মধ্যপ্ৰদেশৰ ছিন্দৱাড়া জিলাৰ জুনাৰদেও অঞ্চলৰ বিচবেহৰি গাঁৱৰ এখন চৰকাৰী বিদ্যালয়ক লৈ চাঞ্চল্যৰ সৃষ্টি হৈছে। বিদ্যালয়খনৰ শিক্ষক-শিক্ষয়িত্ৰীৰ বিৰুদ্ধে ছাত্ৰ-ছাত্ৰীসকলে গুৰুতৰ অভিযোগ উত্থাপন কৰিছে। এই অভিযোগৰ এটা ভিডিঅ’ ছ’চিয়েল মিডিয়াত ভাইৰেল হোৱাৰ পিছতে বিষয়টো চৰ্চালৈ আহিছে। ভাইৰেল ভিডিঅ’টোত একাংশ ছাত্ৰ-ছাত্ৰীয়ে অভিযোগ কৰা দেখা গৈছে যে বিদ্যালয়লৈ শিক্ষক-শিক্ষয়িত্ৰী আহিলেও তেওঁলোকে নিয়মীয়াকৈ পাঠদান নকৰে। আনকি বিদ্যালয় ছুটী হোৱাৰ নিৰ্ধাৰিত সময়ৰ বহু আগতেই ছাত্ৰ-ছাত্ৰীসকলক ঘৰলৈ পঠিয়াই দিয়া হয় বুলিও অভিযোগ উঠিছে।
ছাত্ৰ-ছাত্ৰীসকলৰ অভিযোগ অনুসৰি, তেওঁলোকক আগতীয়াকৈ ঘৰলৈ পঠিয়াই দিয়াৰ পিছত শিক্ষক আৰু শিক্ষয়িত্ৰীগৰাকীয়ে বাথৰুমত সোমাই ভিতৰৰ পৰা দুৱাৰ বন্ধ কৰি দিয়ে। এই সময়ছোৱাত ছাত্ৰ-ছাত্ৰীক বাথৰুমৰ ভিতৰলৈ যাবলৈও দিয়া নহয় বুলি অভিযোগ কৰা হৈছে। ইয়াৰ উপৰি দুয়োগৰাকী শিক্ষক-শিক্ষয়িত্ৰী বহু সময় মোবাইল ফোনত ব্যস্ত থাকে আৰু পঢ়া-শুনাত বিশেষ গুৰুত্ব নিদিয়ে বুলিও ছাত্ৰ-ছাত্ৰীসকলে অভিযোগ কৰিছে। বিদ্যালয়খনৰ একাংশ ছাত্ৰ-ছাত্ৰীয়ে শিক্ষক-শিক্ষয়িত্ৰীৰ আপত্তিজনক দৃশ্য বুলি দাবী কৰা কিছু দৃশ্য মোবাইলত ৰেকৰ্ড কৰি ছ’চিয়েল মিডিয়াত প্ৰকাশ কৰাৰ পিছতে বিষয়টো অধিক চৰ্চালৈ আহে।
এই অভিযোগ বিদ্যালয়খনৰ শিক্ষক-ইনচাৰ্জ আৰু এগৰাকী অতিথি শিক্ষয়িত্ৰীৰ বিৰুদ্ধে উত্থাপন হৈছে। ঘটনাটো প্ৰথমে গাঁওসভাত উত্থাপন হৈছিল। পিছত বিষয়টো জিলা প্ৰশাসনৰ ওচৰলৈ যায়। বিদ্যালয়খনৰ ছাত্ৰ-ছাত্ৰীৰ অভিভাৱকসকলে দুয়োগৰাকী শিক্ষক-শিক্ষয়িত্ৰীক বিদ্যালয়ৰ পৰা আঁতৰাই নতুন শিক্ষক নিযুক্তিৰ দাবী জনাইছে। অভিভাৱকসকলৰ মতে, বিদ্যালয়ত শিশুসকলৰ বাবে সুস্থ, নিৰাপদ আৰু শৃংখলাবদ্ধ পৰিৱেশ থকাটো অতি জৰুৰী। শিক্ষক-শিক্ষয়িত্ৰীৰ এনে আচৰণে ছাত্ৰ-ছাত্ৰীৰ পঢ়া-শুনাত বেয়া প্ৰভাৱ পেলাব পাৰে বুলিও তেওঁলোকে উদ্বেগ প্ৰকাশ কৰিছে।
স্থানীয় লোকসকলৰ অভিযোগ অনুসৰি, শিক্ষক দুগৰাকীৰ বিৰুদ্ধে ইয়াৰ পূৰ্বেও খণ্ড শিক্ষা বিষয়া আৰু জনজাতি কল্যাণ বিভাগৰ বিষয়াসকলৰ ওচৰত অভিযোগ দিয়া হৈছিল। কিন্তু অভিযোগ দিয়াৰ পিছতো কোনো উল্লেখযোগ্য ব্যৱস্থা গ্ৰহণ কৰা হোৱা নাছিল বুলি তেওঁলোকে দাবী কৰিছে। এই বিষয়টোক লৈ ক্ষুব্ধ গাঁওবাসীয়ে ১৬ আগষ্টত অনুষ্ঠিত গাঁওসভাৰ বৈঠকত দুয়োগৰাকী শিক্ষক-শিক্ষয়িত্ৰীক বিদ্যালয়ৰ পৰা আঁতৰোৱাৰ দাবী জনায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
