ৰাজ্যত পুনৰ সংঘটিত হৈছে এক চাঞ্চল্যকৰ ঘটনা। প্ৰেমৰ প্ৰস্তাৱ প্ৰত্যাখ্যান কৰাৰ বাবেই এগৰাকী ছাত্ৰীৰ ওপৰত ৰাজপথতে চলিল ভয়ংকৰ আক্ৰমণ। বিদ্যালয়ৰ পৰা ঘৰলৈ উভতি অহাৰ পথতে এগৰাকী দ্বাদশ শ্ৰেণীৰ ছাত্ৰীক চোকা অস্ত্ৰৰে আক্ৰমণ কৰাৰ অভিযোগ উত্থাপন হৈছে আবুল কালাম আজাদ নামৰ এজন যুৱকৰ বিৰুদ্ধে। এই ঘটনাই সমগ্ৰ অঞ্চলটোতে তীব্ৰ চাঞ্চল্য আৰু আতংকৰ সৃষ্টি কৰিছে।
প্ৰাপ্ত তথ্য অনুসৰি, ছাত্ৰীগৰাকীয়ে বিদ্যালয়ৰ পৰা ঘৰলৈ উভতি আহি থকা সময়তে পথত আগচি ধৰে অভিযুক্ত আবুল কালাম আজাদে। ইয়াৰ পিছতে ছাত্ৰীগৰাকীৰ সৈতে কোনো কথাক লৈ বাক-বিতণ্ডাত লিপ্ত হয় যুৱকজন। অভিযোগ অনুসৰি, প্ৰেমৰ প্ৰস্তাৱ প্ৰত্যাখ্যান কৰাৰ বাবেই পূৰ্বৰে পৰা ছাত্ৰীগৰাকীৰ ওপৰত ক্ষুব্ধ হৈ আছিল অভিযুক্তজন। অৱশেষত ৰাজপথতে ছাত্ৰীগৰাকীক চোকা অস্ত্ৰৰে আক্ৰমণ কৰে আবুল কালাম আজাদে।
অভিযুক্তৰ আক্ৰমণত গুৰুতৰভাৱে আঘাতপ্ৰাপ্ত হয় ছাত্ৰীগৰাকী। ৰাজপথতে তেজেৰে তুমৰলি হৈ পৰে ছাত্ৰীগৰাকী। দিনদুপৰতে সংঘটিত এই ভয়ংকৰ ঘটনাই স্থানীয় লোকসকলৰ মাজত হাহাকাৰৰ সৃষ্টি কৰে। এগৰাকী কিশোৰী ছাত্ৰীৰ ওপৰত এনেদৰে ৰাজপথতে আক্ৰমণৰ ঘটনাই পুনৰবাৰ ৰাজ্যত নাৰী আৰু কিশোৰীৰ সুৰক্ষাক লৈ প্ৰশ্ন উত্থাপন কৰিছে।
এই ভয়ংকৰ ঘটনা সংঘটিত হৈছে সোণতলীত। ঘটনাটোক কেন্দ্ৰ কৰি অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে। প্ৰেমৰ প্ৰস্তাৱ প্ৰত্যাখ্যান কৰিলেই এগৰাকী ছাত্ৰীৰ ওপৰত এনেদৰে হিংসাত্মক আক্ৰমণ চলোৱাৰ অভিযোগে সমাজৰ এক উদ্বেগজনক ছবিও দাঙি ধৰিছে। ইফালে, ঘটনাৰ পিছতে আৰক্ষীয়ে তৎপৰতা গ্ৰহণ কৰি অভিযুক্ত আবুল কালাম আজাদক গ্ৰেপ্তাৰ কৰে। ইতিমধ্যে গ্ৰেপ্তাৰ কৰা অভিযুক্তজনক জে’ললৈ প্ৰেৰণ কৰা হৈছে।
উল্লেখ্য যে, প্ৰেমৰ প্ৰস্তাৱ প্ৰত্যাখ্যান কৰাটো এগৰাকী ব্যক্তিৰ সম্পূৰ্ণ ব্যক্তিগত অধিকাৰ। কিন্তু সেই সিদ্ধান্ত মানি ল’ব নোৱাৰি এগৰাকী ছাত্ৰীৰ ওপৰত চোকা অস্ত্ৰৰে আক্ৰমণ চলোৱাৰ দৰে ঘটনা কোনো কাৰণতে গ্ৰহণযোগ্য নহয়। সোণতলীৰ এই ঘটনাই পুনৰবাৰ সমাজত নাৰী আৰু কিশোৰীৰ নিৰাপত্তা নিশ্চিত কৰাৰ প্ৰয়োজনীয়তাক স্পষ্ট কৰি তুলিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















