পশ্চিমবংগৰ এজন বাছ চালকৰ ঘৰত আৰক্ষীয়ে অভিযান চলাই জব্দ কৰিছে বৃহৎ ধনৰ পাহাৰ। বাছ চালকজনৰ ঘৰত ইমানে নগদ ধন জব্দ হৈছে যে টকা গণনা কৰিবলৈ অনা ৫টাকৈ মেচিন টকা গণি গণি বিকল হৈ পৰে। এক-দুই কোটি নহয়, আৰক্ষীয়ে অভিযানত বাছ চালকজনৰ ঘৰৰ পৰা মুঠ ২৮ কোটি টকা নগদ ধন জব্দ কৰিছে। সম্প্ৰতি সমগ্ৰ দেশতে চৰ্চা লাভ কৰা এই বাছচালকজনৰ নাম মীনাৰ মণ্ডল। মীনাৰ মণ্ডলৰ ঘৰ পশ্চিমবংগৰ বীৰভূম জিলাত।
মীনাৰ মণ্ডল পাথৰ ব্যৱসায়ী তথা তৃণমূল কংগ্ৰেছৰ প্ৰাক্তন নেতা অনুব্ৰত মণ্ডলৰ ঘনিষ্ঠ সহযোগী তুলু মণ্ডলৰ আত্মীয় বুলি জানিব পৰা গৈছে। উল্লেখ্য যে জুলাইৰ আৰম্ভণিতে তুলু মণ্ডলে ঋতব্ৰত বেনাৰ্জীয়ে নেতৃত্ব দিয়া বিদ্ৰোহী গোটত যোগদান কৰিছিল। বাছ চালক মীনাৰ পূৰ্বতে ৰাজ্যিক পৰিবহণ বিভাগত বাছৰ চালক হিচাপে কৰ্মৰত আছিল। পৰৱৰ্তী সময়ত পাথৰ ব্যৱসায়ৰ সৈতে জড়িত হৈ পৰে মীনাৰ। মীনাৰ তুলু মণ্ডলৰ মালিকানাধীন পাথৰ খনি আৰু ষ্টোন ক্ৰাছাৰ ইউনিটসমূহৰ সৈতেও জড়িত আছিল বুলি আৰক্ষীয়ে সদৰী কৰে।
আৰক্ষীৰ অভিযানত কেৱল ২৮ কোটি টকা নগদ ধনেই নহয়, উদ্ধাৰ হৈছে আন বহুতো মূল্যৱান সামগ্ৰী। আৰক্ষীৰ অভিযান কালত উদ্ধাৰ হোৱা সামগ্ৰীৰ ভিতৰত আছে ১৫ কিলোগ্ৰাম সোণ, যাৰ বৰ্তমান বজাৰ মূল্য প্ৰায় ২১ কোটি টকা। নগদ ধন আৰু সোণ উদ্ধাৰৰ পিছতে মীনাৰ মণ্ডলক গ্ৰেপ্তাৰ কৰা হয়। আৰক্ষীৰ আগত তেওঁ স্বীকাৰ কৰে যে উদ্ধাৰ হোৱা নগদ ধন আৰু সোণ তুলু মণ্ডল আৰু তুলু মণ্ডলৰ অধীনত থকা এটা “অবৈধ চক্ৰ”ৰ। পশ্চিমবংগ আৰক্ষীয়ে বুধবাৰে নিশাৰ পৰা আৰম্ভ কৰিছিল এই অভিযান।
মীনাৰ মণ্ডলৰ গৃহৰ পৰা এই বুজন পৰিমাণৰ ধন-সোণ জব্দ কৰাৰ পিছতে এখন বিয়াৰ অভ্যৰ্থনা অনুষ্ঠান চৰ্চালৈ আহিছে। চৰ্চাৰ কেন্দ্ৰলৈ অহা এই বিয়াখন হৈছে ২০২৪ত অনুষ্ঠিত হোৱা তুলু মণ্ডলৰ কন্যাৰ বিয়া। বীৰভূমৰ সুৰীত অনুষ্ঠিত এই বিয়াৰ অভ্যৰ্থনা অনুষ্ঠানত ১০০ কোটিতকৈ অধিক খৰচ কৰা হৈছিল বুলি চৰ্চিত হৈছিল। অভ্যৰ্থনা অনুষ্ঠানত বলীউডৰ অভিনেতা আৰবাজ খান, অভিনেত্ৰী জেৰিন খানৰ উপৰিও বহু বাংলা চিনেমাৰ অভিনেতা-অভিনেত্ৰী উপস্থিত আছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
