‘অসমত এতিয়া ‘মদ জেহাদ’ চলি আছে। অসমৰ শদিয়াৰ পৰা ধুবুৰীলৈ সকলোতে ৯০ শতাংশই ভেজাল সুৰা বিক্ৰী হৈ আছে’ -এই গুৰুতৰ অভিযোগ উত্থাপন কৰিছে নাট্যকৰ্মী তথা পৰিচালক হিংমাশু প্ৰসাদ দাসে। ‘একেটা ব্ৰেণ্ডৰে সুৰা ৱাইনশ্বপভেদে পৃথক পৃথক’ হোৱা বুলিও অসম Live24ৰ Podcast অনুষ্ঠানত এই বিস্ফোৰক অভিযোগ উত্থাপন কৰে হিংমাশু প্ৰসাদ দাসে।
‘জনজাতীয় সম্প্ৰদায়ৰ মাজত সুৰা সেৱন কৰাটো এটা পৰম্পৰা কিন্তু সাংঘাটিকভাৱে চিন্তনীয় কথাটো হৈছে সম্প্ৰতি ৰাজ্যৰ অলিয়ে-গলিয়ে হাজাৰ-হাজাৰ ৱাইনশ্বপ গঢ় লৈ উঠিছে, যাৰ ফলত সৰু সৰু অবুজ লৰাবোৰৰ হাততো এতিয়া সহজলভ্য হৈ পৰিছে সুৰা। যাৰ পৰিণতিত অসমৰ হাজাৰ হাজাৰ পৰিয়াললৈ অশান্তি নামি আহিছে। হাজাৰ হাজাৰ ঘৰ ধ্বংস হৈ পৰিছে। লিভাৰ নষ্ট হোৱা, ৰাস্তা-ঘাটে যুদ্ধ বা কাজিয়া কৰি ফুৰা ঘূণীয়া প্ৰজন্ম লৈ ভাৰত কেনেকৈ বিশ্বগুৰু হ’ব’ বুলিও হিমাংশু প্ৰসাদ দাসে চৰকাৰক কঠোৰ ভাষাৰে সমালোচনা কৰে। সৰু সৰু কিশোৰৰ হাতত সুৰা সহজলভ্য হৈ পৰা এই প্ৰক্ৰিয়াবোৰক হিংমাশু প্ৰসাদ দাসে ‘মদ জেহাদ’ বুলি অভিহিত কৰে।
কেৱল ‘মদ জেহাদ’-এ নহয়, গুৱাহাটী মহানগৰীৰ অলিয়ে-গলিয়ে নিশাৰ অন্ধকাৰত বিভিন্ন অনৈতিক কাৰ্যকলাপো হৈ থাকে বুলি মন্তব্য কৰে। নাম প্ৰকাশ নকৰাকৈ ৰাজ্যৰ এজন ৰাজনৈতি নেতাৰ উদ্ধৃতিৰে তেওঁ মন্তব্য কৰে যে- গুৱাহাটী ছুইজাৰলেণ্ড হ’ব নে নহয় নাজানো কিন্তু অচিৰেই গুৱাহাটী যে বেংককলৈ পৰ্যৱসিত হ’ব তাত কোনো সন্দেহ নাই। মহানগৰীৰ গণেশগুৰি, জু-ৰোডত নিশা হলেই বিভিন্ন অনৈতিক কাৰ্যকলাপ সংঘটিত হয়’ বুলি অভিযোগ উত্থাপিত কৰে নাট্যকৰ্মী তথা পৰিচালক হিমাংশু প্ৰসাদ দাসে।
অসম Live24ৰ Podcastটোত হিমাংশু প্ৰসাদ দাসে লগতে কয় যে- আদৰ্শগত পাৰ্থক্য থাকিলেও স্বীকাৰ কৰিবই লাগিব যে প্ৰকৃততে RSS কৰাসকল সাংঘাটিক ভদ্ৰ, তেওঁলোকৰ সাংঘাটিক পাৰিপাটি জীৱনশৈলী আছে। কিন্তু বৰ্তমানৰ চৰকাৰখনে সুৰা বিক্ৰীৰ প্ৰতিযোগিতা পাতিছে বুলিও অভিযোগ আনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
