বিগত এমাহ ধৰি অসমকে ধৰি উত্তৰ-পূবৰ ৰাজ্যসমূহত হোৱা প্ৰচণ্ড বৰষুণ, ভূমিস্খলন আৰু ভয়াৱহ বানপানীয়ে স্বাভাৱিক জীৱনত ব্যাঘাত জন্মাইছে। বানপানীয়ে লাখ লাখ লোকক গৃহহীন কৰি পেলাইছে, কেইবাজনো লোকৰ প্ৰাণ কাঢ়ি লৈছে আৰু হাজাৰ হাজাৰ ঘৰ-দুৱাৰ, অট্টালিকা, শস্যৰ ব্যাপক ক্ষতি হৈছে। ইফালে, প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে সংসদত অৰুণাচল প্ৰদেশ আৰু নাগালেণ্ডৰ পাঁচজনীয়া সাংসদৰ দল এটাক সাক্ষাৎ কৰে।
সাংসদসকলৰ সৈতে সাক্ষাৎ কৰাৰ অন্তত মোদীয়ে ছ’চিয়েল মিডিয়া প্লেটফৰ্মত বৈঠকৰ এখন ফটো পোষ্ট কৰি এইদৰে কয়-, “অৰুণাচল প্ৰদেশ আৰু নাগালেণ্ডৰ সাংসদসকলৰ সৈতে আলোচনাত বিলিত হও। বানপানীৰ পিছত এই ৰাজ্যসমূহৰ পৰিস্থিতিৰ বিষয়ে আলোচনা কৰিলোঁ। এই প্ৰত্যাহ্বানসমূহ মোকাবিলা কৰিবলৈ কেন্দ্ৰীয় চৰকাৰে নিজ নিজ ৰাজ্য চৰকাৰসমূহৰ সৈতে ঘনিষ্ঠভাৱে কাম কৰি যাব। সকলোৰে মংগল আৰু সুৰক্ষাৰ বাবে প্ৰাৰ্থনা কৰিলো।”
বৈঠকত প্ৰধানমন্ত্ৰী মোদীয়ে দুয়োখন ৰাজ্যৰ পৰিস্থিতি সম্পৰ্কে বিতং তথ্য গ্ৰহণ কৰি ক্ষতিগ্ৰস্ত অঞ্চলসমূহলৈ কেন্দ্ৰীয় চৰকাৰৰ পৰা সম্ভৱপৰ সকলো সহায়ৰ আশ্বাস দিয়ে। সংসদীয় পৰিক্ৰমা আৰু সংখ্যালঘু পৰিক্ৰমা মন্ত্ৰী কিৰেন ৰিজিজুৰ নেতৃত্বত গঠিত এই প্ৰতিনিধি দলটোত অৰুণাচল পূবৰ সাংসদ তাপিৰ গাও, ৰাজ্যসভাৰ সাংসদ টাই তাগক, নাগালেণ্ড কংগ্ৰেছৰ সাংসদ এছ ছুপংমেইৰেন জামিৰ, ৰাজ্যসভাৰ সাংসদ এছ ফাংনন কনিয়াক আদিয়ে অংশগ্ৰহণ কৰে।
কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজুৱে এক্স-পোষ্টত লিখিছে যে-অৰুণাচল প্ৰদেশ আৰু নাগালেণ্ডৰ সাংসদসকলে মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াক নতুন দিল্লীৰ সংসদ ভৱনত সাক্ষাৎ কৰি সাম্প্ৰতিক বান পৰিস্থিতিৰ বিষয়ে অৱগত কৰে। মাননীয় প্ৰধানমন্ত্ৰীয়ে পূৰ্ণ সমৰ্থনৰ আশ্বাস দি ইতিমধ্যে ক্ষতিগ্ৰস্ত লোকসকলক সময়মতে সাহায্য, পুনৰুদ্ধাৰ আৰু সাহায্য নিশ্চিত কৰাৰ বাবে প্ৰয়োজনীয় নিৰ্দেশনা জাৰি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
