৩৭ বছৰীয়া মহিলাই ১২ বছৰীয়া কিশোৰী হৈ কৰিলে প্ৰতাৰণা, কিন্তু কেনেকৈ?

এগৰাকী ৩৭ বছৰীয়া মহিলাই ১২ বছৰীয়া কিশোৰীৰ দৰে আচৰণ কৰি ১৪ মাহে প্ৰৱঞ্চনা কৰিলে এটা পৰিয়ালক। বিগত ৩ জুনত পোহৰলৈ আহে এই ঘটনা। এগৰাকী ৩৭ বছৰীয়া মহিলাই নিজকে ১২ বছৰীয়া কিশোৰী বুলি পৰিচয় দি বহুদিনৰ পৰা বহুজনক কৰি আহিছিল প্ৰৱঞ্চনা। কিন্তু কেনেকৈ সম্ভৱ এই কথা। বিশ্বাস কৰকেই বা নকৰকেই ব্ৰাজিলত সংঘটিত হৈছে এই ঘটনা। নিজকে অটিজিম ৰোগত আক্ৰান্ত বুলি পৰিচয় দি দীৰ্ঘদিনে মহিলাগৰাকীয়ে প্ৰৱঞ্চনা কৰি আহিছিল পৰিয়ালটোক। অটিজিম ৰোগত আক্ৰান্ত শিশুৰ শাৰীৰিক গঠন বয়সৰ মাজত পাৰ্থক্য দেখা যায়। অৱশ্য এই ৰোগৰ ক্ষেত্ৰতো ২৫ বছৰ বয়সৰ পাৰ্থক্য যথেষ্ট বেছি। ইতিমধ্যে ৩ জুনত প্ৰতাৰণাৰ অভিযোগ আৰক্ষীয়ে গ্ৰেপ্তাৰ কৰিছে আমাণ্ডা মাৰিয়া ছৌজা ডি অলিভেইৰা নামৰ মহিলাগৰাকীক। তেওঁৰ বিৰুদ্ধে প্ৰতাৰণা আৰু ভুৱা পৰিচয় ব্যৱহাৰৰ অভিযোগ উত্থাপিত হৈছে। তদন্তকাৰী বিষয়াৰ মতে অলিভেইৰাই ভুৱা পৰিচয় ব্যৱহাৰ কৰি ১৪ মাহ ধৰি এটি পৰিয়ালৰ সৈতে বাস কৰিছিল। সমগ্ৰ ব্ৰাজিলত চাঞ্চল্য সৃষ্টি কৰা এই ঘটনাৰ পিছতে দেশখনৰ চাও পাওলো, ৰিঅ’ ডি জেনেইৰো, মিনাছ জেৰাইছ, ৰিঅ’ গ্ৰান্দে ড’ ছুল আৰু গইয়াছতো মহিলগৰাকীয়ে বহু পৰিয়ালক প্ৰৱঞ্চনা কৰাৰ অভিযোগ উত্থাপিত হৈছে।

৩৭ বছৰীয়া মহিলাগৰাকী গ্ৰেপ্তাৰ হোৱাৰ পিছতে আৰক্ষীয়ে এক বিবৃতিযোগে সমগ্ৰ ঘটনাৰ বিৱৰণী এইদৰে উল্লেখ কৰিছে যে-এগৰাকী ১২ বছৰীয়া ছোৱালীৰ চৰিত্ৰটো বিশ্বাসযোগ্য কৰি তুলিবলৈ মহিলাগৰাকীয়ে নিয়মিতভাৱে শিশুৰ গাখীৰ খোৱাৰ বটল, খেলনা ব্যৱহাৰ কৰিছিল আৰু শিশুৰ দৰে আচৰণ কৰিছিল। অলিভেইৰাই নিজৰ মুখমণ্ডলক লৈ মানুহৰ আগত প্ৰকাশ কৰিছিল যে শৈশৱতে তেওঁক জোৰপূৰ্বকভাৱে হৰম’ন প্ৰয়োগ কৰা হৈছিল, যাৰ ফলত তেওঁৰ শাৰীৰিক গঠন এনে হৈ পৰিছে। যিটো পৰিয়াল প্ৰতাৰণাৰ বলি হৈছিল সেই পৰিয়ালটোৰে এজন সদস্যৰ অলিভেইৰাৰ ওপৰত লাহে লাহে সন্দেহ ওপজে আৰু আৰক্ষীক খবৰ দৰে। একেদৰে আৰক্ষীয়েও অনুসন্ধানৰ অন্তত ব্ৰাজিলৰ কেইবাখনো চহৰত অনুৰূপ ঘটনা সংঘটিত হোৱাৰ তথ্য লাভ কৰে। অৱশ্যে প্ৰৱঞ্চনাৰ বলি হোৱা পৰিয়ালটোৱে ৩৭ বছৰীয়া অলিভেইৰা সন্দৰ্ভত কয় যে-অলিভেইৰাক এজনী কিশোৰীৰ দৰে লাগিছিল। তেওঁ একেবাৰে শিশুৰ দৰে আচৰণ কৰিছিল, শিশুৰ দৰে কথা পাতিছিল, নিজকে অটিষ্টিক বুলি কৈছিল আৰু সদায় হুডিৰ দৰে মুখমণ্ডলৰ সৰহভাগ ঢাক খাই থকা কাপোৰ পৰিধান কৰিছিল। কিন্তু অলিভেইৰাই কেতিয়াও টকা-পইচা বিচৰা নাছিল। অলিভেইৰাই তেওঁলোকক বাৰে বাৰে অনুৰোধ কৰিছিল যাতে তেওঁক শিশু সুৰক্ষা পৰিষদৰ ওচৰলৈ নিয়া নহয়। মহিলাগৰাকীৰ শৰীৰৰ বিভিন্ন অংশত কিছু উদ্বেগজনক বিন্ধাৰ দৰে দাগ আছিল যাৰ বাবে তেওঁলোকে অলিভেইৰাৰ শৈশৱতে জোৰপূৰ্বক হৰম’ন প্ৰয়োগ কৰা কথাটোত সহজে পতিয়ন গৈছিল।

এই প্ৰতিবেদন যুগুতাইছে মানসজ্যোতিয়ে