক প্ৰতিৰক্ষা অভিযানৰ সঞ্চালক মহম্মদ আল মুঘাইয়েৰে কয় যে-উদ্ধাৰকাৰী দলে ১৭ দিনীয়া অবিৰত অভিযানৰ অন্তত ১১২টা মৃ*তদেহ উদ্ধাৰ কৰে। তেওঁ কয় যে উদ্ধাৰকাৰী দলে পৰ্যাপ্ত যন্ত্ৰৰ অভাৱত কেৱল খালী হাত আৰু সীমিত সম্পদেৰে অনুসন্ধান কৰিবলগীয়া হৈছিল। গাজাৰ অসামৰিক প্ৰতিৰক্ষাৰ মুখপাত্ৰ মাহমুদ বাছালে কয় যে উদ্ধাৰ হোৱাসকলৰ ভিতৰত ৪৪টা শিশুও আছে। তেওঁ দাবী কৰে যে সমগ্ৰ গাজাত ৮ হাজাৰতকৈ অধিক মৃ*তদেহ এতিয়াও ধ্বংসাৱশেষৰ তলত আশংকা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
