চিনেমাত আমি প্ৰত্যেকেই দেখিছো ছবিৰ নায়ক দৰিদ্ৰ থাকে, কষ্টেৰে জীৱনযাপন কৰি থাকে আৰু এদিন হঠাৎ নায়কে গম পায় যে তেওঁ কোটিপতিৰ সন্তান৷ বহুতেই ধাৰণা কৰে যে এয়া কেৱল কাল্পনিক জগততেই সম্ভৱ৷ বাস্তৱত এয়া ঘটিব পাৰে বুলি বহুতেই নাভাৱে৷ কিন্তু সেয়া ঘটিল ২৬ বছৰীয়া এগৰাকী যুৱকৰ সৈতে৷ এদিন হঠাৎ তেওঁ জানিব পাৰিলে যে তেওঁৰ পিতৃ এগৰাকী কোটিপতি৷ তাৰপিছত কি কৰিলে যুৱকজনে?
চীনৰ ২৬ বছৰ বয়সীয়া যুৱক চি কিংশুৱাইৰ জীৱন এক লহমাতেই সলনি হৈ গ’ল যেতিয়া তেওঁ জানিব পাৰিলে যে তেওঁৰ পিতৃ এজন কোটিপতি৷ জীৱনৰ এক গুৰুত্বপূৰ্ণ সময় তেওঁ অনাথ হিচাপেই কটালে৷ চীনৰ এক সংবাদমেলৰ সূত্ৰৰ খবৰ অনুসৰি তিনি মাহতে অপহৃত হৈছিল চি৷ ইয়াৰপিছতেই প্ৰায় দুই দশক ধৰি সেই যুৱকক বিচাৰিছিল পিতৃ মাতৃয়ে৷ কিন্তু ক’তো সন্ধান নাপালে যুৱকৰ৷
শেহতীয়াকৈ সেই হেৰুওৱা সন্তানৰ সন্ধান পাইছে পিতৃ মাতৃয়ে৷ সন্তানৰ প্ৰত্যাবৰ্তন উদযাপন কৰিবলৈ পাৰ্টীও দিছে পিতৃ মাতৃয়ে৷ উপহাৰ হিচাপে চি ক কেইবাটাও ফ্লেটৰ চাবি আৰু এখন বাহন উপহাৰ দিয়াৰ ইচ্ছা কৰিছিল পিতৃ মাতৃয়ে৷ কিন্তু চিয়ে সকলোবোৰ উপহাৰেই প্ৰত্যাখান কৰিছে৷ পৰিবৰ্তে কেৱল এটা ফ্লেটহে লৈছে৷ য’ত তেওঁ আৰু তেওঁৰ ভৱিষ্যতে হ’বলগীয়া পত্নীয়ে বসবাস কৰিব৷
চিয়ে এই সন্দৰ্ভত জনাই যে তেওঁ নিবিচাৰে এই বিপুল ঐশ্বৰ্যৰ ফলত তেওঁৰ জীৱনযাপনলৈ কোনো পৰিবৰ্তন আহক৷ চলি থাকিবলৈ যিখিনি লাগে সেইখিনি পালেই যথেষ্ট৷ বৰ্তমান তেওঁ এক লাইভ ষ্ট্ৰিমিং চেনেল খুলি তাৰপৰা কিছু আয় কৰে৷ চিৰ এই ঘটনা সামাজিক মাধ্যমত ভাইৰেল হৈছে৷ বহুতেই কৈছে চিয়ে সম্পত্তি প্ৰত্যাখান কৰাটোও তেওঁৰ এটা পাব্লিচিটি ষ্টাণ্ট৷ বহুতেই তেওঁৰ দৃঢ় মানসিকতাৰো প্ৰশংসা কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
