দিল্লীত কেদাৰনাথ মন্দিৰ নিৰ্মাণক লৈ আৰম্ভ হৈছে বিতৰ্ক৷ দিল্লীত এই মন্দিৰ নিৰ্মাণৰ তীব্ৰ বিৰোধীতা কৰিছে জ্যোতিৰ্মঠৰ শংকৰাচাৰ্য স্বামী অভিমুক্তেশ্বৰানন্দই৷ ১০ জুলাইত উত্তৰ-পশ্চিম দিল্লীৰ বুৰাৰিৰ কাষত হিৰাংকি পাহাৰত কেদাৰনাথ মন্দিৰ নিৰ্মাণৰ বাবে যি ভূমি চিনাক্ত কৰা হৈছে তাতেই ভূমি পুজনত অংশ লৈছিল উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে৷
সেইদিনাই এটি নতুন কেদাৰনাথ মন্দিৰ নিৰ্মাণৰ আধাৰশীলাও স্থাপন কৰা হয়৷ এই আধাৰশীলা স্থাপনৰ তীব্ৰ বিৰোধীতা কৰিছে স্বামী অভিমুক্তেশ্বৰানন্দই৷ তেওঁ লগতে অভিযোগ আনিছে যে মূল কেদাৰনাথ মন্দিৰৰ গৰ্ভগৃহত সোনৰ প্ৰলেপ লগোৱা কামত কেইবাকোটি টকাৰ বিত্তীয় কেলেংকাৰীও হৈছে৷ সেই কেলেংকাৰীৰ তদন্ত আকৌ দাবী কৰিছে শংকৰাচাৰ্যগৰাকীয়ে৷ শংকৰাচাৰ্যই কয়, ‘কেদাৰনাথ মন্দিৰৰ পৰা ২২৮ কিঃগ্ৰাঃ সোন চুৰি হৈছে৷ এই হিচাপ কোনে দিব?’ বৰ্তমান মুম্বাইত আছে স্বামী অভিমুক্তেশ্বৰানন্দ৷ অনন্ত আম্বানী আৰু তেওঁৰ পত্নী ৰাধিকা মাৰ্চেণ্টৰ বিবাহৰ আশীৰ্বাদ অনুষ্ঠানত যোগ দিবলৈ মুম্বাইলৈ গৈছে স্বামী অভিমুক্তেশ্বৰানন্দ৷
সোমবাৰে তেওঁ মুম্বাইতেই ৰাষ্ট্ৰীয় সংবাদ মাধ্যমৰ আগত কয়, ‘কেদাৰনাথ মন্দিৰ দিল্লীত নিৰ্মাণ কৰিবলৈ লোৱাটো ভুল সিদ্ধান্ত৷ ১২টা জ্যোতিৰ্লিংগৰ ভিতৰত কেদাৰনাথ অন্যতম৷ জ্যোতিৰ্লিংগৰ অৱস্থান আমি নিৰ্ণয় কৰিব নোৱাৰো৷ এয়া অত্যন্ত ভুল কাম কৰি আছে৷ কেদাৰনাথত সোন কেলেংকাৰীও হৈছে৷ ২২৮ কিঃগ্ৰাঃ সোন হেৰাইছে৷ কোনোৱে এই বিষয়টোক লৈ মাত নামাতে৷ আমি কেইবাবাৰো বিষয়টো উত্থাপন কৰিছো কিন্তু শাসকপক্ষ নিমাত৷ ইয়াৰ বাবে দায়ী কোন? এতিয়া আকৌ হঠাৎ সিদ্ধান্ত লৈছে যে দিল্লীত কেদাৰনাথ মন্দিৰ বনাব৷ এয়া হ’ব নোৱাৰে৷ তাত কেলেংকাৰী কৰি এতিয়া দিল্লীত মন্দিৰ সাজিব৷ আকৌ নতুনকৈ তাত কেলেংকাৰী চলাব৷’
উল্লেখ্য যে চাৰ ধামৰ চাৰি পবিত্ৰ হিন্দু মন্দিৰৰ ভিতৰত অন্যতম হৈছে কেদাৰনাথ ধাম৷ ইয়াৰোপৰি বাকী তিনিটা ধাম হৈছে, বদ্ৰীনাথ, গংগোত্ৰী, যমোনাত্ৰী৷ বিগত বৰ্ষত কেদাৰনাথ মন্দিৰৰ গৰ্ভগৃহত সোণৰ প্ৰলেপ দিয়াৰ কাম আৰম্ভ হৈছিল৷ সেই কামতেই ১২৮ কোটি টকাৰ বৃহৎ কেলেংকাৰী হৈছে বুলি অভিযোগ আনিছে কেদাৰনাথ মন্দিৰৰ এগৰাকী বৰিষ্ঠ পুৰোহিতে৷ তেওঁ দাবী কৰামতে, সোণৰ সলনি পিতলৰ প্ৰলেপ দিয়া হৈছে গৰ্ভগৃহত৷ কিন্তু মন্দিৰ কমিটিয়ে এই অভিযোগ প্ৰত্যাখান কৰিছে৷ ইফালে জ্যোতিৰ্মঠৰ শংকৰাচাৰ্যই সেই ঘটনাৰ তদন্তৰ দাবী কৰিছে৷ ইয়াৰ পূৰ্বে নিৰ্মাণকাৰ্য সম্পূৰ্ণ হোৱাৰ পূৰ্বেই অযোধ্যাৰ ৰাম মন্দিৰৰ প্ৰাণ প্ৰতিষ্ঠা কৰাৰো বিৰোধীতা কৰিছিল স্বামী অভিমুক্তেশ্বৰানন্দই৷
স্বামী অভিমুক্তেশ্বৰানন্দই নহয় দিল্লীত নতুনকৈ কেদাৰনাথ মন্দিৰ তৈয়াৰক লৈ বিক্ষোভ কাৰ্যসূচীও লোৱা হৈছে ৰুদ্ৰপ্ৰয়াগ জিলাত৷ দেওবাৰে কেদাৰনাথ মন্দিৰ নকৈ নিৰ্মাণ কৰাৰ বিৰোধিতাৰে বিক্ষোভ কৰিছে কেদাৰনাথ মন্দিৰৰ পুৰোহিতে৷ কেদাৰসভাৰ বেনাৰত উত্তৰাখণ্ডৰ ৰাজ্য চৰকাৰ আৰু মুখ্যমন্ত্ৰী পুষ্কৰ ধামীৰ বিৰুদ্ধে শ্লোগান দিছে বিক্ষোভকাৰীয়ে৷ কেদাৰ সভাৰ মুখপাত্ৰ পংকজ শুক্লাই কয়, ‘আমি মন্দিৰ নিৰ্মাণৰ বিৰুদ্ধে নাই৷ কিন্তু দিল্লীৰ এক ধৰ্মীয় ট্ৰাষ্টে তাত কেদাৰনাথ মন্দিৰ নিৰ্মণ কৰিব বিচাৰিছে, সেই কথাৰ আমি বিৰোধ কৰিছো৷ আনকি কেদাৰনাথ ধাম এলেকাৰ পৰা যদি এটা শিলো আঁতৰোৱা হয় তেন্তে তাত আৰু মন্দিৰৰ ধৰ্মীয় পবিত্ৰতা অক্ষুন্ন নাথাকিব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
