দীঘল চুলিৰ আঁৰত কোন আছিল? কিয় ৭ নম্বৰ জাৰ্ছী পৰিধান কৰে ধোনীয়ে?

ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীয়ে আজি তেওঁৰ ৪৫ সংখ্যক জন্মদিন উদযাপন কৰিছে। বিশ্ব ক্ৰিকেটৰ অন্যতম সফল অধিনায়ক হিচাপে পৰিচিত ধোনীয়ে খেলপথাৰত বহু কৃতিত্ব গঢ়িছে। কিন্তু ক্ৰিকেটৰ বাহিৰে ধোনীৰ ব্যক্তিগত জীৱনত এনে বহু আকৰ্ষণীয় কাহিনী আছে যি হয়টো বহু অনুৰাগীয়ে নাজানে, আহক জানো ধোনীৰ তেনে ৭টা বিশেষ  ঘটনা বা বিশেষত্ব

ধোনীয়ে সহজে ফোন ৰিভিচ নকৰে বুলি ক্ৰিকেটকে ধৰি বিভিন্ন মহলত সদায়ে আলোচনাৰ বিষয় হৈ আহিছে। ভি ভি এছ লক্ষ্মণ, বিৰাট কোহলি, আনকি তেওঁৰ ঘনিষ্ঠ বন্ধু সুৰেশ ৰাইনায়ো বহু সময়ত অভিযোগ কৰিছে যে ধোনীয়ে সাধাৰণতে কাৰো ফোন সহজে ৰিচিভ নকৰে বা উত্তৰ নিদিয়ে। এই বিষয়ে এটা অনুষ্ঠানত ধোনীয়ে নিজেই ব্যাখ্যা দি কৈছিল, ‘প্ৰযুক্তি আৰু মোৰ মাজত বিশেষ সম্পৰ্ক নাই। মই মোবাইল ফোন বেছি ব্যৱহাৰ নকৰোঁ। বহুতে কয় যে মই ফোনৰ উত্তৰ নিদিওঁ, কিন্তু তেনে নহয়। প্ৰয়োজন হ’লেহে মই মোবাইল বা প্ৰযুক্তি ব্যৱহাৰ কৰোঁ আৰু দেৰিকৈ হলেও প্ৰয়োজনীয় ফোনকলবোৰৰ উত্তৰো দিও।’

২০১১ চনত ভাৰতক বিশ্বকাপ জয় কৰোৱাৰ পিছত ধোনীক ভাৰতীয় টেৰিট’ৰিয়েল আৰ্মীয়ে ‘লেফটেনেণ্ট কৰ্ণেল’ৰ উপাধি প্ৰদান কৰিছিল। কিন্তু তেওঁ এই সন্মানক কেৱল এটা উপাধি হিচাপে গ্ৰহণ নকৰি বাস্তৱতেো সেনাৰ প্ৰশিক্ষণ গ্ৰহণৰ সিদ্ধান্ত লৈছিল ধোনীয়ে। ২০১৫ চনত তেওঁ পেৰাছুট ৰেজিমেণ্টৰ অধীনত পেৰা-ট্ৰুপাৰ হোৱাৰ বাবে প্ৰশিক্ষণ লয়। এই প্ৰশিক্ষণৰ অংশ হিচাপে আগ্ৰা বিমানঘাটিত AN-32 বিমানৰ পৰা ১৫ হাজাৰ ফুট উচ্চতাৰ পৰা ৫বাৰ সফলভাৱে পেৰাছুট জাঁপ দিছিল ধোনীয়ে।

ভাৰতীয় দলত স্থান লাভ কৰাৰ আগতে ধোনীয়ে পৰিয়ালৰ আৰ্থিক সহায়ৰ বাবে চৰকাৰী চাকৰি কৰিছিল। ২০০১ চনৰ পৰা ২০০৩ চনলৈ তেওঁ পশ্চিমবংগৰ খড়গপুৰ ৰে’ল ষ্টেচনত ট্ৰেইন টিকট পৰীক্ষক (TTE) হিচাপে কৰ্মৰত আছিল। তেওঁ প্ৰথম মাহিলী দৰমহা হিচাপে লাভ কৰিছিল প্ৰায় ৩ হাজাৰ টকা।

