অসম লাইভ ২৪ঃ ৰাজ্যত চলি থকা ক’ৰোনা যুদ্ধলৈ নিত্যনতুন পৰিৱৰ্তন আনিছে স্বাস্থ্য বিভাগে। এতিয়াৰে পৰা সকলো নাৰ্ছিংহোমত ক’ভিড পৰীক্ষাৰ সুবিধা উপলব্ধ হ’ব লাগিব। এই নিৰ্দেশ দিলে স্বাস্থ্য বিভাগে। মন্ত্ৰী হিমন্ত বিশ্ব শৰ্মাই জনতা ভৱনত বৃহস্পতিবাৰে এখন সংবাদমেল সম্বোধন কৰি এই কথা অৱগত কৰে। তদুপৰি গুৱাহাটীত আনলক প্ৰক্ৰিয়া আৰম্ভ হ’লে সকলো দোকানৰ কৰ্মচাৰী, চৰকাৰী, বে-চৰকাৰী কাৰ্যালয়ৰ কৰ্মচাৰীৰ ক’ভিড টেষ্ট বাধ্যতামূলক হ’ব। আনহাতে বৃহস্পতিবাৰৰ পৰা ৰাজ্যত আৰম্ভ হৈছে ৰেপিড টেষ্ট। গুৱাহাটীত বৃহস্পতিবাৰলৈকে ১ লাখ ১০ হাজাৰ লোকৰ ক’ভিড টেষ্ট সম্পন্ন হোৱা বুলি মন্ত্ৰীগৰাকীয়ে কয়। কিন্তু স্বাস্থ্য বিভাগে ৩ লাখ লোকৰ ক’ভিড পৰীক্ষাৰ লক্ষ্য স্থিৰ কৰিছে। ইয়াৰ বাবে প্ৰয়োজনীয় টেকনিচিয়ান শীঘ্ৰেই নিযুক্তি দিব স্বাস্থ্য বিভাগে। NHM-এ ১৫০ গৰাকী টেকনিচিয়ান নিযুক্তি দিব। আনহাতে গুৱাহাটীত আৰু ৬০টা নতুন ক’ভিড স্ক্ৰীনিং চেণ্টাৰ মুকলি কৰিব। আগষ্টৰ শেষ পৰ্যায়ত পৰিস্থিতি কিছু সলনি হোৱাৰ আশা ব্যক্ত কৰিছে স্বাস্থ্যমন্ত্ৰীগৰাকীয়ে। কিন্তু আগষ্টত পৰিস্থিতি অধিক অৱনতিৰ শংকা ব্যক্ত কৰে হিমন্ত বিশ্ব শৰ্মাই। লকডাউনৰ পাছত আক্ৰান্তৰ সংখ্যা বৃদ্ধি পাব বুলি মন্তব্য কৰে মন্ত্ৰীগৰাকীয়ে। দৈনিক এহেজাৰপৰ্যন্ত লোক আক্ৰান্ত হোৱাৰ শংকা আছে। ইয়াৰ পৰিপ্ৰেক্ষিতত গিৰিজানন্দ প্ৰতিষ্ঠানত সাজু কৰি তুলিছে এহেজাৰ নতুন বিছনা। আনহাতে ৰাজ্যৰ লগতে বহিঃৰাজ্যৰ লোকক প্লাজমা দানৰ বাবে আহ্বান জনায় স্বাস্থ্যমন্ত্ৰীগৰাকীয়ে। উল্লেখ্য মন্ত্ৰীগৰাকীৰ ভাষ্য অনুসৰি সুস্থ হৈ উঠা এজন ক’ৰোনা আক্ৰান্ত প্লাজমাৰে দুজন ৰোগীক সুস্থ কৰি তুলিব পাৰি। গুৱাহাটীৰ লগতে ৰাজ্যৰ আন বিমান বন্দৰসমূহতো এণ্টিজেন টেষ্টৰ সুবিধা উপলব্ধ হৈছে বুলি মন্ত্ৰীগৰাকীয়ে কয়। আনহাতে অহা সপ্তাহৰ পৰা ৰাজ্যত আৰম্ভ হ’ব টেলি মেডিচিন সেৱা। হোম কোৱাৰেণ্টীনত থকা লোকে এই সুবিধা গ্ৰহণ কৰিব পাৰিব। আনহাতে ক’ভিড কেয়াৰ চেণ্টাৰসমূহত থকা মধুমেহ ৰোগী আৰু ৬৫ বছৰ ঊৰ্ধ্বৰ লোকে দৈনিক ১০০ টকাৰ ফলমূল লাভ কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
