অসম লাইভ২৪ঃ বিদ্যুৎ বিভাগৰ আজৱ কাণ্ড৷ একেমাহতেই এখন ঘৰত আহিছে দুখনকৈ বিদ্যুতৰ বিল৷ বিলেই দুখন আহিছে তেনে নহয়৷ পৰিয়ালটোলৈ বিদ্যুত বিভাগে প্ৰেৰণ কৰিছে ১ লাখ ৩০ হাজাৰ টকাৰ বিল৷
মঙলদৈ বিদ্যুৎ উপ সংমণ্ডলৰ আজৱ কাণ্ডই হতভম্ব কৰি তুলিছে গ্ৰাহকক। বিদ্যুৎ বিভাগৰ কৰ্মচাৰীৰ এনে কাণ্ডই আচৰিত কৰি তুলিছে সকলোকে। বিল আদায় দিয়াৰ পাছতো আহিল লাখ টকাৰ বিল। দৰঙৰ মঙ্গলদৈ বিদ্যুৎ উপ সংমণ্ডৰ অন্তৰ্গত ধূলাৰ হিৰাপাৰা গাঁৱৰ আবুল হুছেইন নামৰ মৃত মানুহ এজনৰ নামত চলিত বৰ্ষৰ ছেপ্টেম্বৰ মাহৰ বিদ্যুৎ বিল আহিল ২৭,৭২৭ টকা। উক্ত বিল খিনি আদায় দিয়াৰ পাছতো একে মাহতে পুনৰ ১ লাখ ৩০ হাজাৰ ৫৪ টকাৰ বিল অহাত আচৰিত হৈছে পৰিয়ালৰ লোকসকল৷
বিভাগীয় কৰ্তৃপক্ষৰ এনে গাফিলতিৰ সন্দৰ্ভত অভিযোগ দাখিল কৰাৰ পাছতো কোনো গুৰুত্ব নিদিয়াৰ অভিযোগ আনিছে ভুক্তভোগী পৰিয়ালটোৱে৷ তাৎপৰ্যপূৰ্ণ প্ৰথম বিল আদায় দিয়াৰ পিছতো একেমাহতে আকৌ বিল কিদৰে প্ৰকাশ হয়? মঙলদৈ বিদ্যুৎ বিভাগৰ এনেধৰণৰ কৰ্ম কাণ্ডই পূৰ্বেও জলাকলা খুৱাইছে সাধাৰণ ৰাইজক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
