গুৱাহাটীৰ বিলাস ইন হোটেলত সংঘটিত নৃশংস গুলীচালনাৰ ঘটনাক লৈ এতিয়াও অব্যাহত আছে চাঞ্চল্য। সম্পত্তি আৰু হোটেলৰ লীজকেন্দ্ৰিক বিবাদৰ পৰিণতিত সংঘটিত হোৱা বুলি সন্দেহ কৰা এই ঘটনাত এটা পৰিয়ালৰ কেইবাজনো সদস্যৰ মৃত্যুৱে সকলোকে শোকস্তব্ধ কৰি তুলিছে। এনে পৰিস্থিতিতে নিহত দেৱৰ্ষি ভৰালীৰ এগৰাকী বন্ধুৱে অভিযুক্তৰ বিৰুদ্ধে কঠোৰতম ব্যৱস্থা গ্ৰহণৰ দাবী জনাই ক্ষোভ প্ৰকাশ কৰিছে।
বন্ধুগৰাকীয়ে আৰক্ষীক হাতযোৰ কৰি অনুৰোধ জনাই কয় যে ২৪ ঘণ্টাৰ ভিতৰত দোষীক এনকাউণ্টাৰ কৰক। তেওঁৰ মতে, এটা পৰিয়ালক এনেদৰে শেষ কৰি দিয়া ঘটনাক কোনো কাৰণতে সহজভাৱে ল’ব নোৱাৰি।
তেওঁ কয়, ‘২৪ ঘণ্টাৰ ভিতৰত দোষীক এনকাউণ্টাৰ কৰক। এই নাৰকীয় কাণ্ডত যিসকল জড়িত আছে, তেওঁলোকক এৰি দিব নালাগে। যদি আৰক্ষীয়ে অভিযুক্তক এনকাউণ্টাৰ কৰিব নোৱাৰে, তেন্তে তেওঁলোকক বাহিৰলৈ ওলাই আহিবলৈ দিয়া হওক। ১৪ বছৰ জে’ল খাতিবলৈ সাজু আছোঁ, সিহঁতক শেষ কৰি দিম।’
‘সহজ কথা নহয়, এটা পৰিয়াল শেষ কৰি দিছে’
দেৱৰ্ষি ভৰালীৰ বন্ধুগৰাকীয়ে লগতে কয় যে ‘এটা পৰিয়ালৰ কেইবাজনো সদস্যক হেৰুৱাবলগীয়া হোৱা ঘটনাটো কোনো সাধাৰণ ঘটনা নহয়। তেওঁৰ মতে, এনে ভয়ংকৰ কাণ্ডত জড়িত লোকসকলক কোনো কাৰণতে ৰেহাই দিয়া উচিত নহয়। জন্তু সদৃশ মানুহ পৃথিৱীত থকাটো নিবিচাৰোঁ। সেয়ে কৈছোঁ, দোষীক শীঘ্ৰে এনকাউণ্টাৰ কৰক।’
উল্লেখ্য যে গুৱাহাটীৰ বিলাস ইন হোটেলত সংঘটিত গুলীচালনাৰ ঘটনাত হোটেলখনৰ স্বত্বাধিকাৰী হেলেনা ভৰালী, তেওঁৰ পুত্ৰ দেৱৰ্ষি ভৰালী, দেৱৰ্ষিৰ পত্নী ৰিণিকা কাশ্যপ আৰু হেলেনাৰ ভাতৃ ভূদেৱ ভৰালীৰ লগতে পদপথৰ ব্যৱসায়ী নাৰায়ণ দাস নিহত হয়। আনহাতে, হেলেনা ভৰালীৰ কেয়াৰটেকাৰ সত্যেন্দ্ৰ পাঠক আহত হৈ চিকিৎসাধীন হৈ আছে।
এই ঘটনাৰ পিছতে অভিযুক্ত ঘনকান্ত গগৈক আৰক্ষীয়ে গ্ৰেপ্তাৰ কৰাৰ লগতে এটা .৩২ ব’ৰৰ পিষ্টল জব্দ কৰা হৈছে বুলি জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