কেৰিয়াৰৰ আৰম্ভণিৰ সময়ত ধোনীৰ দীঘল চুলিকোছাই বিশ্বজুৰি এক নতুন ধাৰাৰ সৃষ্টি কৰিছিল। আনকি পাকিস্তান ভ্ৰমণৰ সময়ত পাকিস্তানৰ তদানীন্তন ৰাষ্ট্ৰপতি পাৰভেজ মুশ্বাৰফেও ধোনীৰ চুলিৰ প্ৰশংসা কৰি চুলি নাকটিবলৈ পৰামৰ্শ দিছিল। আচলতে ধোনী বলীউড অভিনেতা জন আব্ৰাহামৰ অনুৰাগী আছিল। জনৰ ষ্টাইল দেখি অনুপ্ৰাণিত হৈ তেওঁ দীঘলকৈ চুলি ৰাখিবলৈ আৰম্ভ কৰিছিল।

এসময়ত এটা গুজৱ বহুলভাৱে প্ৰচাৰ হৈছিল যে ধোনীয়ে প্ৰতিদিনে ৪–৫ লিটাৰ গাখীৰ পান কৰে। পিছত তেওঁ নিজেই এই কথা স্বীকাৰ কৰি কৈছিল যে তেওঁ ৪-৫ লিটাৰ গাখীৰ নহলেও দিনটোত প্ৰায় এক লিটাৰ গাখীৰ খাইছিল। গাখীৰৰ লগতে মিল্ক শ্বেক আৰু চকলেট খুব ভাল পাইছিল ধোনীয়ে।

ধোনীৰ বহুকেইখন বিলাসী বাহন আছে কিন্তু বাস্তৱত তেওঁ বাহনতকৈ অধিক ভাল পায় মটৰ চাইকেল। ৰাঁচীস্থিত তেওঁৰ ফাৰ্মহাউছত থকা দুমহলীয়া গেৰেজত ১৫০ৰো অধিক বাইক সংৰক্ষিত আছে। ইয়াত বিশ্বৰ আধুনিক আৰু দামী মটৰ চাইকেলৰ লগতে ভাৰতৰ পুৰণি ৰাজদূত আৰু Yamaha RD350ৰ দৰে ঐতিহাসিক মডেলৰ বাইকো আছে। বিশেষ কথা হৈছে, অৱসৰ সময়ত ধোনীয়ে নিজৰ বাইকসমূহ নিজ হাতে পৰিষ্কাৰ আৰু মেৰামতি কৰিবলৈ ভাল পায়।

এম এছ ধোনীয়ে ৭ নম্বৰ জাৰ্ছী পৰিধান কৰাৰ আঁৰত আছে এক পৰিসংখ্যা। ধোনীৰ জন্ম হৈছিল ১৯৮১ চনৰ ৭ জুলাইত । জন্মদিন আৰু মাহ (৭ জুলাই) তথা জন্মৰ বছৰ (১৯৮১, য’ত ৮ বিয়োগ ১ কৰিলে ৭ পোৱা যায়) এই সকলোবোৰৰ সৈতে ৭ সংখ্যাটো জড়িত থকাৰ বাবেই তেওঁ এই সংখ্যাটো নিজৰ জাৰ্ছীৰ বাবে বাছি লৈছিল বুলি ধোনীৰ ঘনিষ্ঠ বহুকেইজন লোকে বিভিন্ন সময়ত সদৰী কৰিছে।

মহেন্দ্ৰ সিং ধোনী কেৱল এগৰাকী সফল ক্ৰিকেটাৰ নহয়; শৃংখলা, সৰলতা, দেশপ্ৰেম আৰু ব্যক্তিত্বৰ বাবে তেওঁ লাখ লাখ অনুৰাগীৰ অনুপ্ৰেৰণা। খেলপথাৰতেই হওক বা ব্যক্তিগত জীৱনত, তেওঁৰ প্ৰতিটো অধ্যায়েই এক অনন্য কাহিনী।

এই প্ৰতিবেদন যুগুতাইছে মানসজ্যোতিয়ে