যোৰহাটত পোহৰলৈ আহিছে এক চাঞ্চল্যকৰ ঘটনা। পিতৃ-মাতৃ ঘৰত নথকাৰ সুযোগ লৈ নিজ ঘৰৰ লকাৰ ভাঙি প্ৰায় ৫০ লাখ টকাৰ সোণৰ অলংকাৰ আৰু নগদ ধন লৈ উধাও হল য়াশ্ব আগৰৱাল নামৰ এজন যুৱক। লুট কৰা ধন-সোণৰ কিছু অংশ বিক্ৰী কৰি প্ৰেমিকাৰ সৈতে কিছুদিন বিলাসী জীৱন কটোৱাৰ লগতে প্ৰেমিকাক দামী উপহাৰ দিয়াৰ কথাও পোহৰলৈ আহিছে। য়াশ্ব আগৰৱালাই পিতৃ-মাতৃ ঘৰত নথকাৰ সুযোগ লৈ লকাৰ খুলি সোণৰ অলংকাৰ আৰু নগদ ধন লৈ পলায়ন কৰে। পৰৱৰ্তী সময়ত লুট কৰা সোণৰ অলংকাৰ বিক্ৰী কৰি লাভ কৰা ধন আৰু লকাৰৰ পৰা নিয়া নগদ ধনৰ একাংশ প্ৰেমিকাৰ বাবে খৰচ কৰা বুলি অভিযোগ উঠিছে।
অভিযোগ অনুসৰি, যুৱকজনে প্ৰেমিকাক প্ৰায় ডেৰ লাখ টকা মূল্যৰ এটা আইফোন উপহাৰ দিয়াৰ লগতে নগদ ধনো প্ৰদান কৰে। ইয়াৰ উপৰিও প্ৰেমিকাৰ সৈতে অৰুণাচললৈ ভ্ৰমণলৈ যোৱাৰ কথাও পোহৰলৈ আহিছে। মুঠতে প্ৰায় ৪ লাখ টকা প্ৰেমিকা আৰু বিলাসী জীৱন-যাপনৰ নামত খৰচ কৰা বুলি জানিব পৰা গৈছে। এই সমগ্ৰ ঘটনাত য়াশ্ব অকলে জড়িত নাছিল বুলিও অভিযোগ উঠিছে। জনৈক চুমানি নামৰ এজন সাংবাদিক আৰু ৰোহিত প্ৰসাদ নামৰ এজন ব্যৱসায়ীয়েও যুৱকজনক সহযোগ কৰা বুলি অভিযোগ কৰা হৈছে। অৱশ্যে ঘটনাটোৰ সৈতে জড়িত লোকসকলৰ বিৰুদ্ধে উত্থাপিত অভিযোগৰ সত্যতা তদন্তৰ পাছতহে স্পষ্ট হ’ব।
ঘটনাৰ পাছত পিতৃ-মাতৃয়ে যুৱকজনক বিচাৰি উলিয়াবলৈ চেষ্টা চলায়। অৱশেষত আহমেদাবাদৰ পৰা য়াশ্বক পৰিয়ালে যোৰহাটলৈ ঘূৰাই আনে বুলি জানিব পৰা গৈছে। আনহাতে, ঘটনাত সহযোগ কৰাৰ অভিযোগ উঠা সাংবাদিকজন বৰ্তমানেও পলাতক হৈ থকা বুলি জানিব পৰা গৈছে। ঘৰৰ সঞ্চিত ধন-সোণ নিজৰ প্ৰেম-সম্পৰ্ক আৰু বিলাসিতাৰ বাবে ব্যৱহাৰ কৰাৰ অভিযোগে সমগ্ৰ ঘটনাটোক অধিক চাঞ্চল্যকৰ কৰি তুলিছে। লকাৰ খুলি সোণ-ধন নোহোৱা হোৱাৰ পাছত পিতৃ-মাতৃয়ে ঘটনাটো জানিব পাৰি হতভম্ব হৈ পৰে।
সমগ্ৰ ঘটনাটোক কেন্দ্ৰ কৰি যোৰহাটত তীব্ৰ চাঞ্চল্যৰ সৃষ্টি হৈছে। আৰক্ষীৰ তদন্ত আগবাঢ়াৰ লগে লগে লুট কৰা সোণ-ধন কিমান আছিল, কিমানখিনি উদ্ধাৰ হৈছে আৰু ঘটনাটোত আন কোন কোন লোক জড়িত আছিল, সেই সকলো তথ্য ক্ৰমে স্পষ্ট হোৱাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
